Көлгө түшүп жаткан адамдар. Архив

Тамакка тоюп алып сүзбөйт! Сууга түшүү учурунда 10 "болбойт"

1141
(жаңыланган 19:26 27.07.2018)
Учурда элдин көбү Ысык-Көлдү көздөй агылып, калгандары калаа четиндеги көлдөрдө, бассейндерде эс алып жүргөн кездери. Бирок сууга түшүүдө да этияттабаса, кырсык каш-кабактын ортосунда эмеспи, көз ачып жумгуча суу адамдын өмүрүн алып коюшу ыктымал.

ӨКМдин берген маалыматына ылайык, жыл башынан бери өлкөдө 80 адам сууга чөгүп каза болуптур.

Кырсыктарды алдын алуу максатында Sputnik Кыргызстан агенттигине ӨКМдин Бишкек шаардык куткаруу кызматынын башчысы Мелис Назарбеков сууга түшүүдө эске алчу эрежелерди айтып берди.

Жаш балдарды кароосуз калтырбайт. Балдарды сууга түшүрүүдө алардын жанында көз салган ата-энеси же чоңураактар сөзсүз болушу керек. Суу жээгинде ойноп отурган бөбөктү да улам карап турбаса, көз ачып жумгуча аны таппай калышыңыз мүмкүн.

Алыс жакка жалгыз сүзүп барбайт.  Эрдемсинген айрым адамдар дардаңдап жалгыз алыска сүзүп кетет. Бул учурда кырсык болуп кетпейт деп эч ким кепилдик бере албайт. Тайыз жакка сүзгүсү келбей, анчалык эле кызыгып  бара жатса, жанына куткаруучу болбосо да жакшыраак сүзгөн шерик жандап алганы жакшы. "Сактыкта кордук жок" деген жакшы сөз бар.

Белгиленген чектен ашпайт. Куткаруучулар тарабынан коюлган атайын чектен ашып кетпеш керек. Белгиден өтүп кеткен адамдын өмүрүнө эч ким жоопкер эмес.  Чоңдорго 1,5 – 2 метрден терең жерге барууга тыюу салынат. Атайын белгилер – буйлар бар. Бирок айрым эс алуучулар алардан деле  өтүп кетип же минип алып ойногон учурлар кездешет.  Жыйынтыгы жаман болуп калышы ыктымал.

Суу жутпайт. Суу жутуп алган учурда адам дем ала албай чөгүп кетүүсү мүмкүн. Ошондой эле сүзүүгө да дарманы келбей калат. Ошондуктан суу астында сүзгөндө оозду бекем жабууну унутпаңыз.

Көпүрөдөн, тосмодон, кайыктан башы менен тик ылдый сууга секирбейт. Көлдүн  түбү кандай экенин билбеген, тааныш эмес жерлерден да абайлабаса, баш-көз жарылып жаракат алып калуу толук мүмкүн. Көл жээгиндеги пирстен секирүүдө дагы этият болуңуз.

Өсүмдүктөр жыш өскөн жерге түшпөйт. Суу алдына мындай  чөп-чарлуу жерден да абайлабаса, бутка илинип же оролуп калса адам чыга албай калышы мүмкүн.

"Жинди суудан" жутуп алып, сууга түшкөнгө таптакыр тыюу салынат. Анткени мас адам алыс кетип, сүзө албай калат. Акыркы учурда ичип алып чөгүп кеткен фактылар көп каттала баштады. Ошондой эле жүрөгү ооруган же ооруканадан жаңы эле чыккан адамдар да жакшы болгуча сууга түшпөй эле турганы оң.

Тамакка тоюп алып сууга түшпөйт. Жок дегенде 1-2 саат күтүп туруу керек.  Анткени сууга түшүп жатканда адамдын организминде өзгөчө курсак тушта кан айлануу ылдамдайт. Ич түйүлүп, сиңирүү системасына терс таасирин берет.

Моторлуу кайыктан оюн салганга болбойт. Айрым учурда жаш балдар өтүп бара жаткан катерден бири-бирине секирет. Бул да өтө кооптуу көрүнүш. Скутерлерди да 12 жаштан өйдө балдарга гана өз алдынча башкарууга жол берилет. Ошондой эле ал адамдардан алыс жүрүшү керек.

"Сууга чөктүм" деп тамашалап кыйкырбайт. Жакындарыңды минтип коркутпаш керек. Анткени кийичерээк кокустан чындап чөгүп жатсаңыз,  сизге эч ким ишенбей, маани бербей коюшу мүмкүн.

1141
Белгилер:
көл, куткаруу, кырсык, Суу
Тема:
"Болбойт" рубрикасы (83)
Тема боюнча
ӨКМ: Ысык-Көлдөгү 300 пансионаттын 80инде гана сертификаттуу куткаруучулар иштейт
Жекшемби күнү эле пансионаттардын аймагында 3 киши чөктү. Экөөнүн сөөгү табыла элек