БИШКЕК, 14-сен. — Sputnik. Москванын шаардык думасынын маданият боюнча комиссиясы калаага Чыңгыз Айтматовдун эстелигин коюуну жактырганын РИА Новости агенттиги билдирди.
"Айтматовдун эстелигин коюу боюнча конкурс аяктады. Айкел Павлов жана Подольский көчөлөрүнүн кесилишиндеги Чыңгыз Айтматовдун скверине орнотулат. Аны коюуга кеткен чыгымды Кыргызстандын маданият, маалымат жана туризм министрлиги өзүнө алат", — деген пикирин комиссиянын төрагасы Евгений Герасимов билдирди.
Буга чейин улуу жазуучунун эстелигин коюу сунушун Москва шаардык думасынын монументалдык маданият боюнча комиссиясы да колдогон.
Айтматовдун аты Москвадагы скверлердин бирине былтыр май айынын аягында берилген.
Ошондой эле улуу жазуучунун аты Москвадагы Даниловский районундагы Люсиновская жана Большая Серпуховская көчөлөрүнүн кесилишинде гүл бакка да берилген. Андан сырткары, Санкт-Петербург шаарындагы скверге дагы ыйгарылган.
