Курал жаркатар. Архив

Элдеги курал-жаракты базар баасында сатып алуу сунушталды

151
(жаңыланган 00:35 14.02.2019)
Ички иштер министринин орун басары Алмаз Орозалиевдин айтымында, 2010-жылдагы окуяларда 1190 курал-жарак уурдалып, жоголгон.

БИШКЕК, 13-фев. — Sputnik. Жогорку Кеңештин депутаты Акылбек Жапаров парламенттин жалпы жыйынында 2010-жылы жоголгон курал-жарактарды кайтаргандарга базар баасындагыдай акча төлөп берүүнү сунуштады. Ал үчүн каражатты президенттин, премьердин жана төраганын резервдик фондусунан бөлүү керектигин билдирди.

Ички иштер министринин орун басары Алмаз Орозалиевдин айтымында, 2010-жылдагы окуяларда 1190 курал-жарак уурдалып, жоголгон. Учурда алардын 557си кайтарылды, калган 633 даана курал колдо.

Бүгүн депутаттар "Курал жөнүндө" КР мыйзамына өзгөртүүлөрдү киргизүү тууралуу" мыйзамдын долбоорун карап жатышат. Ал биринчи окууга киргизилет.

Депутат Жапаров базар баасындагыдай акча сунуштаганда гана кишилер да таап алган же катып койгон мылтыктарын активдүү тапшырарын белгиледи.

"Эгерде таап алдым деп патрон, мылтык, автомат же пистолот алып келген кишиге анын наркын базар баасындай коюп берүүнү өтүнөт элем. Буга кандай карайсыздар?" — деп министрдин орун басарына кайрылды.

Өз кезегенди Орозалиев ИИМ мергенчилик дүкөндөрдө сатылып жаткан гана куралдарды баалай аларын, ал эми аскерий куралдардын баасын аныктай албасын билдирди.

Эл өкүлү Жапаров "алдап жатат окшойсуңар, капитализмде жашап жаткандыктан ар бир нерсенин баасы бар да" деди.

"2010-жылдан бери 600дөн ашык курал-жарак кайта алына элек деп жатабыз. Ошону сатып алалы деп мен финансы министри болуп турганда да сунуш бергенде ИИМ каршы чыккан. Акчасын таап берели, спикердин, премьердин, президенттин резервдик фондусу бар. Акчасын дароо бөлүп берели, элге жарыялап туруп ошонун баарын чогулталы. Каржы булагын таап берели деп жатсак, сиз баасын таба албайбыз дейсиз, бул кандай? ИИМдин позициясын түшүнбөйм", — деди депутат.

Министрдин орун басары эгерде ошондой шарт болсо, алар колдой турганын билдирди.

Жапаров өз кезегинде бул боюнча керек болсо республикалык бюджетке өзгөртүү киргизүүнү да карап көрсө болорун кошумчалады.

151
Белгилер:
сый акы, курал-жарак, Акылбек Жапаров, Жогорку Кеңеш
Тема боюнча
Кыргызстанда ушул кезге чейин канча курал-жарак белекке берилгени айтылды
Апрель окуясында 865 курал уурдалган. Сандар, акыркы маалыматтар