БИШКЕК, 15-фев.— Sputnik. Баланы 1-класска киргизүүдө электрондук кезекке туруу сайты иштебей жатканын Sputnik Кыргызстан агенттигине окурмандар кабарлады.
Буга чейин 15-февралдан тарта "Бишкек шаарынын мектептерине электрондук кезекке туруу" пилоттук долбоору иштей турганы айтылган.
Бирок www.mektep.edu.gov.kg сайты учурда балдарды мектепке каттабай жатат. Жогорудагы даректен "сайт жакынкы саатта иштеп баштайт" деген жазууну көрүүгө болот. Сайтты иштеп чыккандардын бири, IT-адис Төлөгөн Наматовдун айтымында, электрондук каттоо эртең менен жакшы эле иштеп жаткан.
"Бүгүн бизге бир катар микроучастоктордун тизмеси келип түштү, аларсыз көпчүлүк жарандар өздөрүнүн дарегин таппай калышы мүмүкүн. Буга байланыштуу тизмени жаңылап жатабыз", — деди Наматов.
"Бишкек шаарынын мектептерине электрондук кезекке туруу" — Билим берүү жана илим министрлиги, ЮНИСЕФ уюму жана мэриянын билим берүү башкармалыгынын биргелешкен пилоттук долбоору. Анда 2019-2020-окуу жылынын башында Бишкек шаарынын мектептерине балдарын 1-класска бере турган ата-энелердин бардыгы милдеттүү түрдө электрондук кезекке турушу зарыл. Башкача айтканда, электрондук кезекке турбаган бала мектепке кабыл алынбайт.
