Суу алып жаткан кыз. Архив

Үйдө суу жылыткыч болсо, ичүүчү суунун тарифи кымбаттайбы? Мекеменин жообу

245
(жаңыланган 18:43 07.04.2019)
Буга чейин Facebook баракчасындагы белгилүү бир тайпага колдонуучулардын бири үйүндө суу ысыткычы барлар ичүүчү сууга көбүрөөк акы төлөй турганын жазган.

БИШКЕК, 7-апр. — Sputnik. "Бишкексууканал" ишканасы ичүүчү суунун тарифи көтөрүлбөй эле турганын айтты.

Буга чейин Facebook баракчасындагы белгилүү бир тайпага колдонуучулардын бири үйүндө суу ысыткычы (бойлер) барлар ичүүчү сууга көбүрөөк акы төлөй турганын жазган.

"Бүгүн "Бишкексууканал" ишканасынын кызматкерлери келип, суу жылыткычы бар үйлөрдү тизмеге алып жүрүшкөнүн айтышты. Эми кимдин жашаган жеринде бойлер болсо, алар ичүүчү сууга көбүрөөк акча төлөп калышат экен. Мага эки сомдон көп деп айтышты. Мына сага салык жана комфорт. Кызык, менин үйүмдө аба тазалагыч да бар, эми таза аба үчүн да акы төлөй баштайбызбы?" — деп жазган колдонуучу.

"Бишкексууканал" ишканасынын маалымат кызматы өкмөттүн "Ичүүчү сууну колдонуу нормасы боюнча" токтому бар экенин айтып, ал жакта Бишкек шаардык кеңешинин 2015-жылдын 29-июнунда кабыл алган суу түтүктөрү жана канализациянын кызматтары боюнча тарифтери так жазылганын кошумчалады.

Ага ылайык, 2015-жылдын 1-июлунан бери (кыйыр салыгы жок) төмөнкүдөй тарифтер иштейт:

Бир куб метр суу (1000 литр) бир адамга — 5 сом 38 тыйын, арыктагы суу 1 сом 20 тыйынга бааланат.

Суу түтүктөрү жана канализация кызматтарынын бир адамга карата бир айлык баасы:

— көчөдөгү колонка — 5 сом 73 тыйын;

— борбордук канализациясы жок үйдөгү суу түтүк — 16 сом 36 тыйын;

— борбордук канализациясы жок суу түтүк жана суу жылыткычтар менен — 27 сом;

— суу түтүк, канализация, ванна жана суу жылыткычтар менен — 34 сом 2 тыйын.

Ал эми суу түтүк, канализация, ванна жана суу жылыткычтары бар көп кабаттуу үйдөгүлөр 67 сом 88 тыйын төлөйт.

"Бишкексууканал" ишканасынын маалымат катчысы Эрлан Тимуров ишкана кызматкерлери суу жылыткан бойлерлерди гана эмес, суу түтүк, канализацияны да текшерип, ичүүчү сууну пайдалануу нормасын тартипке келтирип жатканын айтты.

"Эгерде жарандардын үйүндө муздак суунун канча кеткенин эсептеген жабдуу бар болсо, анда канализация, суу түтүк, суу жылыткычтар текшерилбейт ", — деди Тимуров.

Ал мындай иштер жыл сайын жасалаарын кошумчалады.

245
Белгилер:
Бишкек, тариф, Суу
Тема боюнча
Дүйнөлүк валюта фонду Кыргызстанга электроэнергияны кымбаттатууну сунуштады