БИШКЕК, 5-апр. — Sputnik. Мурдагы депутат Садыр Жапаровдун тарапташтары Ак үй алдына чогулушту. Негизги максат камакка алынган Жапаровдун коопсуздугун камсыз кылуу экенин анын аялы Айгүл Асанбаева Sputnik Кыргызстан агенттигине билдирди.
"Садыр үчүн тынчсыздануудабыз. Күйөөмдүн кан тамырын кесип салганын атайын кызмат өзүнчө эле шоу кылып жиберди. Биздин алты балабыз бар, эгер күйөөмдү жоготсом аларды ким карайт", — деди Асанбаева.
Ал ошондой эле митинг өткөрүү үчүн мэриядан уруксат алынбаганын айтты.
Чогулгандардын коопсуздугуна милиция кызматкерлери көз салышууда.
Ага чейин 25-март күнү чет жакта жүргөн Садыр Жапаровду чек арадан УКМК кызматкерлери кармап кеткен. Ошол эле күнү анын тарапташтары митингге чыгып, анын жүрүшүндө милиция менен кагыша кеткен акциянын катышуучулары камалып, айрымдары кийин кое берилген.
Жапаровго Кылмыш жаза кодексинин 30, 227, 341, 113 жана 234-беренелери (барымтага алуу, бийлик өкүлүнө карата зомбулук көрсөтүү, өлтүрөм деп коркутуу, бейбаштык) боюнча айып тагылууда.
