БИШКЕК, 1-май. — Sputnik. Санкт-Петербург шаарында эмгектенген кыргыз мигранттары Өзгөн районундагы жер көчкүдөн жабыр тарткандарга акча чогултту. Бул тууралуу Sputnik Кыргызстан агенттигине демилгечилердин бири Керим Токтобеков билдирди.
"Ушул күндөрү Чубак ажы Жалилов, Абдишүкүр ажы Нарматов эл менен жолугуп, баян курду. Анан мечиттеги таксырлар менен макулдашып, акча чогултуу үчүн кутучалар коюлду. Жыйынтыгында 95 миң сом чогулду. Каражатты аалымдардан берип жибермей болдук", — деди Токтобеков.
Эскерте кетсек, 29-апрелде эртең менен саат 6:40тар чамасында Өзгөн районунун Зергер айыл аймагындагы Аюу айылында көлөмү 200 миң метр куб жер көчкү жүрүп, алдын ала маалымат боюнча алты үй-бүлөдөн 24 кишини басып калган. Көчкү алдында калган жети турак жайдын бирөөндө эч ким жашаган эмес.
Кечээ түш ченде 12 жана 2 жаштагы эки кыздын, кечке маал 20 жаштагы дагы бир кыздын сөөгү табылган. Учурда издөө иштерине 400гө чукул адам тартылды.
