Бишкекте тигилген көчөттөр. Архивдик сүрөт

Бишкек мэриясы бир көчөттү 9 миң сомго сатып алды. Арзаныраагы жок беле?..

4631
(жаңыланган 00:35 18.04.2018)
Максат Элебесов
Муниципалитет ири көчөттөрдү чет жактан сатып алган. Өсүмдүктөрдү өстүрүүчү чарбанын кызматкерлери мэрия ушул эле көчөттөрдү Бишкектен ондогон эсе арзан эле тапса болмоктугун айтышты.

БИШКЕК, 16-апр. — Sputnik. Мамлекеттик сатып алуулар порталындагы маалыматка ылайык "Зеленстрой" муниципалдык ишканасы чет жактан 13 миллион 763 миң сомго көчөт сатып алган.

Маалыматта бак-дарактардын алты түрү сатып алынган. Алар:

- майда жалбырактуу липа — 3 636 000 сомго 400 көчөт (бир даанасы 9 090 сом);

- зараң — 2 727 000 сомго 300 көчөт (бир даанасы 9 090 сом);

- каштан — 1 818 000 сомго 200 көчөт (бир даанасы 9 090 сом);

- чынар терек — 3 636 000 сомго 400 көчөт (бир даанасы 9 090 сом);

- декоративдик алма багы — 485 000 сомго 100 көчөт (бир даанасы 4 850 сом);

- четин — 1 461 000 сомго 300 көчөт (бир даанасы 4 870 сом).

Тендерди "Art Green" ЖЧКсы утуп алган. Тендер тууралуу жарыя мамлекеттик сатып алуулар порталына 2017-жылы 17-октябрда жарыяланган.

Өсүмдүктөрдү өстүрүүчү чарбанын кызматкерлери көчөттөр кымбат алынган деген пикирде. Европадан көчөт алып келген Абдулла Капаров муниципалитет өсүмдүктөрдү мындан арзан деле тапса болмоктугун айтат.

"Бизде эң кымбат көчөт миң сом турат. Тогуз миң сом деген баа кайдан чыгарын мен көп түшүнбөйм. Анан калса шаар бийлиги жергиликтүү деле көчөттөрдү алса болмок", — деди Капаров.

Чүй облусундагы Өсүмдүктөрдү өстүрүүчү чарбанын өкүлү Ольга Жердеванын айтымында, ири көчөттөр кымбат турат, бирок анын баасы тогуз миңге жетпейт. Ал эки метрлик липа көчөттөрүн 500 сомдон саткан. Жердева Кыргызстанда дээрлик эч ким ири көчөттөрдү сатпай турганын кошумчалады. Анткени алардын баары сатылат деген кепилдик жок. Эгер келишим болгондо абал башкача болмоктугун айткан Жердева мэрия мындай жол менен кызматташууга кызыкдар эмес экенин белгиледи.

"Алар жергиликтүү көчөттөрдү алууга кызыкпайт. Андан сырткары, тендер саясатын түп тамыры менен өзгөртүү керек. Мен бир нече жолу арыз берип, бирок бир да жолу уткан жокмун. Жыйынтыгында уткан кишилер мага келип, көчөттү арзан алып кетишкен", — деди Жердева.

Эске салсак, социалдык тармактын колдонуучулары мэрия көчөттөрдү кымбат баада сатып алганы боюнча нааразычылыктарын жазышкан.

4631
Белгилер:
көчөт, тендер, "Зеленстрой" ишканасы, Бишкек мэриясы
Тема боюнча
Таштандыдан эмес, бак-дарактан тазаланган Бишкек. Тыныстанов көчөсүнүн көрүнүшү
Жаз — жарыш! 20 сомдон 7000 миңге чейин сатылган көчөттөрдүн баасы жана дареги
Пикирлер