Нигериялык тамада Акило Эджикеме Паскаль маек учурунда

Кыргыз тилин үйрөнүп, тойлордун көркүн ачкан нигериялык жигиттин тарыхы

(жаңыланган 18:28 25.06.2017)
Жергиликтүү тойлордо жылдызы жанып, кыргыз тилин үйрөнүп, курсагын да тойгузуп, элдин сүймөнчүгүнө да айланып, самаган ишин биздин өлкөдөн тапкан нигериялык Акило Паскаль Sputnik окурмандары үчүн ой бөлүштү.

Калаадагы тойлордо меймандардын баары бул жигит ыр созгондо Атабеков ырдап аткандай бийге түшөт. Паскаль Мирбектин ырларын аткарганда тойдун күбөлөрү аны көккө көтөрүүгө даяр болуп калат.

— Журналист маек маалында чет өлкөлүккө узатпай кое албаган бир суроо бар: Кыргызстанга алгач келгениңизде сизди эмне таң калтырды?

— Бул жакта баары жашыл, баары кооз. Чындап эле шаар өсүмдүктөргө жыш. Бирок беш жыл мурункуга салыштырмалуу азыр бактар азайды. Нигериядан келген бирөөнү таң калтыруу татаал. Бирок ичимден далай ирет "Укмуш!" деп суктанган мүнөттөрүм болбой койгон жок.

Кыргызстандыктар абдан меймандос келет. Чет өлкөлүк экенимди унутуп, өзүмдү чоң апамдыкында же жакын досумдун үйүндө жүргөндөй сезем. Маданиятын жактырам. Этти абдан сонун даярдашат – этти эт менен кошо жешет, аркасынан даамдуу чай же улуттук суусундук жутасың, мындан артык эмне бар!?

Элдин маданияты жана үрп-адаты менен таанышкан соң, Кыргызстан жана Нигерия абдан окшош экендигине ынанам.

Бизде, Африкада да кызга калың берилет. Анан да этсиз тура албайбыз. Болгону даярдалыш ыкмалары айырмаланат.

© Sputnik / Эмиль Садыров
Нигериядан келген кара тору жигит кыргыз тойлорунун жылдызына айланды

— Кыргызстандыктар чет өлкөлүктөргө кызыгуу менен карашат. Бул сизге байкалдыбы?

— Чынын айтсам, өзүмдү өзгө катары сезбей калгам. Бул жакта көптөн бери жашайм, үйүм, ишим, сүйгөн кызым бар.

Бирок, кээде адамдар бөтөн экендигимди эске салып коюшат. Бир жолу базарлардын биринде эки бала терезеден баштарын чыгара: "Кара! Кара!" деп кыйкырган. Ошондон бери базарларды айланып өтөм.

— Эмнеликтен, Нигериядан бул жакка көчүп келүүнү чечтиңиз?

— Беш жылга жакын убакыт мурун тааныш кызым футбол ойноого чакыргандыгы үчүн келгем. Бир сезондой ойноп, ошол бойдон футболдон кеттим. Нигерияга кайтууга ниетим да жок эле, ресторандардын бирине ишке орноштум, официант болуп иштеп келем.

— Орус тилинде жакшы сүйлөйт экенсиз, тил үйрөнүү кыйынчылык туудурган жокпу?

— Бишкекке келгенче Россиядагы колуктулар шаары – Ивановодо жети жылча жашадым. Андыктан, тил көйгөйүн тарткан жокмун. Тескерисинче, бул жактан кыргызчаны да өздөштүрдүм.

Кебимде акцент абдан сезилет, сөздөрдү толук билбейм, бирок, айланамдагылар эмне жөнүндө сүйлөп жатканын түшүнөм.

Өз үйүмдөгүдөй жүрсөм да, бул өлкөдө конок экендигимди жакшы билем. Ошондуктан, элдин маданиятын, салт-санаасын сыйлоого тийишмин. Жашашым, сүйлөшүшүм керек да кантсе да, эгер мага кыргызча кайрылышса, мен да жергиликтүү тилде жооп берем.

Айта албай же бир сөздү эстей албай жатсам, адамдар мени эч сыр бербестен, оңдоп же түшүндүрүп коюшат. Бир нече тил билүү мээге да пайдалуу деп ойлойм. Адамдар, өзгөчө жумушта кыргызча амандашсам, таңданышат, бул мага жагат.

Шоумен из Нигерии Акило Эджикеме Паскаль во время интервью Sputnik Кыргызстан
© REUTERS / Жоомарт Ураимов
Тамада Акило Паскаль: өз үйүмдөгүдөй жүрсөм да, бул өлкөдө конок экендигимди жакшы билем. Ошондуктан, элдин маданиятын, салт-санаасын сыйлоого тийишмин. Жашашым, сүйлөшүшүм керек да кантсе да, эгер мага кыргызча кайрылышса, мен да жергиликтүү тилде жооп берем

— Бир кесиптешим сиз алпарган тойго күбө болуптур, кыргызча да обон созупсуз.

— Официанттык ишимде музыкант Мирлан Алыкулов менен таанышып калдым, ал кыргызча сүйлөрүмдөн, ыр аткарарымдан да кабардар болду. Экөөбүз тойлор үчүн дурус бир бизнес долбоорун түздүк. Мен кызыл терилүү жигит, ал жергиликтүү ырчы, кош жылдыз болгонубуз таасирдүү чыгат.

Мирлан го ырчы. А менин сахнада эмне кылып жатканымды меймандар дароо аңдай беришпейт. Бирок, микрофонду колума алып ырдай баштаганымда зал дүрбөй түшөт! Кыргызча бир куплет созгонумдан кийин реп окуйм. Өзүм ырахаттанам, көрүүчүлөр ыраазы, мындан өтөрү барбы!

Кыргызча, айрыкча, "Эжеке", дагы бир нече элдик кайрыктар көңүлүмө жакын. Мирбек Атабеков да дурус, көрүүчүлөр анын ырларын аябай жакшы көрүшөт.

— Биздин тойлор боюнча эмне дейсиз?

— Кыргыздын тоюнда дагы бир кичи үлпөт салтанаты уюштурулса, менимче, аны эч ким деле байкабай калат! Тойго тууган, дос, кесиптеш, коңшулардын баары күбө болот. Дасторкондо дүр-дүйүм тамак-аш. Тамада, артисттер, бий шоулары дайым чакырылат. Мындай салтанат үчүн кээ бирөөлөр насыя да алып, белектер менен аны жабышарын уктум!

Тойлордо мага жакканы – баары тартынбастан, эс алып, көңүл ачканы. Эже-байкелердин бийге түшкөндөрүн бир көрсөңүз эми.

— Бишкекте жашаганыңызга бир топ болуп калыптыр, биз менен бөлүшүүгө арзыган окуялар көп чыгар…

— Бир унутулгус учур бар, мага ал аябай таасир этти. Эки ишим бар: официантмын, андан тышкары, тойлордо ырдайм. Ресторанда кардарлардын өз ара кыргызча сүйлөшүп жаткандарын уксам, "Саламатсызбы?" деп кеп баштайм. Бири-бирине төп келген түгөйлөр менен ушинтип таанышып калдым. Кызыл терилүү жигит аларга кыргызча кайрылып жатса, албетте, алгач таңданышты. Ким жана кайдан экендигиме, бир туугандарым кайда, үй-бүлөм бар-жогуна кызыгышты. Өз таржымалымды: Иваново, мурдагы келинчегим, балам туурасында баяндап бердим. Каражат көйгөйүнөн улам, чүрпөмдү бир канча жылдан бери көрө элегим боюнча сыр бөлүштүм.

Ишенесиңерби, алар жакындарымдын мени көрүп, менден кабар алып кетиши үчүн билет алып беришерин убада кылышты! Бул көп акчанын башын жейт, ыңгайсыздандым, бирок, алар болбой туруп алышты. Карызга деп алайын дедим, ага да макул болушкан жок. Жакшы ишке себепкер болууну, мага жардамдашууну гана каалашканын айтышты.

Бир нече аптадан кийин чоң энем небереси менен меникине мейманга келишти. Шаарды кыдырдык, анан Ысык-Көлгө жөнөдүк. Туугандарым Кыргызстанга, бизге көрүшүүгө, бирге болууга мүмкүнчүлүк түзүп берген адамдарга суктана узашты.

Шоумен из Нигерии Акило Эджикеме Паскаль во время интервью Sputnik Кыргызстан
© Sputnik / Жоомарт Ураимов
Тамада Акило Паскаль: тойлордо мага жакканы – баары тартынбастан, эс алып, көңүл ачканы. Эже-байкелердин бийге түшкөндөрүн бир көрсөңүз эми

— Мындан ары эмне менен алектенүүгө ниеткерсиз?

— Кийим сатуу боюнча өз ишимди ачкым келет. Андан сырткары, той-салтанат уюштурууну да көздөп жүрөм.

Белгилер:
ыр, тамада, той, кыргыз тили, Нигерия, Бишкек
Тема боюнча
Кореяда той берген кыргыздар: боорсок, кошумча, өкүл ата жана "Кыргыз бийи"
Атамбаевдин кызы Алиянын үлпөт тоюн кыргызча алып барган орус тамаданын сыры
WhatsApp мессенджердин логотиби. Архив

Жаңы эрежени кабыл албасаңыз WhatsApp сиздин профилди өчүрөт

(жаңыланган 15:26 19.04.2021)
Жаңыланган келишимге ылайык, сиздин адаттарыңызды жана табитиңизди анализдөө үчүн WhatsApp колдонуучулардын жеке маалыматтарын Facebook тармагына өткөрүп берет.

БИШКЕК, 19-апр. — Sputnik. WhatsApp мессенжери жаңыланган колдонуу келишимин кабыл албаган аккаунттарга 15-майдан тарта чектөө киргизет. Бул тууралуу платформанын сайтында айтылат.

Компания колдонуучунун жаңылануулар боюнча кенен маалымат алуусу үчүн 15-майга чейин убакыт берди. Мессенжер кардарлардын профилин дароо өчүрүп салбайт. Деген менен алар жаңы эрежени кабыл алмайынча башкалардан келген коңгуроолор менен билдирүүлөргө жооп бере албайт.

Россиянын "Башкы радиожыштык борбору" Федералдык мамлекеттик унитардык ишканасынын илимий-техникалык борборунун адистери WhatsApp тиркемесин колдонуу келишиминдеги жаңыланган саясатында АКШнын чалгындоо кызматы тиркеме колдонуучуларын аңдып, алардын пикирин бурмалоо коркунучу пайда болушу мүмкүн деген тыянакка келишкен.

Январь айынын башында WhatsApp колдонуу шарттарын өзгөрттү. Ага ылайык, эми колдонуучулар Facebook жарнама тутумуна жана анын тиркемелерине өзүлөрүнүн адаттары жана табити боюнча маалыматтарын тапшыруусу керек. Кийинчерээк айтылган сындарга байланыштуу мессенжер колдонуу келишиминин мөөнөтүн 8-февралдан 15-майга чейин узартып койду.

Белгилер:
эреже, өчүрүү, жазышуу, аңдуу, WhatsApp
Тема боюнча
Clubhouse колдонгон 1,3 млн. кишинин маалыматы ачыкка чыгып кетти
Оорукананын нейрохирургия бөлүмүндө омурткага операция учурунда. Архив

Нарын облусунда биринчи жолу грыжаны алган операция жасалды

(жаңыланган 15:16 19.04.2021)
Мындан ары грыжасы бар бейтаптар Бишкек шаарына барбастан Нарын облусунда эле операция жасата алышары белгиленди.

БИШКЕК, 19-апр. — Sputnik. Нарын облусунда бел омурткасында пайда болгон грыжаны алган алгачкы операция жасалды. Бул тууралуу аймактык кабарчыга Нарын облустук бириктирилген ооруканасынын травматология бөлүмүнүн травматологу Талант Калдыбаев билдирди.

Анын айтымында, 14-апрель күнү 41 жаштагы бейтаптын төртүнчү жана бешинчи бел омурткасындагы (L IV-L V) грыжасы алынган. Бейтап бул илдеттен жети жылдан бери жапа чегип келген.

"Бүгүн бейтапка операция жасалганына 5 күн болду, бутуна туруп басып калды. Учурда абалы жакшы. Эми бейтаптар Бишкек шаарына барбастан Нарын облусунда эле операция жасата алышат", — деди дарыгер.

Бул операцияны Нарын облустук бириктирилген ооруканасынын директору Чыңгыз Нарынбеков, директордун дарылоо иши боюнча орун басары Эламан Алиев жана травматология бөлүмүнүн травматолог дарыгери Талант Калдыбаев жасаган.

Белгилер:
бейтап, операция, грыжа, Нарын
Тема боюнча
Невролог Батыров: остеохондроз күчөп отуруп грыжага айланат