Имам. Архив

Мындан ары имамдар никени жөн эле кыя бербейт. Шарт-талабы

1713
Эми дин кызматкерлери тийиштүү документтерди талап кылат. Ошондой эле 18 жашка чейинкилердин никесин кыйбайт.

БИШКЕК, 12-июн. — Sputnik. Бүгүн, 12-июнда, муфтий Максатбек ажы Токтомушев республикалык борбордук мечитте Бишкек жана Чүй облусундагы имамдарга нике каттоо журналын тааныштырды. Бул тууралуу муфтияттан билдиришти.

Никени каттоого алуунун максаты?

  • Мусулмандардын шарияттык никеге туруусун каттоого алуу жана өлкөдөгү үй-бүлө институтун бекемдөө;
  • Үй-бүлө баалуулуктарын жайылтуу жана нике, талак, нафака маселелерин кеңири түшүндүрүү аркылуу ажырашуулардын алдын алуу;
  • Өлкө боюнча сапаттуу жана бирдиктүү нике кыюуну жолго салуу жана нике кыйган дин кызматкеринин жоопкерчилигин күчөтүү;
  • Күйөө никедеги милдеттерин аткарбаган учурда аялдардын шарияттык, мүлктүк, мурастык укуктарынын сакталуусун камсыздоо;
  • Жубайлар ортосунда сүйүү, мээрим жана байыр алууну, келечек урпакты көбөйтүү, абийирди, намысты сактоо.

Мындан сырткары, шарияттык никени каттоо жүргүзүү үчүн дин кызматкерлери никеге туруп жаткан жарандардын никеге тиешелүү болгон өздүк документтерин талап кылат жана мыйзамдын талаптарына жараша 18 жашка толгон жарандарга гана нике кыюу жөрөлгөсүн шарияттын негизинде өткөрөт.

Шарияттык никени каттоо жүргүзгөн дин кызматкерлери жана имамдар квартал сайын райондук баш имам хатибдерге отчет тапшырса, ал эми райондун баш имамдары облустук казыяттарга, облустук казыяттар муфтиятка нике тууралуу отчет берип турушмакчы.

Журнал имамдар ортосунда шарияттын бардык талаптарына жооп берген каттоо болгондуктан, юридикалык күчкө ээ эмес. Бирок шарияттын негизинде кыйылган нике Кыргызстан мусулмандарынын дин башкармалыгынын нике каттоо журналына катталат. Ошондой эле жубайлар никени мамлекеттик каттоо органдарынан дагы каттатууга милдеттүү.

Муфтий Максатбек ажы Токтомушев нике каттоо журналы аркылуу үй-бүлөнү бекемдөөгө, ага жоопкерчиликтүү мамиле жасоого шарт түзүлөрүн белгиледи.

"Муфтият нике катоо журналы боюнча бир жылдан ашуун эмгектенди. Чет мамлекеттердин тажрыйбасы дагы колдонулду. Журнал Кыргызстан мусулмандарынын Аалымдар кеңеши тарабынан жактырылып, бүгүнтөн тарта Кыргызстандын бардык облустарындагы казыяттарда кезек-кезеги менен имамдарга тааныштырылып жатат. Муфтият бул журналды дыкат көзөмөлгө алат", — деди муфтий.

Журнал үч миң нуска менен басылып чыкты. 2019-жылдын 12-июнунан 3-июлга чейин Кыргызстандын бардык аймактарындагы имамамдар окутулуп, журнал тапшырылат.

1713
Белгилер:
нике, Муфтий, кыргызстандыктар
Тема боюнча
ЮНИСЕФ: 15-19 жаш курактагы ар бир 11-кыз никеге турган