БИШКЕК, 23-май — Sputnik. Кыргызстандык окуучулар математика боюнча өткөн Азия олимпиадасында коло медалга ээ болушту. Бул тууралуу Билим берүү жана илим министрлигинин маалымат кызматы билдирди.
Аталган олимпиадага Кыргызстан 2007-жылдан бери катышып келет. Бул жылы өлкө атынан жети окуучу барган.
"Бишкектеги "Сапат" лицейинин 11-классында окуган Саадинур Азисбек уулу жана Караколдогу "Сапат" лицейинин 10-классынын окуучусу Дослан Жекшеев үчүнчү орунга жетишти. Саадинур күмүш медалга бир гана упай жетпей калды", — деп жазылат маалыматта.
Алдыңкы орунга жетишкен окуучулар ушул жылы Бразилиянын Рио-де-Жанейро шаарында өтө турган эл аралык олимпиадага катышат.
Математика боюнча Азия олимпиадасы 1989-жылдан бери жыл сайын өтүп келет. Ага катышкан өлкөлөрдүн саны быйыл 41ге жетти.
