Кыргызстанда ВИЧ инфекциясынын жайылуу тенденциясы боюнча Партнерская сеть ассоциациясынын директору Айбар Султангазиев

Адис: эгер чара көрүлбөсө, Кыргызстанда ВИЧ жайылып кетиши мүмкүн

337
(жаңыланган 11:27 29.05.2019)
ВИЧке кабылгандардын саны көбөйүп кетүү коркунучу бар экени айтылды.

БИШКЕК, 28-май — Sputnik. Кыргызстанда ВИЧ инфекциясынын жайылуу тенденциясы боюнча "Партнерская сеть" ассоциациясынын директору Айбар Султангазиев Sputnik Кыргызстан агенттигинин маалымат борборунда өткөн "Кыргызстан СПИД эпидемиясына жакындап калдыбы?" аттуу маалымат жыйын учурунда айтып берди.

Анын айтымына караганда, мамлекет ВИЧти аныктоо жана дарылоо боюнча программаны кайра карап, кеңейтиши керек.

"Эгер кош бойлуулар арасында ВИЧ менен жабыркагандардын саны бир пайыздан ашса, ВИЧ эпидемиясы башталат. Өткөн жылы улут саламаттыгы боюнча программа кабыл алуу маселеси катуу талкууга алынган. Ооба, өлкөдө жол кырсыктарынан каза болгондордун саны арбын. Бирок убагында чара көрүлбөй кала турган болсо, ВИЧ тездик менен тарап кетиши мүмкүн", — деди Султангазиев.

Ал ошондой эле ВИЧке карата анализдерди кош бойлуулар гана эмес, алардын түгөйлөрү дагы тапшыруусу керектигин белгиледи.

ВИЧтин жайылып кетишин алдын алуу үчүн кандай иш-чаралар жүргүзүлүп жатканын СПИД республикалык борборунун директору Үмүт Чокморова айтып берди. Ал белгилегендей, Кыргызстанда диагностиканын жаңы ыкмасы киргизилген.

"Биз тестирлөөнүн алгоритмин өзгөрттүк. Буга чейин анализдин жыйынтыктарын көпкө күтүү керек болсо, эми эки жума гана керектелет. Эгер ВИЧ инфекция аныкталса бейтап дарыланууну баштайт. Кайсы бир убакта адам абдан көп дары ичүүгө аргасыз болсо, азыр 2-3 препарат гана керек", — деди Чокморова.

Ал эми мамлекеттин мындан аркы стратегиясын Саламаттык сактоо министрлигинин алдындагы Коомдук саламаттыкты сактоо башкармалыгынын ага адиси Шарипа Суваналиева айтып берди.

"Тестирлөөнүн жеткиликтүү болушуна чоң көңүл бурулуп жатат. Кан жана шилекей аркылуу алынган экспресс-тесттер киргизилүүдө. Эми ар бир адам райондук ооруканадан текшериле алат. Профилактикалык иштер балдар арасында дагы жүргүзүлүп жатат", — деди ал.

Эске салсак, 24-май күнү Бишкектеги "Орто-Сай", "Аламүдүн" жана "Ош" базарларында ВИЧ боюнча экспресс-тестирлөө жүргүзүлгөн. Натыйжада төрт сааттын ичинде ВИЧке кабылган беш адам аныкталган.

337
Белгилер:
СПИД, ВИЧ, Кыргызстан
Тема боюнча
Үрөй учат! Бишкектин базарларында 4 саатта ВИЧке кабылган 5 адам аныкталды