Кары түгөйлөр. Архивдик сүрөт

Карыганда күйөөм кызганып, балдардын ДНКсын текшертти. Айласы кеткен аялдын каты

12318
(жаңыланган 15:09 22.06.2019)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасынын бул жолку чыгарылышында кызганычтан күйөөсү менен болгон мамилеси солгундап бараткан аялдын каты жарыяланмакчы.

Жашым элүүгө таяп калды, тагыраагы 48 жаштамын. Карып баратканда бирөөгө сырымды айтыштан да тартынам. Ошол себептен психологго анонимдүү кат жазып көрүүнү туура көрдүм.

Жолдошум менен бирге түтүн булатып жашап келе жатканыбызга 30 жыл болду. Сүйүшүп, сүйлөшүп деле үйлөнгөн эмеспиз. Таенеси мени жакшы көрүп эле алып берип коюптур. Мектепти бүтөөрүм менен ала качып кеткен. Жашообуз жаман болгон жок, эки кыз, бир уул күттүк, жети неберебиз бар. Сырттан караган адамдарга жакшы жашап жаткан үй-бүлө көрүнгөнүбүз менен барган сайын жашообуз татаалдашып, кыйындап баратат. Тагыраагы, жолдошум экөөбүздүн мамилебиз солгундап кетти.

Карыганда күйөөм кызганып кууратты. "Таап алган бирөөң бар, балдардын атасы башкабы" деп өз канынан жаралган балдарды ДНКга текшертем деп чыкты. Аны уккан уулум, турмушка чыккан кыздарыбыз чалкасынан кетишти. Улуу кызым атасына азыркыга чейин таарынып жүрөт, башы да ошонун айынан тынбай ооруйт. "ДНК тапшырбайбыз" деп чыгышканынан "атаңар анда мага тынчтык бербейт" деп жатып араң көндүрдүм. Жыйынтыгында балдардын баары өзүнүкү болуп чыкты. Бирок анда деле тынч алып калган жок. Көрсө, ким экенин так билбейм, бирөө "балдарың сага окшош эмес" деп коюптур. Ошондон бери "балдар эмнеге мага окшош эмес, башка адам менен жүрдүң беле" деп үйдө тынчтык жок.

Экөөбүз тең дин жолундабыз. Ага болбой тарбиялык маанидеги видеолорду көрсөтүп, кызганып, ар бир баскан кадамымды текшерип айламды кетирди. Атургай колу да тийген күндөр болду. Бир жакка кетип калсам өзүнө келип калар деп кызымдыкында бир ай жүрдүм. Күйөө бала, элден уялгандан кайра келсем эч өзгөрүү жок, баягыдай эле көрүнүш.

"Менден көңүлүң калса башка аял алып жаша, мени тынч кой, бара турган башка жерим жок, сен эркексиң бир айласын табаарсың, үйдү мага калтыр, мен кыздарым, неберелерим келсе эшик ачып отурайын" деп да сурандым. Ага да болбой койду.

Карып, күйөө бала күткөндө ушундай абалга тушугам деп ойлобоптурмун. Эми келин алсак эмне болот билбейм. Балдарыбыз да чырдан тажады. Кыздардын башын оорутуп, уулубуз болсо эрте эле армияга өз каалоосу менен кетип калды. Ал жактан келери менен Москвага иштегени кеткен. Азыр ошол жакта. Кыргызстанга барып үйлөнүп эле кайра кетем деп ал отурат. Ал деле аялынан уялат да...

Күйөөмдүн алдында ак, таза экенимди айтып түшүндүрүп жеткире албай койдум. Кетип калайын дейм, элден, куда-сөөктөн уялат экенсиң. Анын үстүнө кыздарымды жер караткым келген жок. Бирок жолдошумдун намысыма шек келтирип, чучукка жеткен сөздөрүнө да чыдабай калдым. Эмнеден улам ушундай болушу мүмкүн. Абалды кантип жөнгө салса болот. Бул кырдаалдан кантип чыгам? Айлам куруду...

Гүлнара Жасоолова, психолог:

— Ар бир үй-бүлөдө кризистик этаптар болот. Биринчиси - үйлөнгөндөн кийин 2-3-жылдан соң башталышы мүмкүн. Анда жубайлар жаңы балалуу болуп, аялы күйөөсүнө көңүл бура албай, үй жумуштары, бала менен алагды болуп калат. Ошондо эркектер башка адамдан жылуу мамиле издеп башташы мүмкүн. Эгер мындай учурда жубайлар бири-бирине жетишерлик көңүл бурса, кырдаалдан жөн эле чыгып кетет.

Орто куракта, улгайып калганда да үй-бүлө кризистик кырдаалга дуушар болот. Орто курактагы эркектер картайгысы келбей кыздар менен сүйлөшүп же мамиле кура баштайт.

Мындан сырткары, балдары өзүнчө үй-бүлө куруп кеткенде жалгыз калган жубайлар да кыйын кырдаалды башынан өткөрүп жүрүшөт. Себеби алар буга чейин балага эле байланып, башка эч нерсе менен алек болгон эмес.

Бизге кайрылган аял күйөөсү экөө үчүнчү кризистик этапка туш келиптир. Балдары окууну бүтүп, үй-жайлуу болуп кеткенден кийин баары башталган. Балким, ага чейин болуп жүргөндүр.

Аял менен эркектин кызыкчылыктары бир болгон күндө гана баланын бар-жогуна карабай экөө бири-бирин түшүнүп жашайт. Экөөнү бала эле эмес, сезимдер да байлап турушу керек.

Кызганыч өзүнчө оору. Эгер жубайлардын бири-бирине ишеними жок болсо, ортодогу мамиле, үйдөгү ырк бузулат. Бизге кайрылган аялдын күйөөсү дал ушундай жаман сезимге алданып, көзүн май басып калган.

"Сүйүп, сүйлөшпөй эле үйлөнгөнбүз" дейт. Жаш кезинде бири-бирин түшүнө албаган жубайлар карыганда деле түшүнө албайт. Анткени ортодо сезим жок. Түпкүрүндө экөө бири-бирин жакшы көрүп сүйбөсө, бул нерсе жаш өткөндө деле минтип капка темене каткандай эле чыгып калат.

Ата-эненин ынтымагы бала үчүн да абдан маанилүү эмеспи. Үйдөгү араздашуудан экөө эле эмес, балдар дагы жабыркап жатат. Ушунун айынан алар кайрымсыз, таш боор болуп калат. Анан ата-энеси кайра "балам карабай кетти" деп таарынат. Аларга да көңүл, сүйүү, жакшы мамиле керек да.

Кайрылган аялга айтарым, чыдоонун да чеги болот. Унчукпаган сайын жолдошу чын эле күнөөлүү экен деп башына чыга берет. Элден уялып жашай бергенде ден соолугу кетет. Ар кайсынын баарын ойлонуп атып, депрессияга түшсө өзү эле оорукчан болуп калат. Ооруну жашырса өлүм ашкере кылат дегендей, элден, куда-сөөктөн корунуунун кереги жок. Эл үчүн жашоо — чекилдик. Аял өзүн ойлошу керек.

Акыл эси соо киши кантип баланы шылтап кызганат? Бардык эле бала ата-энесине куюп койгондой төрөлбөйт да. Жолдошун дарыгерге алып барып көрсөтүп, психолог менен иштешип көрсүн. Ага болбосо аял жаш эле экен, өзү үчүн жашасын. Психолог менен жеке сүйлөшсө да көп нерсе чечилет.

12318
Белгилер:
психолог, кызганыч, үй-бүлө, бала
Тема:
Психолог менен баарлашуу (116)
Тема боюнча
Кайын журтума эки күйөөдөн чыкканымды кантип айтам? Жаш келиндин каты
Күйөөмдүн аракеч, эрке уулунан тажадым... Жашы өтүп калган аялдын баяны
Жогорку категориядагы өпкө дарыгери Бермет Естебесова. Архив

Естебесова: койдун майын сыйпоону физиотерапиялык дарылоо десек болот

62
(жаңыланган 18:43 05.08.2020)
Жогорку категориядагы өпкө дарыгери Бермет Естебесова коронавируска чалдыккан учурда койдун майын же башка майларды сыйпоо же ичүү тууралуу медициналык көз карашын билдирди.
Естебесова: койдун майын сыйпоону физиотерапиялык дарылоо десек болот

Койдун майын же башка майларды сыйпоо физиотерапиялык натыйжа берет десек болот. Бул тууралуу Бермет Естебесова Sputnik Кыргызстан радиосуна маек куруп жатып билдирди.

Анын айтымында, койдун, кашкулактын же башка жаныбарлардын майын дарылануу үчүн колдонсо болот, бирок айрым маанилүү делген эрежелерди сактоо керек.

Россиялык дарыгерлер: кыргыз медиктери COVID-19ду дарылоону жакшы өздөштүргөн

"Илгертен эле апаларыбыз жөтөлүп калса көкүрөгүнө, далысына койдун майын сыйпаган. Бул ошол сыйпалган жерди жылуу кармап физиотерапиялык натыйжа берет десек болот. Эгерде жабыркаган органга суук өтүп ооруп жатса гана мындай ыкма пайдалуу. Кеселдеген  органды сыртынан ысытып, кан айланууну жакшыртып турат. Негизи эле койдун майынан башка да элдик медицинада колдонулуп келген майлар ушундай иш аткарат. Бирок аларды сүткө кошуп же башка бир суюктуктарга кошуп ичүү кооптуу. Биринчиден, ооруп турган адамдын бооруна күч келтирет. Мунун кесепети кийин жаман аякташы да ыктымал", — деди Естебесова.

Дарыгер адамда холецистит, панкреатит, гепатит болсо мындай ыкма менен дарыланбай эле койгону туура болорун кошумчалады.

62
Белгилер:
пневмония, коронавирус, Бермет Естебесова
Тема боюнча
Естебесова: коронавирустан айыккан адам элге качан аралашса болору белгисиз
 Премьер-министр Кубатбек Боронов брифинг учурунда. Архив

Боронов эмдөө жана аймактарда ооруканаларды кеңейтүү боюнча тапшырма берди

28
(жаңыланган 17:50 05.08.2020)
Отурумдун жүрүшүндө Баткен жана Талас облустарын медициналык жабдуулар, дары-дармектер жана жеке коргонуу каражаттары менен камсыз кылуу маселелери да талкууланды.

БИШКЕК, 5-авг. — Sputnik. Тиешелүү органдар калкты убагында эмдөө үчүн бардык шарттарды түзүшү керек. Бул тууралуу премьер-министр Кубатбек Боронов Республикалык ыкчам штабдын жыйынында айтты.

Боронов жарандардын аяр катмарына мезгилдик сасык тумоого каршы өз убагында эмдөө жүргүзүүнүн маанилүүлүгүн белгиледи.

"Адистештирилген түзүмдөр калкты эмдөө үчүн бардык шарттарды түзүшү керек. Бул күз-кыш мезгилинен өтүү үчүн абдан зарыл иш-чара", — деди премьер-министр.

Отурумдун жүрүшүндө Баткен жана Талас облустарын медициналык жабдуулар, дары-дармектер жана жеке коргонуу каражаттары менен камсыз кылуу маселелери да талкууланды.

Өкмөт 145 миллион сомго 40 Тез жардам автоунаасын сатып алууну пландап жатат

Жыйында облустардын жетекчилери докладдары менен маалымат беришти.

Өкмөт башчы региондордо, зарылчылык келип чыкса, кошумча бөлмөлөрдү жана керебеттерди даярдоо ишин улантууну тапшырды.

28
Белгилер:
эмдөө, коронавирус, аймак, өкмөт, Кубатбек Боронов
Тема боюнча
Октябрдан баштап россиялыктар жапырт коронавируска эмделе баштайт
Кыргызстандык мушкер Рафаэль Физиев. Архив

Кубанып турам! Кыргызстандык Физиев UFC уюму менен келишимин жаңыртты

0
(жаңыланган 19:11 05.08.2020)
Аралаш мушташ спортундагы эң беделдүү UFC уюмунда күчүн сынаган Физиев эми дагы төрт беттеш өткөрө алат. Андан кийинки турнирлерге катышуусу рейтингинен көз каранды деп эсептелинет.

БИШКЕК, 5-авг. — Sputnik. Кыргызстандык мушкер Рафаэль Физиев Абсолюттук мушкерлер уюму (UFC) менен келишимин узартты. Бул сүйүнүчтүү кабары менен спортчу Instagram баракчасы аркылуу бөлүштү.

 

Контракт боюнча Физиев уюмдун алкагында төрт беттеш өткөрөт.

"UFC уюму менен жаңы келишим түзгөнүмө кубанып турам. Жакшы бир шарттар менен төрт беттеш өткөрөм. Менин менеджерлик командама ыраазычылыгымды билдирем", — деген Физиев.

Рафаэль Физиевге UFC канча гонорар төлөп берери белгилүү болду

Белгилей кетсек, промоутерлик компания спортчу бир нече кармаш өткөргөн сайын анын келишимин узартууну же токтотууну карап чыгат. Бул мушкердин жеңиштерди камсыздап, өз рейтингине кам көргөнүнө жараша болот. 

Эске салсак, Физиевдин соңку кармашы 19-июлда Абу-Дабидеги "Мушкерлер аралында" өтүп, анда англиялык Марк Диакезини жеңип алган.

Рафаэль жалпысынан UFC уюмунда үч кармаш өткөргөн. Биринчисинде россиялык Магомед Мустафаевден жеңилип, кийин бразилиялык Алекс Уайтты утуп алган.

 

0
Белгилер:
турнир, мушкер, келишим, Рафаэль Физиев, UFC
Тема боюнча
Физиев жеңишинен кийин кыргызстандыктарга кайрылды. Видео
Төрага Жумабеков мушкер Физиевди UFC мелдешиндеги жеңиши менен куттуктады