Курал-жарак. Архивдик сүрөт

Кыргызстанда ушул кезге чейин канча курал-жарак белекке берилгени айтылды

207
(жаңыланган 00:35 14.02.2019)
Ички иштер министринин орун басарынын айтымында, акыркы 2-3 жылда президент, премьер-министр жана төрага тарабынан да берилген.

БИШКЕК, 13-фев. — Sputnik. Кыргызстан боюнча бүгүнкү күнгө чейин 1521 даана курал-жарак белекке берилгенин ички иштер министринин орун басары Алмаз Орозалиев парламенттин жыйынында депутаттардын суроосуна жооп берип жатып айтты.

Депутат Дастан Бекешев акыркы 2-3 жылда президент, премьер-министр жана төрага тарабынан курал-жарак белекке берилгенби деп суроо салды.

Өз кезегинде Орозалиев берилгенин ырастады.

"Ооба, берилген. Бизде 2011-жылдан берки статистикалык маалымат бар. Бирок мен аны айта албайм, сизге кат түрүндө жооп берели", — деди министрдин орун басары.

Орозалиев ошондой эле акыркы эки жылда элден чогултулган курал-жарактар тууралуу маалымат берди. 2017-жылы 399 курал-жарак алынса, анын 196сын жарандар өз ыктыяры менен тапшырган. Ал эми 2018-жылы 296 курал алынып, 232син кишилер өз ыктыяры менен өткөрүп берген.

Депутат Бекешев өз ыктыяры менен курал-жарак тапшыргандарга сый акы каралган-каралбаганына кызыкты.

Ички иштер министринин орун басары Орозалиев азырынча эч кандай сый акы берилбей турганын, бирок өкмөттүн токтом долбоору иштелип жатканын айтты. Ага ылайык, автомат үчүн 9600 сом, тапанчага 6400 сом, травматикалык куралга 3200 жана колго жасалган мылтыктар үчүн 1600 сом каралган.

Ал ошондой эле өз ыктыяры менен тапшырылган курал-жарактар эгер колдонууга жарактуу болсо ИИМдин атайын комиссиясы карап чыгып, комиссиялык дүкөндөр аркылуу сатыларын айтты. Ал эми туура келбегендери жок кылынат.

207
Белгилер:
белек, курал-жарак, Дастан Бекешев, Кыргызстан
Тема боюнча
Апрель окуясында 865 курал уурдалган. Сандар, акыркы маалыматтар