Жакында Кочкор районунун Кара-Суу айылындагы Шапак Рысмендеев атындагы мектепти мындан 20 жыл бүтүрүп чыккандар ошол айылдагы майып болуп калган беш балалуу адамга үй куруп берди

Кочкор: 20 жылдыктын ак пейил жигиттери оорулуу кишинин бүлөсүнө үй куруп берди

1526
(жаңыланган 17:12 11.05.2017)
Мага ал жашоодон үмүт үзүп салгандай сезиле берчү. Сүйлөй да алчу эмес. Ага там салып бере турганыбызды укканда кадимкидей жандана баштады деп айтып берди кайрымдуу адамдардын бири.

БИШКЕК, 11-май — Sputnik. Жакында Кочкор районунун Кара-Суу айылындагы Шапак Рысмендеев атындагы мектепти мындан 20 жыл бүтүрүп чыккандар ошол айылдагы майып болуп калган беш балалуу адамга үй куруп берди.

Выпускники школы села Кара-Суу Кочкорского р-на закончившие 20 лет назад, строят дом для многодетной семьи
© Фото / Ишенбек Куржунбаев
Ушул адамдар үйлүү болуп, бактылуу болуп турган чагы

Ак өргөлүү болгон бүлөнүн кубанычына сөз жетпей турат. Ананчы, бул жигиттер бери дегенде сегиз кишинин сообуна калып отурат.

Sputnik Кыргызстан агенттиги бул жакшы ишти жасаган демилгечилер менен байланышты.

8-майда төшөктө үч жыл жаткан, беш баласы жана колунда энеси бар Жолдошбек Казаков жапжаңы жакшынакай үйгө кирди. Төрт бөлмөлүү үйдү айылдашына мектепти мындан 20 жыл мурда аяктаган 15 жигит куруп бериптир. Алардын ичинен айылда, Бишкек шаарында жана Россияда иштеп жүргөндөрү бар экен.

Кайрымдуулук кылуу идеясы аларга былтыр келип, 15и акча чыгарууга макулдугун берип, анан иш башталыптыр.

Жакшы ишке эмне себеп болгондугу туурасында демилгечилердин бири Кара-Суу айылынын тургуну, дыйканчылык менен алектенген Жоомарт Көкүмбаев айтып берди.

  • Жакында Кочкор районунун Кара-Суу айылындагы Шапак Рысмендеев атындагы мектепти мындан 20 жыл бүтүрүп чыккандар ошол айылдагы майып болуп калган беш балалуу адамга үй куруп берди
    Жакында Кочкор районунун Кара-Суу айылындагы Шапак Рысмендеев атындагы мектепти мындан 20 жыл бүтүрүп чыккандар ошол айылдагы майып болуп калган беш балалуу адамга үй куруп берди
    © Фото / Ишенбек Куржунбаев
  • Кайрымдуулук кылуу идеясы аларга былтыр келип, 15и акча чыгарууга макулдугун берип, анан иш башталыптыр
    Кайрымдуулук кылуу идеясы аларга былтыр келип, 15и акча чыгарууга макулдугун берип, анан иш башталыптыр
    © Фото / Ишенбек Куржунбаев
  • Классташтар тамды 400 миң сомго тургузуптур.
    Классташтар тамды 400 миң сомго тургузуптур.
    © Фото / Ишенбек Куржунбаев
1 / 3
© Фото / Ишенбек Куржунбаев
Жакында Кочкор районунун Кара-Суу айылындагы Шапак Рысмендеев атындагы мектепти мындан 20 жыл бүтүрүп чыккандар ошол айылдагы майып болуп калган беш балалуу адамга үй куруп берди

"20 жылдыгыбыздын урматына ашыкча ысырап кылып, шаан-шөкөттөнбөй эле батирден-батирге көчүп жүргөн үй-бүлөгө там тургузуп бердик. Анын беш баласы, колунда картайган энеси бар. Зээнибиз кейиди. Жолдошту мындан беш жыл мурда мас болгон бирөө койдуруп кетип, төшөккө жатып калган эле", — деди Көкүмбаев.

Бул жакшы кишилердин кадамы майыптыкка кабылган адамдын материалдык маселесин эле чечпестен, баспай, сүйлөбөй калган учурунда кадимкидей кайрат бериптир.

Выпускники школы села Кара-Суу Кочкорского р-на закончившие 20 лет назад, строят дом для многодетной семьи
© Фото / Ишенбек Куржунбаев
Айылдашына үй куруп берген ушул жарандар

"Мага ал жашоодон үмүт үзүп салгандай сезиле берчү. Басканы абдан начар эле, сүйлөй алчу эмес. Былтыр биз ага айтып, курулуш иштери башталган соң кадимкидей жанданып, жашоого умтулуп, сүйлөп да калды. Бул кайрымдуулукту биз Алланын атынан кылдык", — деп айтып берди ак пейил кишилердин бири болгон Жоомарт.

Биздин маектеш бул үйдү кудум өздөрүнө куруп жаткандай мамиле менен салышкандыгын, сапаттуу гана курулуш материалдарын колдонгондугун кошумчалады.

Классташтар тамды 400 миң сомго тургузуптур. Жоомарттын айтымында, бардыгы жөнөкөй эле жигиттер. Ону айылда турса, экөө Бишкекте жашап, бири "Жылуулук тармагы" ишканасында, экинчиси энергетика тармагында эмгектенет экен. Ал эми үч классташы Россияда кадимки эле мигранттардын катарын толуктаган кыргыз балдары болуп чыкты.

1526
Белгилер:
турак үй, кайрымдуулук, майып, Кочкор
Тема боюнча
Оштун дүкөндөрүндө жардамга муктаждар үчүн текче ачылды