Балыкчы шаарынын мэри Алмаз Мамбетовдун (ортодо) архивдик сүрөтү

Балыкчы мэри Мамбетовдун Facebook баракчасы талкаландыбы? Мэрия эмне дейт

(жаңыланган 10:21 15.08.2018)
Интернет колдонуучулар мэриянын маалымат кызматы бактарды кыюу боюнча сын билдирүүдөн кыйгап өткүсү келип жатканын жазышкан.

БИШКЕК, 14-авг. — Sputnik. Балыкчы шаарынын мэри Алмаз Мамбетовдун Facebook тармагындагы расмий аккаунту талкаланып, адепсиз сөздөр жазылгандыгы тууралуу билдирүү муниципалитеттин социалдык баракчасына жарыяланды.

Пост түндө жүктөлгөн.

"Урматтуу Facebook колдонуучулары, Балыкчы шаар мэринин расмий баракчасы талкаланды. Бактарды кыюуга байланыштуу билдирүүлөр менен комментарийлер фэйк тарабынан жазылган. Чагымчылыкты көздөгөндөргө ишенбегиле", — деп жазылган билдирүүдө.

Анткен менен Асель Асель аттуу Facebook колдонуучусу билдирүүнү жана буга чейинки жазылган постторду скриншот кылып, мэриянын маалымат катчысы окуядан кыйгап өткүсү келип жаткандыгын айткан. 

Скриншотто укук коргоочу Динара Ошурахунова бактарды кыюу боюнча пикирин жазганда, мэр Алмаз Мамбетов ага "ит үрө берет, кербен жүрө берет" деп жооп жазганы көрүнүп турат. Ошурахунова "бул мэриянын жообубу" деп сураганда, мэр "ошентип эсептей берсеңиз болот" деген.

"Мэриянын маалымат катчысы Алмаз Мамбетовду суудан кургак чыгарып кеткиси келип жатат. Алардын оюнда мэрдин аккаунту талкаланган. Анан укук коргоочу Динара Ошурхунова балалыгы өткөн Балыкчыдагы бактардын кыйылышына карата сын айтканда, ага фэйк аккаунттан орой жооп беришкен. Ой, ушул үчүнчү күчтөр, качан болсо баарына жек көрүндү болуп жүрүшөт", — деп жазган Асель Асель.

Sputnik Кыргызстан маалымат агенттиги Балыкчы мэриясынын маалымат катчысы Миргүл Жансеркеева менен байланышып, окуянын чоо-жайы тууралуу сураштырды.

Анын айтымында, мэр Алмаз Мамбетов учурда эмгек өргүүсүндө, социалдык тармактагы бактарга байланыштуу акыркы билдирүүлөрүн өзү жазбаганын айткан.

"Шаар башчысы жумушка кийинки жумаларда чыгат. Өзү социалдык тармакта активдүү эле. Биз кечээ байланышканда ал бактардын кыйылышы тууралуу орой комментарийлерди жазбаганын айтты. Ал болбосо ким? Телефонун эч ким деле албаптыр. Ошондуктан баракча талканган деген жыйынтыкка келдик. Ал жашоодо бетке айтып, ачык сүйлөшкөн жакшы адам. Кызматкерлерине сылык мамиле жасап, айланадагылардын сый-урматына ээ. Жасап жаткан ишке сынчы көп", — деди маалымат катчы.

Жансеркееванын билдиришинче, июль айынан бери Балыкчынын Аманбаев көчөсүнүн жолу толугу менен ремонттон өтүп жатат. Төрт тилкеден турган ири жол салынып, эки тарабы жарыктандырылат.

"Кара жыгач багы жолду кеңейтүү максатында кыйылууда. Бактар деле карып калган, убагы келгенде жаңысы тигилет. Иш баштаарда жергиликтүү эл менен жыйын өткөрүп, кеңешкенбиз. Жолдун узундугу эки чакырым, ал жүк ташуучу айланма жол болот", — деди Жансеркеева.

Ошондой эле маалымат катчы жол кайсыл убакта бүтөрү азырынча белгисиз экендигин кошумчалады.

Белгилер:
Чыр-чатак, пост, мэр, Facebook, Алмаз Мамбетов, Балыкчы
Тема боюнча
Премьер Азиз Суракматовду мэриянын жамаатына тааныштырды. Сүрөт
Арыз уксам, бир мүнөттө кетесиңер! Ош мэринин дарыгерлерди сындаган видеосу
Кыргыз-Түрк Манас университетинин экологиялык инженерия бөлүмүнүн профессору, техника илимдеринин доктору Канатбек Кожобаев

Кожобаев: экологияны коргоодо калдыксыз технологияны колдонуу зарыл

Кыргыз-Түрк "Манас" университетинин экологиялык инженерия бөлүмүнүн профессору, техника илимдеринин доктору Канатбек Кожобаев экологияны коргоп кантип экономикага салым кошсо болорун айтып берди.
Кожобаев: экологияны коргоодо калдыксыз технологияны колдонуу зарыл

Желим баштык, бөтөлкө жана пластмасса буюмдарын кайра иштетүү, тамак-аш калдыктарын органикалык жер семирткичтерге алмаштыруу — учурдун талабы. Мындай пикирин Канатбек Кожобаев Sputnik Кыргызстан радиосунун эфиринде маек куруп жатып билдирди.

Анын айтымында, экологиялык сабаттуулукту жогорулатууда алгач адамдардын аң-сезимин көтөрүп, маалыматтын жеткиликтүүлүгүнө маани берүү керек.

"Экологияны коргоодо жана экономиканы өнүктүрүүдө калдыксыз технологияга өтүш керек. Бул оңой эле ишке ашат. Адамдардын аң-сезимин өзгөртүү аркылуу экологиялык сабаттуулукту жогорулатуу зарыл. Желим баштык, бөтөлкө жана пластмасса буюмдарын кайра иштетүүгө, тамак-аш калдыктарын органикалык жер семирткичтерге алмаштыруу, биогаз чыгаруу — учурдун талабы. Мындай технологияны айыл жерлеринде көп колдонуш керек. Демилгени мамлекет колдоп берсе, жылыш жакшы болот эле. Элди ушундай пайдалуу ишке кызыктыруу зарыл", — деди Кожобаев.

Ошондой эле профессор экономика өнүккөн жерде экология зыянга учурап, бири-бирине каршы чыккан учурлар көп болорун кошумчалады.

Белгилер:
Канатбек Кожобаев, Технологиялар, экономика, экология
Тема боюнча
Донбаева: жайытты туура эмес пайдалануу тоолордун экосистемасын бузат
Юридикалык клиникалар ассоциациясынын жетекчиси, илимдин кандидаты Артур Бакиров

Бакиров: үч же андан көп балага кирешенин 50%ы алимент катары төлөнөт

(жаңыланган 11:19 23.04.2021)
Юридикалык клиникалар ассоциациясынын жетекчиси, илимдин кандидаты Артур Бакиров алимент төлөө кандайча аныктала турганын айтып берди.

Жубайлар ажырашып кеткен учурда ортодо үч же андан көп бала болсо атанын же эненин тапкан кирешесинин 50 пайызы алимент катары төлөнөт. Бул тууралуу Артур Бакиров Sputnik Кыргызстан радиосунун "Онлайн адвокат" рубрикасында билдирди.

Бакиров: үч же андан көп балага кирешенин 50%ы алимент катары төлөнөт

Анын айтымында, үлүштүн өлчөмү тараптардын материалдык, үй-бүлөлүк абалын же көңүлгө алынуучу жагдайларын эске алуу менен сот аркылуу аныкталат.

"Ата-эне өздөрүнүн жашы жетпеген балдарын багууга милдеттүү. Анын тартиби Кыргызстандын Үй-бүлө кодексинин 85-беренесине ылайык, ата-эне тарабынан аныкталат. Жашы жетпеген балдарды багууга каражат берилбесе, сот тарабынан өндүрүлөт. Бир балага ата-эненин кирешесинин төрттөн бири, эки балага үчтөн бири, ал эми үч же андан көп бала болсо, тапканынын жарымы бөлүнөт. Алименттин орду жагдайга жараша азык-түлүк менен да толтурулушу ыктымал. Ата-эненин кирешесинин жоктугу аларды алимент төлөө милдетинен бошотпойт. Кыймылсыз же кыймылдуу мүлктү менчигине өткөрүп берип, алименттин белгилүү бир суммасынан кутулушу керек", — деди Бакиров.

Юрист ата же эне жашы жеткен, бирок эмгекке жөндөмсүз, кайсы бир дартына байланыштуу жардамга муктаж балдарга жардам берүүгө милдеттүү экенин кошумчалады.

Белгилер:
ата-эне, алименты, юрист, Артур Бакиров
Тема боюнча
Документи жок мүлк жубайлар ажырашканда кантип бөлүнөт? Юристтин кеңеши