Аңчы. Архив

Кыргызстандагы браконьер туристтер. Тили буруулардын колундагы канжалаган суур, коёндор

984
(жаңыланган 17:23 13.07.2017)
Араб өлкөлөрүнөн келди делген туристтердин майда жаныбарларды атып алуусун броконьерлик катары баалаган Жаратылыш ресурстарын коргоо жана пайдалануу департаменти окуя болгон жерди тактап жатат

БИШКЕК, 13-июл. — Sputnik. Атып өлтүрүлгөн майда жандыктарды колуна кармап алып кубанган чет элдик туристтердин видеосу Facebook тармагына колдонуучулардын бири тарабынан жүктөлдү.

Араб тилинде сүйлөп жаткан туристтердин кийген кийимине караганда, алар Араб өлкөлөрүнүн биринен келген.

Алар "Биз учурда Кыргызстанда жүрөбүз. Мына мунун баары Аллахтын бизге берген берекеси. Аллах Таалага мактоолор болсун", — деген маанидеги сөздөрдү айтышкан.

Видеону көргөн интернет колдонуучулары кызыл чеке талашка түшүп жатышат.

Мисалы, Нурбек Мелисов аттуу колдонуучу кептин баары акчада жатканын билдирген.

"Бизде акча төлөгөндөр оюна келгенди кыла берсе болот. Анын эмнесине таң калып жатасыңар? Акча берсе каалаган жаныбарды, каалагандай өлчөмдө атып аласыңар", — деп билдирген.

Ал эми Данияр Жакшылыков атуу колдоонучу Кызыл китепке кирбеген жаныбарларга аң уулоого уруксат берүү — туристтерди тартууга жакшы мүмкүнчүлүк деген пикирде.

"Автор, сен аша чаап жатасың. Бул адамдар аңчылыкка акча төлөштү. Биздин өлкө аларды ушундай жол менен гана тарта алат. Бир коен үчүн булар койдун баасын төлөп беришет! Бул нормалдуу көрүнүш! Эгер булар Кызыл китепке кирген жаныбарларды атса, башка кеп болмок", — деди ал.

Чет элдик туристтердин бул кылганы канчалык мыйзамдуу экенин тактоо үчүн Жаратыш ресурстарын коргоо жана пайдалануу департаментинин Жаныбарлар дүйнөсүн коргоо жана калыбына келтирүү бөлүмүнүн башчысы Талант Турдуматовго кайрылдык.

Анын айтымында, видеодогу туристтердин иш аракети броконьерлик катары бааланат.

"Туристтердин колунда беш коен, беш суур бар экени көрүнүп турат. Учурда коен атууга уруксат бериле элек. Ал эми суурга уруксат берилгени менен бизге бир дагы чет элдик жаран кайрылып, суур атуу ниетин билдирген эмес. Тилекке каршы, видеодо окуя кайсыл жерде болгону даана билинбей жатат. Ошондуктан жери такталууда. Белгилүү болгондо укук коргоо органдарына кайрылып, ал жакка качан туристтер келип, ким тосуп алганы аныкталат. Алар суурдун ар бир башына доо катары — 1,5 миң, коендукуна — 1 миң сомдон төлөшү керек. Эгер доонун суммасы 20 миң сомдон ашып кетсе, Кылмыш кодексинин негизинде жооп берет", — деди Турдуматов.

Ал ошондой эле жергиликтүү тургундарга "Курал-жаракты башка бирөөгө мыйзамсыз берүү", туристтерге "куралды мыйзамсыз алып жүрүү" беренелери боюнча кылмыш иши козголушу мүмкүн экендигин кошумчалады.

Мындан тышкары, Кыргызстанда аң уулоого уруксаат берилген жаныбарлардын баасын бир нече эсеге көтөрүү боюнча токтом долбоору өкмөттө каралып жатканы айтылды.

Бегилей кетсек, аңчылыкка расмий уруксат алган адамдар, анын ичинде чет өлкөлүктөр дагы бир суурга — 250 сом, коенго — 100 сомдун тегерегинде акча төлөшү керек.

984
Белгилер:
турист, талкуу, жаныбарлар, аңчылык, Кыргызстан
Тема боюнча
Баткен: колу-буту байланган кескелдирик 2 миң сомдон сатылууда. Күбөнүн сүрөттөрү
Чет элдик туристтерди тосуудагы сегиз "болбойт"