Борьба с пьянством за рулем в КР

Мас айдоочулар катуу жазаланбай калабы? Жаңы мыйзамдагы карама-каршылыктар

380
(жаңыланган 00:38 12.01.2019)
Кыргызстанда жыл башынан тарта Эреже бузуулар боюнча кодекс күчүнө кирди. Анда каралган айып пулдардын көлөмү коомдо бир топ талкуу жаратты. Бирок мыйзамдын аткарылышын аны токугандар менен аткаруучулар эки башка чечмелегени көйгөй жаратууда.

БИШКЕК, 11-янв. — Sputnik. Түкүрүү үчүн каралган айып пул эл арасында бир топ эле ызы-чуу жаратты. Бирок жыл башынан тарта күчүнө кирген Эреже бузуу боюнча кодексте талаш жараткан бир топ нерсе бар. Алардын бири — "Мас абалында автотранспорт башкаруу" каралган 128-берене. Анын биринчи пунктунда мас абалындагы айдоочуга 17 500 сом айып каралган, ал эми юридикалык жактарга 55 миң сом салынат.

Баары эле түшүнүктүү болгону менен үчүнчү пунктуга келгенде көйгөй жаралат. Анда мас экенин текшертүүдөн баш тарткан жеке тараптар 5500 сом айыпка жыгылса, юридикалык жактар 17 миң сом айып төлөшү керек.

Жаңы кодекс менен таанышкан мекендештер үчүн түшүнүксүз нерсе арбын. Алар мас болгон айдоочу экспертизадан баш тартып, ал үчүн каралган айып пулду төлөп коюп эле машинасын андан ары айдап кете бере алабы деп суроо салышууда.

Машинанын катуу ылдамдыкта айдоо жөнүндөгү макаладагыдай эки ача ойлор бул маселеде да бар экенин Sputnik Кыргызстан агенттигинин кабарчысы тактады.

Сот реформасы тармагындагы жаңы сот далилдерин мониторинг жасоо боюнча жумушчу топтун мүчөсү Ирина Летова текшерүүдөн баш тарткан айдоочу эки айып пулду тең төлөй турганын, анткени ал мындай кадамы менен мас экенин моюндап жатканын түшүндүрдү.

"Эгер сиз текшерүүдөн баш тартып жатсаңыз, мас экениңизди дароо моюнга алып жатпайсызбы. 5500 сом айыптан тышкары сизге биринчи пункт боюнча — мас абалында автоунаа айдаганыңыз үчүн да айып пул салынат. Андыктан сиз машинаны андан ары айдап кете албайсыз", — деди ал.

Бирок аткаруучу органдар Эреже бузуу боюнча кодекстин аталган беренесинде түшүнбөстүктөр бар экенин айтышууда.

"Беренеде айдоочунун текшерүүдөн өтүүдөн баш тартуусу мас экенин моюнга алганын ырастайт деп так жазылышы керек. Ошондой эле эки пункт боюнча каралган айыптар кошулат деп жазыш керек болчу. Азыр бизде эки протокол түзүп, кош айып салганга мыйзамдуу негиз жок. Мыйзам бузган киши экспертизадан баш тартканы ал үчүн жакшы болуп жатпайбы", — деп ишенимдүү булак билдирди.

Бул маселени кароого укуктуу болгон орган Ички иштер министрлиги учурда "Эреже бузуу боюнча кодекске кошумча менен өзгөртүүлөрдү киргизүү жөнүндө" сунушту иштеп чыкканын маалымдады. Анда негизги басым "Мас абалында автоунаа айдоо жөнүндөгү" беренеге жасалган.

"Эреже бузуу боюнча кодексти карап чыгып ИИМ бир катар кемчиликтерди аныктап, өзүнүн сунушун Жогорку Кеңешке жөнөттү. Эми ал бекитилиши керек. Сунушталган толуктоодо айдоочунун текшерүүдөн өтүүдөн баш тартуусу анын мас экенин моюндаганга жатат деген пункт киргизилди", — деди булак.

Алар ошондой эле мыйзамды аткаруучулар иштей турган механизмдер так көрсөтүлбөгөнүн белгилешти. Кызматкерлердин кандай аракеттерди көрүүсү керектиги жазылган эмес жана жарандардын кодексти жакшылап түшүнүүсү боюнча түшүндүрмө берилген жок.

Бул нерсе жаңы мыйзамдагы биринчи алешемдик эмес. Мисалы, Бишкек мэриясы коомдук жайларда жерге түкүргөн кишилерди кандай жол менен жоопко тартарын билбей келет

380
Белгилер:
айып, милиция, мас, Эреже бузуу жөнүндөгү кодекс
Тема боюнча
Бишкекте шаардыктарды тез ташыган метробустар ишке кирет
Оңолот деген ушу! Түкүрүү үчүн колуна чака көтөрүп алган жигиттин видеосу