Ишкер Алтынай Тапаева

Тоок сатып байыган Алтынай. Кыргызстандык кыздын ийгилик сыры

6578
(жаңыланган 15:55 19.05.2019)
25 жашар Алтынай Тапаева кайсы бир кезде Тез жардам кызматында иштечү. Ишкер кыз үй-жайсыздардын жанын куткарып, өмүрүнө кол салган өзү теңдүү балдарды ажалдан арачалап калганынан тарта кантип бизнес түптөгөнүнө чейин ачык айтып берди.

"Тооктун этин бышырып, убактымдын көбүн ашканада өткөрчүмүн. Апам ал аракетимди жактыра бербей, ошол иштен акча табарыма ишенчү эмес",- деп жылмаят жаш ишкер Алтынай Тапаева. Биздин маектеш тоок, бөдөнөнү сөөгүнөн ажыратып бышырып, кылканы жок балыктан тамак жасап сатат. Баары жеке рецеби менен даярдалат. Алтынай азыр цех иштетет, төрт кызматкери бар.

25-летняя бизнесвумен Алтынай Тапаева
© Sputnik / Табылды Кадырбеков
Алтынай Тапаева ишкерликтен сырткары, жеке клиникада офтальмолог болуп иштейт

— Өзүңүз тууралуу айтып берсеңиз.

— Бишкекте төрөлдүм. Жакшы окуп, баарын кынтыксыз аткарышым керек деп өзүмө бекем талап коюп чоңойдум. 1-класска барганымда үч күндөн кийин ызы-чуу салдым, анткени апам ага чейин жазганды, окуганды үйрөткөн. Кайра башынан үйрөнүүнүн кызыгы жок эле.

Апам директор менен бул боюнча сүйлөшкөндөн кийин: "Адегенде экзамен тапшырып көрсүн. Эгер тапшырып кетсе, дароо экинчи класска киргизели",- деди. Андан соң айтылуу №70 мектепке которулдум. Анын директору мени кыйналып калат деп башта кабыл алгысы келбеди. Жалаң "бешке" окуй турганымды убада кылдым.

"Кайда-ан, бизде эки жылдан бери мыкты окугандар жок", — деп анча ынана бербегени менен директор мени ал мектепке баары бир кабыл алды. Көп өтпөй сөзүмө туруп, жалгыз отличник болдум.

— Жогорку билимиңиз медициналык багытта, туурабы?

— Ооба, КРСУнун медициналык факультетин аяктагам. Азыр жеке клиникада офтальмолог болуп иштейм, билим алууну да улантып келем.

— Медик студенттердин практикасы кандай өтөрүнөн кабарым бар. Сиздей илмийген арык кыздын бейтап багып, алардын алдын тазалаганын элестете албай жатам.

— Кыйналган жокмун. Жарааттарын таңып, даарат идишин тазалачумун. Жийиркенчү да эмесмин, анткени адамдарга жардам көрсөткүм келчү.

Кийин Тез жардамга орноштум. Ал жакта иштөө мага аябай жаккан, жашоонун көп жактарын ошол тажрыйбам үйрөттү мага! Өз жанын кыйган кыздарды көрдүм. Боздогон энелеринин көзүнчө алардын ашказанын жууган күндөр көп болду. Перзентинин андай кылыгына күйгөн апаларды карап, жүрөгүм тилинчү...

Канчалаган адамдар итке минген жашоо кечирерин элестете да алчу эмесмин. Бишкекте жер төлөсүн үй-жайсыздар ээлеп калган ээн жатакана бар. Биттеп, курт аралап калган жер. Ошол жакка көп барчубуз. Үй-жайсыздар көбүнесе "жаман адатын" алынан ашырып ийип же сууктан жабыркашчу.

25-летняя бизнесвумен Алтынай Тапаева
© Фото / Темирлан Жапаров
Кесиби боюнча дарыгер Алтынай Тез жардам кызматында да иштеген

— Ишиңизде жүрөк ооруткан учурлар көп учураса керек...

— Жол кырсыктары... Алардын ошончолук коркунучтуу болорун элестете да албаптырмын... Кырсык болгон жерге биринчи ирет барганымда канды, кишинин жанчылган бутун көрүп нес болуп калдым. Врач "Алтынай, шприц!" деп кыйкырат, мен ордумдан козголо албайм десеңиз. Анан эс-учумду жыйып, эмне керек болсо, баарын тез жасап бүтүрдүм.

Бир учурду айтып берейин. Жардамга чыктык, бир аял өз өмүрүнө кол салыптыр. Аябай күчтүү депрессияга кабылган экен, үйүнөн чыкпайт, жолдошу психиатриялык ооруканага жаткырууну да ойлоно баштаптыр.

Тийиштүү врачка кайрылып, гормондук дарылоону байкап көрүңүз деп кеңеш бердим. Айрым аялдар менопаузадан кийин гормондордон улам ушундай абалга тушугуп, депрессияга кабылышат. Бир нече айдан соң анын жолдошу телефон чалып: "Чоң ырахмат, доктур! Аялым өзүнө келип, мурдагыдай болуп калды. Таблеткалар эле жашоону ушундай өзгөртүп коёру ойго келбептир", – деп ыраазычылык билдирди.

25-летняя бизнесвумен Алтынай Тапаева
© Фото / Темирлан Жапаров
Жаш ишкер чакан цех ачып, төрт адамды жумуш менен камсыздаган

— Эмнеге бизнеске кириштиңиз?

— Көп иштейм, бирок тапкан эч нерсем жок. Жаңы баштаган врачтардын маянасы маалым эмеспи. Кошумча эмне менен алектенсем деп баш катыра баштадым.

Тамак жасаганды жакшы көрөм, үйдө конокторго тоок этин өзгөчө рецепт менен даярдачумун. Сөөгүнөн ажыратып туруп, мисте, быштак, козу карын менен аралаштырып бышырам. Бул тамагым баарына жакчу. Анан балким бул тамак башкаларга да жагар деген ой келди.

Курбу кызымдын жеке кечесинде ошол тамакты акы алып даярдап бердим. Меймандарынын арасындагы бир айымга аябай жагып калат. Ишим ошентип башталып кетти. Азыр деле бири-биринен угуп буюртма беришет, кардарларды тартууда бул эң таасирдүү ыкма.

Instagram баракча ачтым, байкем ырчы Асел Кадырбекова менен Анжелика Бекболиевадан өз баракчаларында бул туурасында жазып коюуну өтүнөт. Алар макул болушуптур. Анан буюртмалар биринин артынан бири бериле баштады!

Адегенде баарын үйдө даярдачумун. Башында бул ишим ата-энеме жаккан жок. Апам: "Кызым, эмне эле убара тартып жатасың? Тооктон кантип киши акча тапсын? Андан көрө бар, оку!" – дечү. Бирок колумдан бир нерсе келерин айгинелегим келди.

Азыр цех ачтым, ишканамда төрт киши иштейт. Апамдын да пикири өзгөрдү, мурдагы бухгалтердик кесибине кайра киришип, мага акчаны тескөөгө жардамдашат.

25-летняя бизнесвумен Алтынай Тапаева
© Sputnik / Табылды Кадырбеков
Алтынай Тапаева: майрамдарда тамактарыбыз жакшы сатылат

— Даярдаган азыгыңызды канчадан сатарыңызды кантип эсептедиңиз?

— Баары бир медикмин да, ишкер эмесмин. Азык-түлүк канча турарын эсептедим, үстүнө бир аз коштум. Негизи өз наркы кымбат түшөт, себеби кошула турган азыктардын эң жакшысын тандап алам.

— Азыр кандай тамактарды сатасыздар?

— Биз тоокту, бөдөнөнү сөөгү жок, балыкты кылкансыз даярдайбыз. Кубулма форель жакшы өтөт баарынан. Себеби баары эле кылкандарын тазалап жүргүсү келбейт да. Ал эми биз кол менен ар бирин алып чыгабыз, бул оңой-олтоң иш эмес.

— Кыргызстанда жаш врачтардын жакшы акча табууга мүмкүнчүлүгү жок дедиңиз. Ашкана жаатында кандай экен бул жагы?

— Азыктануу багытында акча табууга болот. Мисалы, майрамдарда тамактар жакшы сатылат. 31-декабрда эле 200 доллар таптык.

25-летняя бизнесвумен Алтынай Тапаева
© Фото / Темирлан Жапаров
Ишкер айым: иштей билген, жалкоолукка качырбаган мырза эртеби-кечпи, жакшы таба баштайт

— Азыр 4 жумушчуңуз бар экен. Аларды башкарууда кыйналган жоксузбу?

— Мүнөзүм аябай жумшак. Эгер киши ишке келе албай калса, өз ишимди таштап коюп анын ордуна иштей берем. Бир жумушчу кызды аябай төбөмө чыгарып алсам керек. Бир күнү жумушка апам келип калды. Баягы кыз телефонун чукулап отурат, мен пол жууп жүрөм. "Мындай болбойт! Бар, кете бер!" – деп ал кызды иштен кетирип салды.

— Биздин коомдо кыздарга дайым кысым бар го. Турмуш курар кез келгенин айтып кулактын кужурун алышат. Андайга кабыла элексизби?

— Азыр ишимди жөнгө салууга бүт күчүмдү жумшап жатам, жакынкы жылдары да бизнесимди илгерилетким келет. Жеке жашоомду ойлоого азыр убакыт жок.

— Бишкектик кыздардан мырзалар канча акча табышы керек деп суроо салган видеоролик чыккан. Кыздар 50-100 миң сом деп айта коюп, сынга кабылышкан.

— Менимче, жакшы акча табууга кыздардын өзүндө да умтулуу болушу керек. Мырзалардын кирешеси маанилүү эмес дегенден алысмын! Иштей билген, жалкоолукка качырбаган мырза эртеби-кечпи, жакшы таба баштайт.

6578
Белгилер:
ишкердик, цех, бөдөнө, акча, бизнес, тоок
Тема боюнча
Очогумдун бузулганы жаш кыздарга сабак болсун! Ишкер айым менен маек
Ишкер Алмаз Арапов чет өлкөдө акысыз, арзан окуунун сырын айтып берди. Маек
Ош эл аралык аэропорту. Архив

Ошко Москва шаарынан 148 кыргызстандык учуп келди

4
(жаңыланган 21:59 04.07.2020)
Келгендердин арасында төрөтү жакындап калган кош бойлуулар жана 2 жашка чейинки жаш баласы бар аялдар бар.

БИШКЕК, 4-июл. — Sputnik. "Ош" эл аралык аэропортуна бүгүн Москва-Ош каттамы менен 148 кыргызстандык жаран кайтып келди. Бул тууралуу Республикалык штабдан кабарлашты.

Алар "Авиатраффик Компани" авиакомпаниясынын чартердик рейси менен келип түштү.

"Келгендер төрөтү жакындап калган кош бойлуулар жана 2 жашка чейинки жаш баласы бар аялдар. Андан сырткары оор илдети бар жана жакын туугандары каза болгондугунан улам мекенине чукул түрдө кайтышы зарыл болгон жарандар", — деп айтылган маалыматта.

Бүгүн Түркиядан 237 кыргызстандык мекенине алып келинди

Кыргызстанга келүүнү каалаган жарандардын саны көп болгондугуна байланыштуу, бул каттамдагы жүргүнчүлөрдүн тизмеси кыргыз диаспорасынын өкүлдөрүнөн, Москванын Кыргыз медициналык клиникасынан жана Россиядагы Кыргызстандын элчилигинин кызматкерлеринен турган комиссия тарабынан түзүлгөн.

Маалыматта чет мамлекеттерде жүргөн Кыргызстандын жарандарын мекенине кайтарууну уюштуруу иштери улантылары айтылган.

Өлкө аймагындагы соңку кабарлар менен биздин Telegram-каналдан таанышып туруңуз.

4
Белгилер:
пандемия, коронавирус, Россия, Кыргызстан
Тема боюнча
ТИМ Кытайдан келе албай жаткан кыргызстандыктар боюнча үн катты
Боронов: Россияда иштеген кыргыз дарыгерлер жардамга даяр, учак менен алып келебиз
Анкара шаары. Архив

Түркиядагы кыргызстандыктар пенсия, жөлөк пул ала башташат. Күчүнө кирген документ

8
Эки жыл мурда Социалдык фонд түшүндүрмө берип, КР жараны өз мекенинде он жыл иштеп, андан соң Түркияда 15 жыл эмгектенип пенсияга чыкса, Кыргызстан он жыл, Түркия 15 жылдык пенсиясын төлөмөк.

БИШКЕК, 4-июл. — Sputnik. Түркиянын аймагында иштеген кыргызстандыктар эми пенсия жана жөлөк пул ала алышат. Бул тууралуу Кыргызстандын аталган мамлекеттеги элчилигинен билдиришти.

2-июлда Кыргызстан менен Түркия өкмөтүнүн ортосундагы социалдык камсыздандыруу боюнча макулдашуусу күчүнө кирди. Аталган чечимге үстүбүздөгү жылдын апрель айында алгач Режеп Тайип Эрдоган кол койгон. Ал эми КР президенти 2019-жылдын январь айында ратификациялаган.

Италияда киши баккандар келин сыяктуу эле кызмат кылат. Ишкер Автандилова менен маек

Ал демилге Жээнбековдун 2018-жылдын апрель айында Түркияга болгон расмий иш сапарында колдоо тапкан.

Эки жыл мурда Социалдык фонд түшүндүрмө берген. КР жараны өз мекенинде он жыл иштеп, андан соң Түркияда 15 жыл эмгектенип пенсияга чыкса, ага 25 жылдык стажы үчүн пенсия чегерилмек. Тагыраагы, Кыргызстан он жылдык, Түркия 15 жылдык пенсиясын төлөмөк.

Ошондой эле ал талаптар Кыргызстанда иштеген түркиялыктарга да тиешелүү болуп, мыйзамдуу жол менен тыйын тапкан эки өлкөнүн жарандарынын укуктары эске алынат.

Мамбеталиев: пенсия 28-майга чейин толук таратып берилет

Андан сырткары, жумуштан алган жаракатына, ооруганына, боюнда бар аялдарга төлөнүүчү акча каражаттарын эки жактын жергиликтүү мыйзамдарынын негизинде чегерүү да каралган.

8
Белгилер:
макулдашуу, пенсия, Түркия, Кыргызстан
Тема боюнча
Кыргызстанда кайсы дарт аялды коляскага отургузат? Майыптык боюнча статистика
Өкмөт айлык, пенсия убагында берилерин айтты