28 жаштагы Асылбек Асаналиев алты жылдан бери Япониянын Цукуба шаарында иштейт

Япониядагы ашпозчу Асылбек: айына 3500 долларга чейин айлык алам

5457
(жаңыланган 10:26 02.05.2018)
Чет өлкөдө билим алып, өз ордун таап ийгилик жараткан кыргызстандыктар аз эмес. Алардын бири 28 жаштагы Асылбек Асаналиев алты жылдан бери Япониянын Цукуба шаарында иштеп, ал жакта үй-бүлөсү менен жашап келет.

Sputnik Кыргызстан агенттигинин кабарчысы чет жерде ресторанды башкарып, япон ашканасын ийне-жибине чейин билген ашпозчу менен маек курду.

— Японияга кантип барып орун-очок алып калдыңыз эле?

— Мен бул жакка көп эле жолу келгем. Алгач кыска убакытка изилдөө программасынын алкагында баргам. Андан соң Ишенаалы Арабаев атындагы университетте окуп жүргөндө программанын алкагында келгем. Ошол маалда япон тилин тереңдетип үйрөнөйүн деп ал жактагы жеке мектепке документтеримди тапшырып Кыргызстанга кайткам. Ошентип ал окуу жайга өтүп кетип, кайра Японияга сапар алгам. Ошондон тарта жумуш таап, үй-бүлө куруп калып калдым.
Повар в японском ресторане Асылбек Асаналиев, работающий в городе Цукуба
© Фото / предоставлено Асылбеком Асаналиевым
Ашпозчу Асылбек Асаналиев алты жылдан бери Японияда жашайт

— Окууну бүтүп эмнеге Кыргызстанга келген жоксуз?

— Мугалимдик боюнча жылына 7000 миң доллар төлөп билим алчумун. Бирок биринчи жылы каржы жагынан кыйналып окууну жыйыштырдым, жалпы ал жерде эки жыл окумакмын. Ошончо акча сарптаган адистигимдин келечегин Кыргызстандан көрө албай койдум. Үйдөгүлөр менен да кеңештим. Бош убактымда өзбекстандык досум экөөбүз ашканада идиш жууп, официант болуп иштечүбүз. Көрсө ошол кезде ресторандын ээси биздин жакшы иштеп жүргөнүбүздү байкап калыптыр. Анан ал бизди жумушка чыкыртып, ошентип ашпозчулукту аркалап кеттим. Бул жактан япон кызына үйлөндүм, мекениме келгенде эмне жумуш кылам деп ойлонуп бир нерсе үйрөнүп кетүүгө аракет жасадым, япондордун тамак-ашын изилдей баштадым. Негизи бул жактагылардан көп нерсе алса болот. 

— Анан япондорго кандай күйөө бала болдуңуз?

— Келинчегим менен жумуштан таанышкам. Ал дагы келип-кетип иштеп жүрчү. Жылдызыбыз келишип мен аны жактырып калдым. Ишке келбей калса аны издеп калмай. Кыскасы, ал сезимдерди айтып болбойт. Япондордун күйөө баласы эмес, кызматкери болуу кыйын. Анткени алар талапты катуу коюшат. Жубайымдын колун сураганы барганда болочоктогу кайын журтум такып бардыгын сурап чыккан. Ата-тегим, алдыда койгон пландарым, жумушум боюнча суроолоруна жооп алып, анан гана макул болгон.

  • Повар в японском ресторане Асылбек Асаналиев
    Кыргызстандык ашпозчунун алдында 40ка жакын кызматкер иштейт
    © Фото / предоставлено Асылбеком Асаналиевым
  • Повар в японском ресторане Асылбек Асаналиев
    Асылбек Асаналиев Бишкекте япон ашканасын ачууну көздөп келет
    © Фото / предоставлено Асылбеком Асаналиевым
  • Повар в японском ресторане Асылбек Асаналиев
    Повар в японском ресторане Асылбек Асаналиев
    © Фото / предоставлено Асылбеком Асаналиевым
1 / 3
© Фото / предоставлено Асылбеком Асаналиевым
Кыргызстандык ашпозчунун алдында 40ка жакын кызматкер иштейт

— Чет жакта кыйынчылыктар болбой койбосо керек?

— Окуп жүргөндө тил жагынан кичине кыйналдым. Бишкекте үйрөнгөнүм Японияга барганда начар болуп чыкты. Андан сырткары, 2-3 ай жумуш таба албай жүрдүм. Акчанын жоктугунан күнүнө бир жолу эле тамактанмай, үйгө кесме алып келип, сууга бышырып жеп жүрүп арыктап кеткем. Кийин жумушка киргенде япон кесиптештеримдин көралбастыгынан иштен айдалып, башка жактан акча таап жүрдүм. Бизге деле чет жактан бирөө келип тың болуп, бат эле көтөрүлүп кетсе ичи тарлар четтен чыгат да. Так ошондой учурларды башыман өткөрдүм. Бирок убакыт өткөндөн кийин мурдагы жумуштагылар кайра чакыртып, ишке алышты. Кыскасы ресторанды келе калып эле башкарып калган жокмун.

— Азыр иштериңиз кандай?

— Кудайга шүгүр, жакшы. Жакында эле экинчи кыздуу болдум. Мен башкы ашпозчу жана администратор болуп иштеп жаткан жерде 40ка жакын кызматкер эмгектенет. Алардын арасында беш кыргыз бар. Бул өлкөгө келген мекендештерге колдон келген жардамды берип, аларды жумушка алууга аракет жасайм. Ал жактагы бардык иштерди өзүм көзөмөлдөйм. 

Повар в японском ресторане Асылбек Асаналиев, работающий в городе Цукуба
© Фото / предоставлено Асылбеком Асаналиевым
Япон кызына үйлөнгөн жигит эки кыздын атасы

— Сыр болбосо ал жакта канча айлык аласыз?

— Мактангандай болбоюн, бирок менин курагымдагы япондор менчелик айлык албайт. Маянам 3000-3500 доллардын тегерегинде. Аябай көп акча алат экен деп ойлобогула. Японияда бардыгы кымбат, тапканыңды ошончо сарптайсың.

— Кыргызстанга келүү ниетиңиз барбы?

— Ооба. Буюрса бир жылдан соң үй-бүлөм менен биротоло барам. Анткени ресторандын ээси менен ошентип келишим түзүп койгом. Бишкекте кесибимди улантып, бардык талаптарга жооп берген заманбап япон ашканасын ачууну пландап жүрөм. Буюрса ал башкаларга үлгү болуп, келгендер ырахат алып кете турган жай болот. Бул бир гана киреше табуу үчүн эмес. Япониядан үйрөнгөнүмдү Кыргызстанга алып келип башкаларга кызмат көрсөтүүнүн, тазалыктын үлгүсүн иш жүзүндө көрсөтүп берем.

Буга чейин Кореяда окуп-иштеп, акыры мекенине кайтып келген кыргызстандык Фатима Жумабаева да ийгилик сырлары менен бөлүшкөн.

5457
Белгилер:
ашпозчу, Асылбек Асаналиев, Япония, Кыргызстан
Тема боюнча
Сеулда сейилдеп жүрүп, акча толо капчык таап алдым. Кыргызстандык кыздын чыйыры
Бүтүндөй командам сызга отургузуп кеткен. Дизайнер Замира Молдошева менен маек
Көк бөрүдө тартылган улактын эти куурдакка айланганда. Видео
Орто-Сай базарындагы жайма базар. Архив

Күчүм жетпей жатат! Түлөбаев жайма базар боюнча УКМКга кайрылганын айтты

62
(жаңыланган 00:06 26.01.2021)
Түлөбаев "Ош" базарында болгон окуя сыяктуу көрүнүштөргө жол берилбеши керектигин айтты. Буга чейин соцтармакта сатуучунун мэрия кызматкери жана милиционер менен тирешкен видеосу тараган.

БИШКЕК, 25-янв. — Sputnik. Мэрдин милдетин аткаруучу Балбак Түлөбаев базардын айланасында товарларды жайып саткандар менен күрөшүү үчүн УКМКдан жардам сураганын билдирди.

Ал бул боюнча Улуттук коопсуздук мамлекеттик комитетинин башчысы Камчыбек Ташиевге кат жиберген.

Ошондой эле Түлөбаев "Ош" базарында болгон окуя сыяктуу көрүнүшкө жол берилбеши керектигин айтты. Буга чейин социалдык тармакта рейд учурунда сатуучунун мэриянын кызматкери жана милиционер менен тирешкен видеосу тараган.

"Билем, саботаж кылып жатышат, айтканды укпай жатышат. Мындай да, тигиндей да айттык, болбой жатышат. Эки күн мурун Камчыбек Кыдыршаевичтин атына кат жибердим. Менин күчүм жетпей жатат, мага жардам бергиле дедим. Жайма базар менен күрөшүүгө топ жибериңиз деп өтүндүм. "Ош" базарынан, "Аламүдүн" базарынан акча чогултуп жаткан чагымчылдар тууралуу билебиз. Кат келеби, жокпу билбейм, биз катуу иштейбиз. Болду эми, жакшы эле кечириштик", — деди Түлөбаев.

Шаар башчысынын милдетин аткаруучу сатуучуларды базардын ичине кирип соода кылгыла деп айтып жатканын жана ал жакта орундар бар экенине ишендирди.

62
Белгилер:
жайма базар, мэр, Балбак Түлөбаев, УКМК, Бишкек
Тема боюнча
Садыр Жапаров мэр Балбак Түлөбаевге эки тапшырма берди
Мурдагы вице-премьер Алтынай Өмүрбекова. Архив

Финполго Алтынай Өмүрбекова менен Аида Исмаилова чакырылганы айтылды

137
(жаңыланган 22:46 25.01.2021)
Өкмөттүн пандемия маалындагы иши боюнча буга чейин мурунку премьер-министр Кубатбек Боронов сурак берип, күбө катары чакырылганын айткан.

БИШКЕК, 25-янв. — Sputnik. Мурдагы вице-премьерлер Алтынай Өмүрбекова менен Аида Исмаилова өкмөттүн пандемия маалындагы иши боюнча Экономикалык кылмыштарга каршы күрөшүү кызматына суракка чакырылды. Бул тууралуу укук коргоо органдарындагы ишенимдүү маалымат булагы билдирди.

Вице-премьер-министр Кыргызской Республики Аида Исмаилова на заседании Жогорку Кенеша в государственной резиденции Ала-Арча
© Sputnik / Табылды Кадырбеков
Мурдагы вице-премьер-министр Аида Исмаилова

Алардын айтымында, Исмаилова эртең, 26-январь саат 09:30га, ал эми Өмүрбекова саат 15:00гө чакырылды. Финпол азырынча комментарий бере элек.

Өмүрбекова 2018-жылдан 2020-жылга чейин вице-премьер болуп иштеген. Исмаилова болсо ал кеткенден кийин апрель айынан октябрга чейин бул кызматты аркалаган.

Ушул иш боюнча буга чейин өкмөттүн мурунку башчысы Кубатбек Боронов сурак берип, күбө катары чакырылганын айткан.

Андан мурда Экономикалык кылмыштарга каршы күрөшүү кызматынын жетекчиси Сыймык Жапыкеев пандемия маалында адамдардын массалык түрдө каза болушуна премьер-министрлер жана вице-премьерлер жооп берерин айткан. Ошондой эле ал медикаменттер, жеке коргонуу каражаттары, тез жардам унаалары кымбат баада алынгандыгы териштирилип жатканын кошумчалаган.

137
Белгилер:
сурак, Аида Исмаилова, Алтынай Өмүрбекова, финансы полициясы
Тема боюнча
Жапыкеев: пандемияда иштеген аткаминерлердин баары сурак берип, көбү камалат