Портфельчен адам. Архив

Президенттин аппараты портрет менен ойногон кызматкерлерди иштен албоону суранды

354
(жаңыланган 15:18 16.07.2019)
Жаш кызматкерлер буга чейин жоруктары үчүн кечирим сураган.

БИШКЕК, 16-июл. — Sputnik. Президент Сооронбай Жээнбековдун портрети менен ойногон Бишкек мэриянын кызматкерлери кызматтан кетпей турганын шаардык муниципалитеттин маалымат кызматынан кабарлашты.

Буга чейин социалдык тармакта кызматкерлердин бири тамашага салып, мамлекет башчы Жээнбековдун портрети менен кесиптешин ургулап жаткан кыска видео пайда болгон. Кабинетте үчүнчү адам да отурган.

Мындан сырткары, эки кызматкер бири-бирин "Чык эшикке" деп тамашалап жаткан. Жээнбеков 2017-жылы премьер-министр болуп турган кезинде өкмөттүн жыйынынан аткаминерлердин бирин так ушул сөздү айтып кууп чыккан.

Видео тарагандан кийин вице-мэр Алмаз Бакетаев пландык жыйын учурунда вице-мэр Азиз Алымкуловго, мэриянын аппаратынын жетекчиси Балбак Түлөбаевге жана "Бишкектеги унаа токтотуучу жайлар" муниципалдык ишканасынын жетекчиси Улан Жолдошовго тасмадагы кызматкерлерге жумуштан бошотууга чейинки катуу чара көрүү тапшырмасын берген.

Мэриядан кабарлашкандай, президенттин аппараты мэрия жетекчилигине кызматкерлерин иштен албоону сунуштаган.

Маалыматта муниципалитет өкүлдөрүнө түшүндүрүү иштери жүргүзүлө тургандыгы кошумчаланган.

354
Белгилер:
оюн, кызматкер, Бишкек мэриясы, президент, Сооронбай Жээнбеков
Тема боюнча
Портрет менен ойногон мэрия кызматкерлеринин кечирим сураган видеосу
Президенттин портрети менен ойногон мэриянын өкүлдөрү: бизди кечирип койгула