Тыйындар. Архив

Улуттук банк тыйын кабыл албай койгон гипермаркеттер менен кафени жазалады

(жаңыланган 14:02 13.01.2018)
Социалдык эксперимент учурунда бир катар соода жана тамактануу жайлары тыйын алуудан баш тартышкан

БИШКЕК, 12-янв. — Sputnik. Улуттук банк тыйын алуудан баш тарткан Globus, "Фрунзе" гипермаркеттери менен "Фаиза" кафесине айып салды. Бул тууралуу Улуттук банктын төрагасы Толкунбек Абдыгулов Sputnik радиосунун түз эфиринде билдирди.

Белгилей кетсек, Sputnik Кыргызстан агенттигинин журналисттери борбор калаадагы соода жана тамактануу жайларында тыйын менен төлөөгө аракет кылышкан. Бирок көпчүлүк соода түйүндөрү тыйынды албай турганын айтышкан.

Буга чейин аталган материал чыккандан кийин коомдук жайлардын кызматкерлерине карата 500 сомдон 3 миң сомго чейин айып салынганын Улуттук банктын маалымат кызматы кабарлаган.

Банктын төрагасы Абдыгулов Sputnik радиосунун түз эфиринде тыйындар дагы улуттук валюта экенин айтып, Кыргызстандын аймагында кабыл алынышы керектигин баса белгиледи.

"Маалымат аларыбыз менен дароо аракеттерди көрдүк. Тыйындар улуттук валюта болуп саналат, Кыргызстан аймагында тигил же бул кызматты көрсөтүп жаткан соода түйүндөрү тыйынды кабыл алууга милдеттүү. Ар бир кыргызстандык керек болсо 1 тыйындыктар менен да төлөй алат", — деди ал.

Улуттук банктын төрагасы ушундай пайдалуу социалдык эксперименттер көп болушу керектигин белгиледи.

Белгилер:
акча, валюта, тыйын, Улуттук банк, Толкунбек Абдыгулов
Тема боюнча
Кыргызстанда коллекциялык жаңы монеталар сатыкка чыгат. Сүрөт
WhatsApp мессенджердин логотиби. Архив

Жаңы эрежени кабыл албасаңыз WhatsApp сиздин профилди өчүрөт

(жаңыланган 15:26 19.04.2021)
Жаңыланган келишимге ылайык, сиздин адаттарыңызды жана табитиңизди анализдөө үчүн WhatsApp колдонуучулардын жеке маалыматтарын Facebook тармагына өткөрүп берет.

БИШКЕК, 19-апр. — Sputnik. WhatsApp мессенжери жаңыланган колдонуу келишимин кабыл албаган аккаунттарга 15-майдан тарта чектөө киргизет. Бул тууралуу платформанын сайтында айтылат.

Компания колдонуучунун жаңылануулар боюнча кенен маалымат алуусу үчүн 15-майга чейин убакыт берди. Мессенжер кардарлардын профилин дароо өчүрүп салбайт. Деген менен алар жаңы эрежени кабыл алмайынча башкалардан келген коңгуроолор менен билдирүүлөргө жооп бере албайт.

Россиянын "Башкы радиожыштык борбору" Федералдык мамлекеттик унитардык ишканасынын илимий-техникалык борборунун адистери WhatsApp тиркемесин колдонуу келишиминдеги жаңыланган саясатында АКШнын чалгындоо кызматы тиркеме колдонуучуларын аңдып, алардын пикирин бурмалоо коркунучу пайда болушу мүмкүн деген тыянакка келишкен.

Январь айынын башында WhatsApp колдонуу шарттарын өзгөрттү. Ага ылайык, эми колдонуучулар Facebook жарнама тутумуна жана анын тиркемелерине өзүлөрүнүн адаттары жана табити боюнча маалыматтарын тапшыруусу керек. Кийинчерээк айтылган сындарга байланыштуу мессенжер колдонуу келишиминин мөөнөтүн 8-февралдан 15-майга чейин узартып койду.

Белгилер:
эреже, өчүрүү, жазышуу, аңдуу, WhatsApp
Тема боюнча
Clubhouse колдонгон 1,3 млн. кишинин маалыматы ачыкка чыгып кетти
Оорукананын нейрохирургия бөлүмүндө омурткага операция учурунда. Архив

Нарын облусунда биринчи жолу грыжаны алган операция жасалды

(жаңыланган 15:16 19.04.2021)
Мындан ары грыжасы бар бейтаптар Бишкек шаарына барбастан Нарын облусунда эле операция жасата алышары белгиленди.

БИШКЕК, 19-апр. — Sputnik. Нарын облусунда бел омурткасында пайда болгон грыжаны алган алгачкы операция жасалды. Бул тууралуу аймактык кабарчыга Нарын облустук бириктирилген ооруканасынын травматология бөлүмүнүн травматологу Талант Калдыбаев билдирди.

Анын айтымында, 14-апрель күнү 41 жаштагы бейтаптын төртүнчү жана бешинчи бел омурткасындагы (L IV-L V) грыжасы алынган. Бейтап бул илдеттен жети жылдан бери жапа чегип келген.

"Бүгүн бейтапка операция жасалганына 5 күн болду, бутуна туруп басып калды. Учурда абалы жакшы. Эми бейтаптар Бишкек шаарына барбастан Нарын облусунда эле операция жасата алышат", — деди дарыгер.

Бул операцияны Нарын облустук бириктирилген ооруканасынын директору Чыңгыз Нарынбеков, директордун дарылоо иши боюнча орун басары Эламан Алиев жана травматология бөлүмүнүн травматолог дарыгери Талант Калдыбаев жасаган.

Белгилер:
бейтап, операция, грыжа, Нарын
Тема боюнча
Невролог Батыров: остеохондроз күчөп отуруп грыжага айланат