БИШКЕК, 4-апр. — Sputnik. Бишкектин Биринчи Май райондук сотунда жаңы төрөлгөн ымыркайларды саткан, мыйзамсыз аборт жасаган жана документ жасалмалаган деп айыпталган гинекологдордун кезектеги процесси өттү.

Эмнеден башталды эле?

2018-жылдын 7-сентярында бала сатууга жана мыйзамсыз аборт жасоого шектелип бир нече гинеколог кармалган. Жалпысынан сегиз дарыгер айыпталганы маалым. Sputnik Кыргызстан агенттигинин укук коргоо органдарындагы өздүк булактарынын маалыматы боюнча күнөөлөнгөндөрдүн үчөө №1 жана 18 үй-бүлөлүк медицина борборунда жана №4 төрөт үйүндө иштегендер болуп чыккан.

Кармалгандарга Кылмыш жаза кодексинин 124 ("Адам сатуу"), 116 ("Мыйзамсыз аборт кылуу") жана 350-беренелери ("Жасалма документтерди даярдоо, колдонуу") боюнча үч кылмыш иши козголгон. Тергөө көрсөткөндөй, бардык сатып алуучулар Кыргызстанда жашап жүрүп кийин Россиянын жарандыгын алгандар.

Ымыркайлар 3000 долларга сатылган

Буга чейин М.Ш. аттуу күбөлөрдүн бири сотто Э. М. аттуу чала тааныш аял башында уул баланы багып алууну сунуштап, кийин аны 3 миң долларга сатканын, ал "Орто-Сай" базарында сатуучу болуп иштей турганын айткан.

"Жанымдагы контейнерде ымыркайлардын кийимин сатышчу. Бир күнү эле ал жакта иштеген аялдын Э.М. деген кызы жумушка чыгып калды. Аны менен сүйлөшүп калып көп жылдардан бери боюнда болбой кыйналып жүргөн туугандарым бала асырап алууну пландап жатышканын айттым. Андан кийин башка нерселер тууралуу сүйлөшүп калдык", — деди күбө.

М.Ш. аттуу аялдын айтымында, бир нече күндөн кийин Э.М. телефон чалып, бала асырап алуу тууралуу сүйлөшүү болгонун эстетип, уул баланы 3 миң долларга сатып алууну сунуштаган. Бала сатып алууну каалаган адамдар дароо макул болушкан. Күбө ошондой эле Э.М. менен шаардагы кичирайондордун биринде жолугушуп, ал баланы жана андан баш тартуу тууралуу катты алып келип бергенин айтты. Дарыгерлерге болсо акча бир нече күндөн кийин берилген.

Кечээки отурумда "бала асырап алган" В.К. сотко он жылдан ашык мезгилден бери балалуу боло албай, жолдошу менен ажырашып кеткендигин дагы айткан. Ал узак убакыт Бишкекте дарыланып, андан соң чет өлкөгө иштегени чыгып, Россиянын жарандыгын алган. Келин 2016-жылы Кыргызстанга кайра дарыланууну улантуу үчүн кайтып келген. Бирок майнап чыккан эмес. Ошондо ал бала асырап алууну пландап, агасына айткан. Ал келинчегинин тууганы М.Ш. менен ушул тууралуу сүйлөшкөн.

"Мага баланы сата турган таанышымдын дарыгери бар деп кабарлашты, мен макул болдум. Ошондо 3000 доллар керек дешти. Мен эч нерсени сурабастан бердим. Акчаны сүйүнчү деп ойлогом. Баланы айылга алып кеттип, ата-энеме көрсөттүк. Аны мен мыйзамдаштырып туулгандыгы тууралуу күбөлүк алышым керек болгон. Консулдукка келип врач берген документтерди тапшыргам. Кийин мага чалып даяр болду дешти. Ал жакка келгенде милиционерлер мени кармашты ", — деди В.К.

Бала сатуу боюнча дагы бир факт

Бишкектеги №1 үй-бүлөлүк медициналык борборунун акушер-гинекологунун иши боюнча дагы бир Ж.О. аттуу күбө сотко балалуу боло албай жаткан бир бейтапка жардам берип кесиптешине алып келгендигин билдирди.

"2014-жылдан бери менде бир келин көзөмөлдөн өтүп жүргөн. Ал үч жолу көз жарып, бирок балдары оорудан улам чарчап калып жаткан. Акыркы баласы чарчап калганда кайра-кайра телефон чалып, жумушка көп келе баштаган. Бала таап берүүнү суранды. Анда мен ага балдар үйүнө кайрылуусун сунуштадым. Келин ал жакта узун кезек бар экенин жана балдар оорулуу болушу мүмкүн экенин айткан", — деди ал.

Кийин алар жолугушуп бала таап беришкен. Ымыркай канчага жана кандай шарттарда сатылганы белгисиз.

Мындан сырткары, Э.Ч. камакка алынган дарыгерлердин бири. Бирок ал белгисиз себептер менен үй камагына чыгарылган. Ошондой эле ал мурдагы жетекчиси менен соттошууда.

БИШКЕК, 20-апр. — Sputnik. Кара-Балтада белгисиз адамдар автоунааны аткылап кетишти. Бул тууралуу Чүй облустук ИИББден билдиришти.

Бүгүн, 20-апрелде, саат 08:00дөр чамасында Жайыл райондук ички иштер бөлүмүнө Б.Н. аттуу жарандын короодо токтоп турган унаасын белгисиз адамдар аткылап кеткени боюнча маалымат түшкөн. Жерине барган милиция кызматкерлерине 45 жаштагы Б.Н. түнкү саат 03:30дар чамасында катуу үн угуп, бирок маани бербегенин, эртең менен унаасын көргөндөн кийин гана милицияга кабарлаганын айткан. Toyota Camry үлгүсүндөгү унаага эки ирет ок чыгарылган.

Факт боюнча Кылмыш-жаза кодексинин 266-беренеси ("Бейбаштык") менен иш козголду. Тергөөнү ИИМ менен ИИББ жетекчилери көзөмөлдөөдө.

"Окуяга эмне себептен милициянын жетекчилиги көңүлүн бурду" деген суроого ИИББдин маалымат кызматы буга ок атуучу куралдын колдонулганы себеп болгонун билдирди.

ЖМКлардын маалыматына караганда, автоунааны саясий партиялардын биринин лидери аткылап кеткен. Айрым маалыматтар боюнча, кеп "Элдик-Народная" партиясын жетектеген Назми Бадалова жөнүндө болуп жатат.