Манас аэропорту. Архивдик сүрөт

Кыргызстан "кара тизмеден" чыгуу үчүн Эл аралык жарандык авиациянын талабын аткарды

180
(жаңыланган 12:55 15.05.2019)
Министрдин орун басары Кыргызстан "кара тизмеден" чыгуу үчүн Эл аралык жарандык авиация (ICAO) койгон бардык талаптарды аткарды деп ишендирди.

БИШКЕК, 15-май — Sputnik. Жогорку Кеңештин депутаты Бактыбек Турусбеков Кыргызстандын учактары "кара тизмеден" качан чыгарына кызыкты.

Парламент бүгүнкү жыйында "2018-жылдын 1-сентябрында Бишкек шаарында кол коюлган кыргыз өкмөтү менен түрк өкмөтүнүн ортосундагы 1994-жылдын 14-октябрында Анкара шаарында кол коюлган "Аба каттамын түзүү жөнүндө" макулдашууга өзгөртүүлөрдү киргизүү тууралуу" Протоколду ратификациялоо жөнүндө" мыйзамдын долбоору биринчи окууда каралып жатат.

Транспорт жана жолдор министринин орун басары Жеңишбек Ногойбаев Кыргызстан ICAO (Эл аралык жарандык авиация) уюму тарабынан берилген бардык талаптарды аткарганын айтып, эми акыркы жыйынтыкты күтүп жатканын билдирди.

"Биз тараптан аткарылчу аракеттердин бардыгы 100 пайыз аткарылды. ICAO уюмунун аудиттери төрт ирет келди. Былтыр үч ирет келсе, быйыл акыркы аудиторлору 12-апрелде келип кетишти. Алар койгон талаптарды аткарып бүттүк. Отчетун жазып, алдын ала "канааттандырарлык" деп кетишти. Анын жыйынтыгы регламент боюнча отчет 45 күндүн ичинде бизге келет. Биз өзүбүздүн сунуш-пикирлерди бергенден кийин кайра жиберебиз. Алардын берген сунушу менен биз ЕЭАБге, аэрокоопсуздук боюнча Еврокомиссияга заявка беребиз", — деди ал.

Депутат, андан сырткары, Кыргызстанда канча учак бар экенине жана алардын канчасы эл аралык талаптарга туура келерине кызыкты. Эл өкүлүнүн суроосуна Транспорт жана жолдор министрлигине караштуу Жарандык авиация агенттигинин директор орун басары Бакыт Жунушалиев жооп берди. Анын ырасташынча, учурда каттоого алынган 32 учак болсо, анын 16сы гана учат. Аба кемелеринин бардыгы эл аралык стандарттарга туура келет.

180
Белгилер:
депутаттар, Жогорку Кеңеш, Авиация, учак
Тема боюнча
Аэропорт — тойкана эмес! Аба майданында жана учакта жүрүү боюнча 10 кеңеш