Түгөй. Архивдик сүрөт

Күйөөм көзүмө чөп салып жүрүптүр. Мындан ары кантип жашайм?

8820
(жаңыланган 23:47 18.06.2018)
"Психолог менен баарлашуу" рубрикасынын бул жолку чыгарылышында жолдошу көзүнө чөп салып жүргөн келиндин тагдыры баяндалат.

Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

Жолдошум башка кыз менен сүйлөшүп жүргөнүн жакында эле билдим…

Тааныш, тууган, элдин айтымында экөөбүз "таттуу түгөйлөрдөн" болчубуз. Анын мага жасаган мамилеси, сыйы, сүйүүсү, айтор, баары идеалдуу эле. Мен да жакшы көрчүмүн.

Жолдошумдун айланчыктап жанымда жүрүшү, көзүмдү карап сыйлап турганы көпчүлүккө жага берчү эмес. Айрыкча кайын-журтума. Экөөбүздү ажыраштырганга аябай эле аракет кылышты. Бирок жолдошум аларга дайыма "биз бактылуубуз, андан башка эч нерсенин кереги жок" деп көп айтчу.

Ошентип эки балалуу болдук, бактылуу турмушубуз уланып жатты. Үйдө отурганда күйөөм эч нерседен кем кылбай "сен сулуу болуп турушуң керек" деп кийим-кечемен бери алып берип бакты. Өзү да жакшы кызматта иштейт.

Балдарымды торолтуп алып жумушка да чыктым.

Мен күйөөмдүн телефонун обу жок текшере берчү эмесмин, ага негиз да жок эле. Бир күнү жолдошум душка кирип кеткенде бирөө чалды. Кечке чырылдай бергенинен трубканы алайын десем өчүп калды. Бир убакта "качан келесиң, күтүп атып чарчадым, сагынып да кеттим" деген билдирүү келди…

Үстүмөн бирөө муздак суу куйгандай эле катып туруп калдым. Андан мурунку билдирүүлөрүн окуй баштадым. Көрсө ал кыз менен көптөн бери эле сүйлөшчү экен. Мен ал учурдагы абалымды сөз менен айтып түшүндүрө албайм… Телефонду ордуна коюп билмексен киши болуп ашканага барып калдым. Күйөөм душтан чыгып адатынча мени келип бир өөп, балдары менен ойноп "мен жумуштар менен бир жакка барып келе калайын" деди. Унчуккан жокмун, кармаган колунан иренжип араң турдум. Баягы мен сүйгөн адам жок, бир заматтын ичинде чоочун кишиге айланды. Ал чыгары менен кийимдеримди жыйнап балдарды алып унчукпай төркүнүмө жөнөп кеттим. Жолду катар ызаланып ыйладым, ишенгим келген жок, өзүмдү эч кимге керегим жоктой сезип бараттым. Күчтүүмүн деп ойлочумун бирок алсыз экенимди ошондо сездим. "Жолдошумдун башка бирөөнү таап алышына эмне себеп болду" деген ой мени санаага салды.

Ата-энеме барып эмне болгонун деле айткан жокмун. Бир-эки күн өткөндөн кийин балдарым "аталай" баштады. Күйөөм болсо ошол эле күнү чалган, бирок сүйлөшпөй койгом. Эптеп төркүнгө бир жума баттым. Күндө кечирим сурап келе берип, анүстүнө балдарым инимдин балдары менен уруша бергенинен акыры үйгө кайттым. Жарашаардын алдында "сага анча эмне болду, эмне себептен башка кыз менен сүйлөштүң" деп сурасам, "сен мага көңүл бурбай калганыңан кызгантып көрөйүн дегем" деп жооп берди.

Бул жооп да мени дендароо кылды.

Азыр бирге жашап жатабыз. Ажыраша да албайт элем. Бирок жашоо баштагыдай эмес. Мурдагыдай бактылуу күндөрдү өткөрүп, баарын унутуш үчүн эмне кылыш керек? Негизи мындай нерсенин унутулушу мүмкүнбү? Же өмүр бою ушинтип кыйналып өтөмбү?..

Перизат Асылбаева, "Данакер" үй-бүлө бекемдөө борборунун психологу

Ар бир үй-бүлөдө кризистик этаптар болот. Биринчи кризистик этап үйлөнгөндөн кийин 2-3-жылдан соң башталышы мүмкүн. Анда жубайлар жаңы балалуу болуп, аялы күйөөсүнө көңүл бура албай, үй жумуштары, бала менен алагды болуп калат. Ошондо эркектер башка адамдан жылуу мамиле издеп башташы мүмкүн. Эгер мындай учурда жубайлар бири-бирине жетишерлик көңүл бурса, кырдаалдан жөн эле чыгып кетет.

Орто куракта, улгайып калганда да үй-бүлө кризистик кырдаалга дуушар болот. Орто куракта эркектер картайгысы келбей жаш курагы менен күрөшүп, дараметин текшерип көрүш үчүн кыздар менен сүйлөшүп же мамиле кура баштайт.

Мындан сырткары, балдары өзүнчө үй-бүлө куруп кеткенде жалгыз калган жубайлар да кыйын кырдаалды башынан өткөрүп жүрүшөт. Себеби алар буга чейин балага эле байланып башка эч нерсе менен алек болгон эмес. Ошондуктан аялдын да, күйөөсүнүн да кызыкчылыктары бир болуп турушу зарыл.

Бизге кайрылган келин менен жолдошу биринчи кризистик этапка туш болуптур. Экөө тең жумушта, бири-бирине көңүл бура албай, мамилелери сууп баштаган.

Бирок үй-бүлө бардык нерседен биринчи кезекте турат. Аны сактап калыш үчүн ар түрдүү ойго алдырып жибербей акыл калчап, тийиштүү адистерге кайрылып убагында чечип алган оң. Анын үстүнө ортодо балдар бар экен.

Жолдошуңуз менен сезим, мамилеңер тууралуу ачык сүйлөшүп алгыла. Себеби ажырашкан оңой эмес. Экинчи жолу үй-бүлө куруу андан татаал.

Күнөө бир адамдан кетпейт, күйөөңүздүн башка адам менен мамиле курушуна өзүңүз да себепкер болушуңуз мүмкүн. Үй ээси "көңүл бурдурайын дегем" деп айткан турбайбы. Балким чындыгында эле сиз иштегенден бери ага мурдагыдай мамиле кылбай калгандырсыз. Ал өзүңүзгө билинген жок да. Буга чейин сизди сүйүп, сыйлап, ата-энесинин каршылыгына карабай алган бала эми деле сизди талаага таштап кетиши мүмкүн эмес. Бул жашоонун бир сыноосу.

Эсиңизде болсун, идеалдуу адам жок, сиз башка бирөө менен бүлө курган менен ал күйөөңүздөн жаман болуп калышы мүмкүн. "Колдо бар алтындын баркын бил" деген жакшы сөз бар. Күйөөңүз сизди урбаса, кордобосо болгон нерсени алып келип, көзүңүздү карайт экен. Ортодогу сүйүүнүн бекем болушу үчүн, үй-бүлөнүн бекемдиги үчүн сиз да аракет кылыңыз.

Эгер "Психолог менен баарлашуу" рубрикасынын алкагында бугуңузду чыгарып, кеңеш алгыңыз келсе, news@sputnik.kg дарегине "Адиске анонимдик кайрылуу" деген белги менен кат жолдоңуз.

 

 

8820
Белгилер:
турмуш, келин, психолог, Кыргызстан
Тема:
Психолог менен баарлашуу (123)
Тема боюнча
Уул-келиним менен чогуу тургум келбейт, бөлүп да кое албайм. Эненин арманы
Сүйүүмө эми жолуктум, бирок аялымды таштай албайм... Эки ортодо калган жигит
Күйөөм кызгана берип күн көрсөтпөй калды. Канткенде жаным калат?..
Кыргызстандын жаранынын паспорту. Архив

Райым Матраимов фамилиясын өзгөртүп алган. Мамкаттоо чоо-жайын айтты

516
(жаңыланган 14:26 20.10.2020)
Буга чейин социалдык тармактарда Матраимов фамилиясын өзгөртүп алды делген паспорттун сүрөттөрү жарыяланган.

Маалымат толукталууда

БИШКЕК, 20-окт. — Sputnik. Райым Матраимов фамилиясын алмаштыруу үчүн Ош шаарындагы Жарандык актылардын абалын каттоо бөлүмүнө жеке өзү кайрылган. Бул туурасында Мамлекеттик каттоо кызматы расмий түрдө билдирди.

Фото паспорта, в котором Райым Матраимов якобы поменял фамилию
фото распространяемое в мессенджерах
Райым Матраимов фамилиясын алмаштыруу үчүн Ош шаарындагы Жарандык актылардын абалын каттоо бөлүмүнө жеке өзү кайрылган
“Матраимов Р. Ы. аттуу жаран аты-жөнүн өзгөртүүнү сурап кайрылган. Фамилиясын алмаштыруу процедурасы КР мыйзамдарынын алкагында жүргүзүлгөн. Ал аты-жөнүн өзгөртүү тууралуу күбөлүктү алгандан кийин еID паспортун алмаштыруу үчүн Ош шаарындагы Калкты тейлөө борборуна кайрылган. Бирок аталган жаранга документ берүүгө тыюу салуу боюнча чечим бар болгондуктан, ага берүүдөн баш тартышкан”, — деп айтылат маалыматта.

Мамкаттоо укук коргоо органдары тарабынан жүргүзүлгөн иш-чаралардын алкагында Ош шаарындагы Калкты тейлөө борборлорунан жогоруда аталган паспорт алынганын белгилейт.

516
Белгилер:
фамилия, паспорт, Райымбек Матраимов
Тема:
Райым Матраимовдун кармалышы
Тема боюнча
Райым Матраимовдун кармалышы. Белгилүү болгон маалыматтар
Райым Матраимов кармалды

Бишкек мэри Азиз Суракматовдун маалымат жыйыны. Видео

57
(жаңыланган 14:35 20.10.2020)
Суракматов борбор калааны жетектөөгө мындан эки жыл мурун, 2018-жылы, киришип Албек Ибраимовдун ордуна келген.

Бишкек мэри болуп эки жылдан бери иштеп келе жаткан Азиз Суракматовдун кызматтан кете турганы тууралуу маалымат бүгүн тарады. 

Мэрия шаар башчысы маалымат жыйын өткөрө турганын кабарлаган. 

Sputnik жыйынды түз алып берүүдө

57
Белгилер:
отставка, кызмат, мэр, Бишкек мэриясы, Азиз Суракматов
Тема боюнча
Бишкек мэри Суракматовдун иштен кетери айтылды
Нариман Түлеев пресс-конференция учурунда

Нариман Түлеев Бишкек мэриясын жетектемей болду

0
(жаңыланган 14:59 20.10.2020)
Нариман Түлеев 2008-2010-жылдары борбор калаанын мэри болуп иштеген. Бүгүн эртең менен ал биринчи вице-мэр болуп дайындалды.

БИШКЕК, 20-окт. — Sputnik. Нариман Түлеев Бишкек мээринин милдетин аткармай болду.

Эске салсак, бүгүн, 20-октябрда, Түлеев биринчи вице-мэр болуп дайындалган. Кийинчерээк Суракматов мэрлик кызматтан кетип жатканын билдирген. Буга байланыштуу мэрдин милдетин Түлеев аткармай болду.

Белгилей кетсек, мэрди шаардык кеңеш шайлайт. Талапкерлерди фракциялар менен көпчүлүк коалиция, ошондой эле премьер-министр сунуштай алат.

Түлеевдин иши

Мурдагы мэр жана ЖКнын экс-депутатына 2012-жылы коррупция боюнча кине тагылган. Кылмыш иши Кытайдан автобустарды сатып алууда, ошондой эле 200 миллион сомдук муниципалдык облигация чыгарууда мыйзамсыз аракеттерден улам козголгон. 2013-жылы Ленин райондук соту мүлкүн конфискациялоо менен Түлеевди 11 жылга эркинен ажыраткан. 2014-жылдын декабрында Бишкек шаардык соту ал өкүмдү күчүндө калтырып, ал эми туура бир жылдан соң Жогорку соттун коллегиясы да ушундай эле өкүм чыгарган. Нариман Түлеев мамлекеттик казынага 60 миллион сом кайтарып берип, 2016-жылдын май айында эркиндикке чыккан.

0
Белгилер:
Бишкек, мэр, Нариман Түлеев
Тема боюнча
Бишкек мэри Азиз Суракматовдун маалымат жыйыны. Видео
Азиз Суракматов мэрлик кызматтан эмнеге кеткенин түшүндүрдү