БИШКЕК, 24-июл. — Sputnik. "Кыргыз улуттук илимдер академиясынын кабарлары" илимий журналынын жаңы санында Кыргызстандын, Казакстандын, Тажикстандын жана Кытайдын окумуштуулары өздөрүнүн илимий иштеринин натыйжасын жарыялады. Бул тууралуу академиянын маалымат кызматынан билдиришти.
Журналдын "Маалыматтык технологиялар" рубрикасынын алдында Автоматика жана маалыматтык технологиялар институтунун илимпоздору Жаныбек Шаршеналиев менен Айна Бакасованын өзүн-өзү уюштуруучу татаал динамикалуу тутумдарды вектордук башкаруудагы көйгөйлөрүнө байланышкан макалалары жайгашты.
Ошондой эле бул бөлүмгө тажик окумуштууларынын макалалары, кыргыз-кытай илимпоздорунун биргеликте өткөргөн изилдөөлөрүнүн жыйынтыгы жарыяланды.
Андан сырткары, журналга кыргыз кырка тоолорунун жана Чүй өрөөнүнүн дары-дармек өсүмдүктөрү жана Батыш Тянь-Шандагы ак карагай токойлорундагы базидиялуу козу карындары тууралуу макала чыкты.
