Кыз. Архивдик сүрөт

Колу байланып, керебетке таңылган кыздын тагдыры эмне болду? Окуянын чоо-жайы

361
(жаңыланган 16:12 02.08.2019)
Тестиердин апасы социалдык кызматкерлерден кызын үйгө кайтарууну суранып жатканы айтылат.

БИШКЕК, 2-авг. — Sputnik. "Өспүрүм" рейдинин алкагында Таш-Дөбө айылындагы үйдө керебетте байланып отурган тейде табылган кыздын абалы жакшы. Бул туурасында Аламүдүн райондук социалдык коргоо башкармалыгынын үй-бүлө жана балдарды колдоо бөлүмүнүн адиси Гүлмира Жапар кызы кабарлады.

Белгилей кетсек, 26-июль күнү каттоодо турган тынчы жок бүлөлөрдү текшерүү учурунда бир үйдөн колу таңылып, керебетке байланган тогуз жаштагы кыз табылган. Ал 69 жаштагы таенеси менен жашай турганы белгилүү болду.

"Рейд болгон күнү биринчи кезекте апасына чалсак, жумушта экенин айтып келе албастыгын билдирди. Туугандары кызды алып калуудан баш тартышты. Мындан улам аны Бишкектеги Балдарды коргоо борборуна жеткирүүнү туура көрдүк", — деди адис.

Жапар кызы Гүлмиранын айтымында, үйүнөн алып кетип жатканда тестиер өзүн жакшы сезип, өзү тамак жеп, сүйлөшүүдөн качкан эмес. Адистер анын катуу коркуп калганын байкаган жок. Ошондой эле мектебине барып кыз жана анын апасы тууралуу сурашканда жакшы маанайдагы мүнөздөмө беришкен.

"Апасы маал-маалы менен мектепке келип турат, ата-энелер чогулушуна да катышат. Бишкектеги ооруканада санитарка болуп иштегендиктен балдарына дем алыш күнү гана келип турат экен. Башка убакта алар таенесинин көзөмөлүндө болот. Кыз көчөдө ойногусу келип кача берчү экен. Коопсуздугуна тынчсызданган таенеси аны байлап коюптур", — деди Жапар кызы.

Буга чейин рейд учурунда табылган тестиер жарым жыл Балдарды коргоо борборунда болору айтылган. Бирок адис апасына түшүндүрүү иштерин жүргүзүү учурунда ал кызын үйгө кайтарууну суранганын белгиледи. Өзү иш графигин жөнгө салса, кызды өзүнүн үй-бүлөсүнө кайтаруу маселеси каралат. Азырынча кызды фостердик үй-бүлөгө (белгилүү бир убакытка чейин балдарды тарбиялап бере турган кесипкөй үй-бүлө) өткөрүп беришмекчи.

361
Белгилер:
адистик, социалдык кызматкер, эне, кыз, Бишкек
Тема боюнча
Мас энесинин ойгонушун күтүп отурган наристе. "Өспүрүм" рейдинен сүрөт
Кыйнап арак ичирген 6 жаштагы бала чарчап калды. Дарыгердин түшүндүрмөсү