Премьер-министр Мухаммедкалый Абылгазиев министрлер менен Жогорку Кеңеште отчет берүүдө. Архивдик сүрөт

Өкмөттө эң көп жана эң аз айлык алган министрлер. Тизме

7938
(жаңыланган 15:53 15.07.2019)
Эң көп айлык алган өкмөт мүчөлөрүнүн көч башында вице-премьер-министр Жеңиш Разаков турат. Ал эми эң аз алганы — саламаттыкты сактоо министри Космосбек Чолпонбаев.

Негизи бирөөнүн капчыгын аңдыган туура эмес, бирок эл төлөгөн салыктын эсебинен айлык алган аткаминерлердин чөнтөгү тууралуу кеп болгондо, эл башкаргандардан "канча акчаң бар?" деп эч тартынбай суроого шарт түзүлөт.

Андыктан Sputnik Кыргызстан өкмөт мүчөлөрүнүн айына канча сом иштеп табарына кызыгып көрдү.

Негизи премьер-министр, төрт вице-премьер жана 12 министрге кайрылганбыз. Бирок үч министрдин айлыгы жөнүндө биле албадык. Финансы жана Юстиция министрликтери эч себепсиз эки ай бою жооп берген жок.

Дагы бир кызык жагдай, премьер-министрдин айлыгы тууралуу эч тоскоолдуксуз маалымат алып жатсак, 1-2 министрлик жетекчисинин маянасы жашыруун сыр экенин айтып, көгөрүп туруп алышты.

Баса, министрлердин негизги айлыгы (оклад) 24 миң сом экен, мунун үстүнө аскердик жана кызматтык чини, мамлекеттик кызматтагы стажы, илимий даражасы, купуя сырларды сактагандыгы сыяктуу артыкчылыктары үчүн кошумча акча төлөнөт.

Мухаммедкалый Абылгазиев — 49 345 сом

Премьер-министр Кыргызской Республики Мухаммедкалый Абылгазиев с рабочей поездкой посетил Баткенскую область.
© Фото / пресс-служба правительства/ Алишер Алиев
Премьер-министр Мухаммедкалый Абылгазиев

Премьер-министр Мухаммедкалый Абылгазиев өкмөттү 2018-жылдын 20-апрелинен бери башкарып келе жатат. Ага чейин бир ай президенттин аппаратын жетектеген. Баса, Абылгазиев эгемендүү Кыргызстандын тарыхында Социалдык фондду эң узак, 6 жыл башкарган жетекчи боло алды.

Азыр өкмөт башчыга жалпысынан канча айлык чыгарын айтышкан жок, бирок бардык алымча-кошумчасын эске алганда, колуна 49 345 сом тиет экен.

2017-жылкы декларациясына караганда, жылдык кирешеси 2 миллион 367 миң сомду түзөт. Мындан тышкары, 1 миллион 850 миң сомго бааланган жылкылары, 640 миң сомдук ири мүйүздүү малы, 1 миллион 676 миң сомдук кой-эчкиси бар экени көрсөтүлгөн. Жакын тууганынын 278 чарчы метрлик үйү бар.

Кубатбек Боронов — 47 265 сом

Первый вице-премьер-министр КР Кубатбек Боронов во время присяги
© Пресс-служба правительства / Сабыр Аильчиев
Биринчи вице-премьер-министр Кубатбек Боронов

Биринчи вице-премьер-министр Кубатбек Боронов буга чейин жети жыл өзгөчө кырдаалдар министри болуп келген. Бир кызматта узак иштегендиги жагынан алганда премьер-министрден кем калышпайт. Ал эми айлык акы темасына келсек, учурда колуна тийген маянасы 47 265 сом.

Бул аткаминер акыркы декларациясын 2017-жылы министр кезинде тапшырган. Андагы жылдык кирешеси 869 миң сомго жеткен. Мындан тышкары, 29 жана 46 миң сомдук кыймылдуу мүлкү, 166 миң сомдук тиричилик техникасы жана 380 миң сомдук эмереги бар экенин көрсөткөн. Ал эми жакын тууганынын Lexus RX 400 Н үлгүсүндөгү автоунаасы жана баалуу кагаздары бар экенин көрүүгө болот, бирок алардын наркы жазылган эмес.

Жеңиш Разаков — 50 326 сом

Вице-премьер-министр КР Жениш Разаков во время присяги
© Пресс-служба правительства / Сабыр Аильчиев
Вице-премьер-министр Жеңиш Разаков

Вице-премьер-министр учурда өкмөт мүчөлөрүнүн ичинен эң көп айлык алган адам. Бардык алымча-кошумчасын эсептегенде колуна 50 326 сом алат. Карьерасын алгач укук коргоо органдарынан баштаган, аскердик чини — милициянын полковниги. Жеңиш Разаков азыркы кызматына дайындалганына чейин КР президентинин кеңешчиси болчу.

Вице-премьер катары акыркы декларацияны 2016-жылы тапшырган (2017-жылкы декларациясы жарыяланган эмес). Анда жылдык маянасы 691 миң сомду, пенсиясы 144 миң сомду түзгөн.

Алтынай Өмүрбекова — 40 000 сом

Вице-премьер-министр Алтынай Омурбекова во время присяги
© Пресс-служба правительства / Сабыр Аильчиев
Вице-премьер-министр Алтынай Өмүрбекова

Өмүрбекованын вице-премьер-министр болгонуна бир жыл үч ай болду. Анын дагы толук айлыгы көрсөтүлгөн жок, ал эми колуна тийгени 40 миң сом экен.

2015-жылы "Республика — Ата-Журт" партиясы менен парламенттик шайлоого келип, депутат болгон. Андагы декларациясына караганда, жылдык кирешеси 873 миң сом эле. Жакын тууганынын 173 миң сомдук кирешеси жана 170,5 чарчы метрлик батири бар экени айтылган.

Замирбек Аскаров — 43 000 сом

Вице-премьер-министр Замирбек Аскаров во время присяги
© Пресс-служба правительства / Сабыр Аильчиев
Вице-премьер-министр Замирбек Аскаров

Замирбек Аскаров региондон өсүп чыккан кадр. 2018-жылдын апрель айында вице-премьер-министр болуп дайындалганга чейин Ош шаарынын биринчи вице-мэри болгон. Негизи карьерасын Ош мамлекеттик университетинин мугалими болуп баштаган. Учурда колуна тийген айлыгы — 43 миң сом.

Буга чейин саясий жана атайын кызматтарды аркалабагандыктан, декларациясы жарыялана элек.

Чыңгыз Айдарбеков

Министр иностранных дел Кыргызстана Чингиз Айдарбеков выступает на совещании министров иностранных дел ШОС в Бишкеке.
© Sputnik / Табылды Кадырбеков
Тышкы иштер министри Чыңгыз Айдарбеков

Тышкы иштер министрлиги Айдарбековдун айлыгы тууралуу маалымат берүүдөн баш тартып, "Өкмөттүн токтомуна ылайык (№255, 2013-жылдын 7-майындагы), кызматтык пайдалануудагы документтердеги маалыматтарды бере албайбыз" деп жооп берди.

Министр буга чейин Кыргызстандын Япониядагы атайын жана ыйгарым укуктуу элчиси болгон. 2016-жылкы декларациясындагы маалыматтарга ылайык, ал жылы 2 миллион 224 миң сомдук киреше тапкан.

Кашкар Жунушалиев — 24 000 сом

Министр МВД Кашкар Джунушалиев во время присяги
© Пресс-служба правительства / Сабыр Аильчиев
Ички иштер министри Кашкар Жунушалиев

Ички иштер министрлиги дагы жетекчисинин толук айлыгын ачыктаган жок. Жүйөөсү — тышкы саясат менен алектенген министрликтикине окшош. Болгону 24 миң сом алары айтылган. Бирок бул жогоруда көрсөтүлгөндөй, министрдин оклады гана болушу мүмкүн.

Жунушалиев министр болуп былтыркы жылдын апрель айында дайындалган. Ага чейин башка кызматтарды аркалагандыктан, декларациясы жарыяланган эмес.

Марат Жаманкулов

Руководитель аппарата конституционной палаты верховного суда Марат Джаманкулов в рабочем кабинете
Юстиция министри Марат Жаманкулов

Марат Жаманкулов Юстиция министрлигин былтыркы жылдын сентябрь айынан бери башкарып келе жатат. Ага чейин Жогорку соттун Конституциялык палатасында төраганын кеңешчиси, аппарат жетекчиси болуп иштеген.

Министрдин айлыгы тууралуу маалыматты ведомствонун өзүнөн эки ай (кат 14-май күнү жолдонгон) күтүп, жооп ала алган жокпуз. Жалыйнасын мынчалык сыр кылып катканы түшүнүксүз.

Макала чыккандан төрт сааттан кийин министрдин айлыгы тууралуу маалымат беришти.

"Юстиция министринин кызматтык маянасы 24 000 сомду түзөт. Андан сырткары кошумча төлөмдөр (иштеген жылдары үчүн пайыздын үстөк, жашыруун мүнөздөгү иш жана жашыруун иш кагаздарын жүргүзүү, класстык чен ж.б.) жана эсептен чыгаруулар менен айына 45 545 сом эмгек акы алат" — деп айтылат маалыматта.

Бактыгүл Жээнбаева

Присягу перед народом, Президентом и депутатами Жогорку Кенеша Кыргызской Республики принесла Министр финансов Кыргызской Республики Бактыгуль Жеенбаева
© Фото / пресс-служба Жогорку Кенеша
Финансы министри Бактыгүл Жээнбаева

Финансы министри Бактыгүл Жээнбаеванын кол алдында иштегендер дагы жетекчисинин айлыгы тууралуу эч маалымат берген жок.

Бул аткаминер мурда Мамлекеттик ипотека компаниясынын, "Айыл Банк" ААКсынын төрайымы болгон. 2018-жылдын 13-декабрында КР каржы министри болуп дайындалган.

Макала чыккандан үч сааттан кийин министрдин айлыгы тууралуу маалымат беришти. Анда Жээнбаевага айына 48 900 сом каралганы, бирок колуна 40 098 сом тиери айтылган.

Санжар Муканбетов — 45 365 сом

Встреча вице-премьер-министра Кыргызской Республики Санжара Муканбетова  с членами Координационного Совета партнеров по развитию. 13 марта 2018 года
Экономика министри Санжар Муканбетов

Министрлердин ичинен эң көп айлык алганы Санжар Муканбетов. Бардык салыктарды жана жыйымдарды алып салганда колуна 45 365 сом тиет. Оклады бардык эле министрлердей болуп 24 миң сом. Калганы класстык чини, эмгек стажы жана купуялуулук үчүн төлөнөт.

Муканбетов бул кызматка келгенине эки гана айдын жүзү болду. Буга чейин Финансы рыногун жөнгө салуу жана көзөмөлдөө мамлекеттик кызматынын төрагасы, вице-премьер-министр болуп эмгектенген.

Эркинбек Чодуев — 32 405 сом

Министр сельского хозяйства, пищевой промышленности и мелиорации Эркинбек Чодуев во время дачи присяги в Жогорку Кенеше
© Фото / пресс-служба ЖК
Айыл чарба министри Эркинбек Чодуев

Жаңы дайындалган министрлердин бири Эркинбек Чодуев. Мурдагы айыл чарба министри Нурбек Мурашев картошка чуусунан сынга алынып жүрүп кызматтан кеткенден кийин анын ордуна келген. Буга чейин анын орун басары болчу. Чодуевдин министр катары айлыгы 40 миң сом. Анын ичинен колуна тийгени 32 405 сом. Анын 24,5 миңи оклад.

Жанат Бейшенов — 33 684 сом

Министр транспорта и дорог Кыргызской Республики Жанат Бейшенов на торжественной церемонии присяги новых членов Правительства Кыргызской Республики с участием Президента КР Сооронбая Жээнбекова.
© Фото / пресс-служба Жогорку Кенеша
Транспорт жана жолдор министри Жанат Бейшенов

Жанат Бейшенов транспорт жана жолдор министри болуп жыл башынан бери иштеп келе жатат. Бул министрликте 2005-2006-жылдары иштеген. Андан кийин дайыны чыкпай кетип, 2014-жылы премьер-министрдин кеңешчиси, ал эми 2017-жылдан тарта Евразиялык экономикалык кеңештин Транспорт жана инфраструктура департаментинин темир жол бөлүмүнүн жетекчиси болуп эмгектенген. Азыр ага министр катары 42 миң сом айлык бөлүнөт. Бирок салык жана кармап калуулардан кийин колуна 33 684 сом алат.

Нурболот Мирзахмедов — 29 225 сом

Министр чрезвычайных ситуаций Нурболот Мирзахмедов во время присяги
© Пресс-служба правительства / Сабыр Аильчиев
Өзгөчө кырдаалдар министри Нурболот Мирзахмедов

Буга чейин Эсеп палатасында аудитор болгон Мирзахмедовдун өзгөчө кырдаалдар министри болгонуна бир жыл үч ай болду. Ал азыр айлыгы эң аз министрлердин бири. Айына 36 миң сом маяна чыкса, кармагандан кийин колуна 29 225 сом тиет.

Гүлмира Кудайбердиева — 28 785 сом

Министр образования и науки Кыргызстана Гульмира Кудайбердиева во время визита к президенту Кыргызской Республики. 11 сентября, 2018 года
© Пресс-служба президента КР / Султан Досалиев
Билим берүү жана илим министри Гүлмира Кудайбердиева

Кыргызстандагы эл оозунан "түшпөгөн" министрлердин бири Гүлмира Кудайбердиева. Бул кызматта келе жатканына үч жылдын жүзү болду. Министр айымга билим берүү тармагы үчүн кылган кызматына ай сайын 35 миң 900 сом айлык чыгат. Бирок колуна 28 миң 785 сом берилет.

2017-жылкы декларациясы боюнча анын жылдык кирешеси 448 миң сомду түзгөн. Ошондой эле өзүнүн атына 92 чарчы метрлик батир катталган.

Космосбек Чолпонбаев — 26 985 сом

Министр здравоохранения Космосбек Чолпонбаев во время присяги
© Пресс-служба президента КР / Султан Досалиев
Саламаттыкты сактоо министри Космосбек Чолпонбаев

Эң аз айлык алган министр Космосбек Чолпонбаев. Бир айлык эмгек акысы 33,6 миң сом деп бааланса, кармап калуулардан кийин 27 миң сомго чукул акча алат.

Буга чейин жарыяланган декларациялардын арасында бул министрдики жок. Анткени мурда башка кызматтарды аркалаган. Мисалы, учурда өзү жетектеп турган Саламаттыкты сактоо министрлигинин Дары-дармек менен камсыздоо жана медициналык техника департаментинин директорунун орун басары болгон. Андан кийин Кыргызстандын Фармацевтика союзун башкарган.

Азамат Жаманкулов — 31 425 сом

Заместитель министра культуры, туризма и информации, глава Департамента туризма Азамат Жаманкулов во время интервью на радио Sputnik Кыргызстан
© Sputnik / Табылды Кадырбеков
Маданият, маалымат жана туризм министри Азамат Жаманкулов

Жаманкулов ушул тапта эң жаш министр. Маданият, маалымат жана туризм министрлигин жетектегенине октябрь айында бир жыл болот. Ага чейин ушул эле ведомствонун алдындагы Туризм департаментин үч жыл катары менен башкарган. Министрге ай сайын 39 миң сомдон бир аз көбүрөөк айлык каралган. Кармап калуулардан кийин анын эсебине 31 425 сом түшөт.

Улукбек Кочкоров — 35 645 сом

Экс-депутат Жогорку Кенеша Улукбек Кочкоров и Кандидат в президенты КР на теледебатах на канале КТРК
© Sputnik / Табылды Кадырбеков
Эмгек жана социалдык өнүктүрүү министри Улукбек Кочкоров

Улукбек Кочкоров Эмгек жана социалдык өнүктүрүү министрлигине келгенине бир жыл болду. Ага чейин Салык комитетинде бөлүм башчы, Жогорку Кеңештин V чакырылышынын депутаты болуп эмгектенген. 2017-жылкы президенттик шайлоого катышкан.

Азыркы айлыгы 44 миң сом, бирок кармап калуулардан кийин 35 645 сом алат.

7938
Белгилер:
айлык-акы, министр, өкмөт
Тема боюнча
Зеленскийдин президент катары алган айлыгынын суммасы айтылды
"КТ Мобайл" мамлекеттик компаниясындагылар канча айлык алат? Расмий жооп