Эркек адам. Архив

Биринчи аялыма батынып бара албай жүрөм... Айласы куруган эркектин тагдыры

13232
(жаңыланган 11:23 21.01.2019)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасынын бул жолку чыгарылышында биринчи аялына батынып бара албай жүргөн эркектин каты жарыяланды.

Өткөн ишке өкүнүп жүргөн кезим…

Жашым 45ке таяп калды. 24 жашымда шаардык кызга ашык болуп, экөөбүз сүйлөшүп жүрүп баш коштук. Ал кезде келинчегим 19 жашта болчу. Шаарда өсүп-чоңойгон менен айылда калабыз десем макул болуп, элеттин турмушун бат эле өздөштүрүп кетти. Дос-тааныштарымдын баары экөөбүзгө суктана берчү. 9 жыл жашадык. Бирок балалуу боло алган жокпуз.

Ортодо бала болбосо, майда-барат нерсе үчүн уруш-талаш чыга берет экен. Анын үстүнө апам каардуу киши болчу. Мага көрсөтүп-көрсөтпөй бир топ эле жаман мамиле жасачу экен. Ошентип болор-болбос турмуштук жагдайлардан улам келинчегим кетип калды.

"Кетсе келет, кайда бармак эле" деп ата-энемдин тилине кирип артынан барбай койгом. Намыстандым, кайдыгер мамиле кылып коюптурмун… Бирок анын эмне кылып, кандай жашап жатканын дос-тааныштар аркылуу билип турчумун.

19 жашында күйөөгө кеткени менен келин кезинде шаардан окуусун бүтүргөн. Өз кесиби боюнча жакшы жумушка орношконун уктум.

Убакыт өткөн соң башка аялга баш коштум. Бирок аны менен да жолум болгон жок, ал дагы төрөй албай ажырашып кеттик.

Азыр болсо оюман биринчи келинчегим кетпейт, өткөн ишке өкүнөм, ата-энемди күнөөлөйм. Бирок батынып бара албай жүрөм. Ошондо бирөө мага туура кеңешин бергенде мындай кырдаал жаралбайт беле? Эмичи? Ал катамды оңдой аламбы?

Азыр мурдагыдан дагы жакшы жумушта иштеп жатыптыр. Турмушка чыкпаптыр. Акча таап калганда артыман келди деп айтпасын деп барбай жүрөм. Азыр барып кечирим сурасам, кечиреби? Барганым туурабы же жаңы баштаган жашоосуна аралашпай эле койгонум дуруспу?

Барган күндө дагы ал мени кабыл албай койсочу? Суроолорума жооп таба албай кыйналдым…

Психолог Асел Сүйүнбаеванын жообу:

Адамга өмүр бир эле берилет эмеспи. Ал өмүрдү туура жашап, эч кимге залакаңды тийгизбей, бактылуу болуп жашоого далалат кылуу керек. Жалгыз өзүн эмес, башкаларды да бактылуу кылып жашаганга эмне жетсин. Айрыкча эркектер бирөөнүн кызын бактылуу кылам деп сөз берип алгандан кийин айткан сөзгө туруш керек.

Кечиримдүүлүк эң жакшы сапат. Кайрылган киши "барсамбы" же "барбасамбы" деп ойлонуп отура бербей, чыгынып барышы керек. 45ке чыккычакты эле аялынын артынан барышы зарыл болчу, бирок азыр деле кеч эмес. Балким, биринчи жубайы деле "качандыр бир кезде келер" деп күтүп жаткандыр…

Андай болбой калышы да ыктымал, жашоосунда жаңы адам пайда болуп, күтпөй деле калышы мүмкүн. Бирок кандай болгон учурда да, кабыл алса да, албаса да бир барып көрүшү керек.

Жөн гана ал-абалын сурап барып учурашып келсин. Жолугууга мүмкүн болуп калса, сезимдерин айтып, кечирим сураганга да даяр болсун.

Жок дегенде 45 жашка чыкканда чечкиндүү болуп, ата-апасы жок өзү чечим кабыл алышы керек да.

Коркуп же намыстанып отура бергенден маселе чечилбейт. Жолугуп, сүйлөшүүдө баары ачыкталат. Аялы аны менен жашагысы келген-келбегени, ага болгон сезимдери ошол жолугушууда эле билинет. Дароо эле "кайрадан турмуш баштайлы" деп эмес, жөн гана ал-абалын сураш үчүн барганы дурус.

Негизи эле бала ата-энени сыйлаш керек, бирок аларга өтө эле көз каранды болгону туура эмес. Аялы менен ата-эне эмес, өзү жашайт. Кандай болгон күндө да эгер аялын жакшы көрсө, аны менен жашай аларына көзү жетсе, ата-энени деле көндүрсө болот. Убагында барбай койгону үчүн бул кишинин ата-энеси эмес, өзү күнөөлүү. Чечкиндүү болсо, аларды алдап-сооласа да алып келмек да келинди. Ошондой эле үйдө эркек киши, атасы активдүү болбосо, көпчүлүк балдар апасынын баласы болуп калышат.

Кайрылган кишиге кеңеш: ойлонуп отура бербей, бүгүн, азыр чыгынып барыңыз!

13232
Белгилер:
психолог, келин, кечирим, жеке жашоо
Тема:
Психолог менен баарлашуу (166)
Тема боюнча
Эч нерсе сезбейм... Күйөөсүнө "ыраазы болбогон" аялдын бугу
Экинчи аялым менен колунда бар үчүн жашап жүрөм... Ара жолдо калган эркек
Мектептеги карантин. Архив

Коронавирустан улам Бишкектеги мектептерде 13 класс жабылды. Тизме

28
(жаңыланган 18:47 27.09.2021)
Жалпысынан 13 класс убактылуу карантинге жабылган. Мэрия ата-энелерден ооруган балдарды мектеп, бала бакчага жибербей коё турууну суранды.

БИШКЕК, 27-сен. — Sputnik. Бишкектин кээ бир мектептеринде окуучулардан коронавирус аныкталгандыгына байланыштуу айрым класстар жабылды. Бул тууралуу мэриянын маалымат кызматы кабарлады.

Билдирмеге караганда, жалпысынан 13 класс убактылуу карантинге жабылган.

Биринчи май району:

  • №48 орто мектебинде бир класс, №70 мектепте бир класс;

Ленин району:

  • №9 мектепте эки класс, №13 мектепте бир класс, №8 мектепте бир класс;

Свердлов району:

  • №11 мектепте бир класс, №38 мектепте бир класс, №4 мектепте үч класс, №65 орто мектебинде бир класс, №66 мектепте бир класс.

Мэрия бекитилген алгоритм боюнча кайсы мектептин окуучуларында коронавирус аныктала турган болсо, класстар жабыларын эскертти.

"Урматтуу ата-энелер, эгер балаңыз ооруп кала турган болсо, аны мектепке же бала бакчага жибербей коё туруңуз. Анткени бала башкаларга да жугузуп, вирусту жайылтышы ыктымал", — деп айтылат маалыматта.

Жабылган класстардын окуучулары аралыктан окуп турары кошумчаланды.

28
Белгилер:
Бишкек мэриясы, коронавирус, окуучу
Тема:
Кыргызстандагы коронавирус
Тема боюнча
Вакцина алган энелердин карынында жаткан балдардан антитело табылды
Көмүр түшүрүп жаткан жумушчу. Архив

Быйыл көмүрдүн баасы кандай болот? Кара алтындын наркына сереп

93
(жаңыланган 17:49 27.09.2021)
Синоптиктер аптанын аягында күн сууктай турганын божомолдоодо. Аба ырайы бузулары менен турак үйдө тургандар арасында көмүргө болгон суроо-талап өсөт.

Быйыл азык-түлүктөн тарта күйүүчү майга чейин кымбаттады. Мунун баары көмүрдүн баасына таасир этпейби? Кара алтындын баасы канча болот, кору жетиштүүбү? Sputnik Кыргызстан маалымат агенттиги ушул жана башка суроолорго жооп алып, көмүрдүн наркы, запасына сереп салды.

Бишкек шаарындагы көмүр саткан ишкерлердин айтымында, азырынча ордо калаага Кара-Кеченин көмүрү келе элек. Учурда шаарда Казакстандын Кара-Жыра, Шабыркүл көмүрлөрү эле сатылууда. Алардын бир тоннасы 4 800 сомго бааланып жатканы маалым болду.

"Кыргыз көмүр" мамлекеттик ишканасынын директорунун орун басары Надырбек Бекжанов былтыркы жылга салыштырмалуу быйыл көмүр казуу иштери бир аз кечигип жатканын айтып, себебин түшүндүрдү.

"Каражаттын жетишсиздигинен, жайында тоолуу райондорго эки ай тынбай жамгыр, кар да жаагандыктан көмүр кеч казылып калды. Анын үстүнө буга күйүүчү май, тетиктердин кымбатташы да себеп болду. Ага карабай көмүр казуу иштери уланып жатат. Тилекке каршы, көмүрдүн кесегин аныктай албагандыктан, казылган көмүрлөр бир аз майда болууда", — деди Бекжанов.

Анткен менен быйыл өлкөдө көмүр жетиштүү болору белгиленди. Бекжановдун айтымында, жылдан-жылга көмүр көп казылып, жалпысынан өлкөдө кара алтындын алты миллиард тонна запасы бар.

"Бул жылы үч миллион тоннадан ашык көмүр керектелиши күтүлүүдө. Анын ичинен 1 миллион 150 миң тоннасы элге берилсе, 250 миң тонна бюджеттик мекемелерге жумшалат. Калганы ТЭЦке жумшалат", — деди Бекжанов.

Ал учурда ТЭЦти көмүр менен камсыздоо иши жүрүп жатканын айтып, көмүр элге жана бюджеттик мекемелерге 1-октябрдан тарта бериле баштаарын кошумчалады.

"Быйыл күйүүчү майдын жана техникалык каражаттардын кымбаттаганы көмүрдүн баасына да таасирин тийгизбей койбойт. Карьерден чыккан 1 тонна көмүрдүн баасы Монополияга каршы жөнгө салуу мамлекеттик агенттиги тарабынан 1 330 сом деп белгиленди. Статистикалык маалымат боюнча, кара алтындын бир тоннасы Нарында 2 500 сомдон 4000 сомго чейин, Чүй өрөөнүндө 4500-4700 сом, Ысык-Көлдө 5000 сомго чейин чыгат. Ал эми өлкөнүн түштүк аймагында 7000-8000 сомго сатылары божомолдонууда", — деди ал.

Монополияны жөнгө салуу мамлекеттик агенттигинин билдирмеси боюнча, быйыл жергиликтүү көмүрдүн бир тоннасынын наркы 3 620 сомдон 6 500 сомго чейин болмокчу. Мунун ичинде Кара-Кече, Сүлүктү, Таш-Көмүр, Кызыл-Кыя көмүрү бар.

Ал эми сырттан келген көмүрдүн (Казакстан) бир тоннасы 5000-7000 сомду түзөт. "Кыргыз көмүр" ишканасы азыркы учурда Кыргызстанга Казакстандан көмүрдүн Кара-Жыра, Шабыркүл деген түрлөрү аз-аздан келип жатканын айтып, бирок Казакстан ички керектөөсүн толук камсыздап алмайынча, канча тонна көмүр келери белгисиз экенин кошумчалады.

Эскерте кетсек, өлкөдө көмүрдүн сатыла турган баасын (карьерден чыкканын гана белгилейт — ред.) бир дагы мамлекеттик орган бекитпейт. Монополияга каршы жөнгө салуу мамлекеттик агенттиги көмүрдүн баасы чектен ашып сатылып жаткан күндө гана өкмөттүн токтому менен көзөмөлгө алат.

Былтыр Бишкекте Кара-Кече көмүрүнүн баасы 3700дөн 4200 сомго чейин сатылса, Казакстандын Кара-Жыра, Шабыркүл көмүрлөрүнүн баасы 4000 сомдон ашкан.

93
Белгилер:
көмүр, баалар, Кыргызкөмүр мамлекеттик ишканасы
Тема боюнча
Кулжыгачов: Бишкек ЖЭБи күзгү-кышкы жылытуу мезгилине даяр
Кышка даярдык башталды. Бишкек менен Чүйдө электр чубалгылары оңдолот. Сүрөт