Халал продукциясы. Архивдик сүрөт

Депутаттар азык-түлүктөгү "Халал" деген жазуудан күмөн санап жатышат

127
(жаңыланган 13:23 05.09.2019)
Министр айрым өндүрүүчүлөрдүн "Халал" деп өз алдынча эле жазып алган учурлары бар экенин айтты.

БИШКЕК, 5-сен. — Sputnik. Жогорку Кеңештин депутаты Марлен Маматалиев азыр Кыргызстандагы бардык эле азык-түлүккө "Халал" деген жазуу жазылып жатканын, аны ким көзөмөлдөй турганына кызыгып, маселени парламенттин жалпы жыйынында көтөрдү.

Бүгүн депутаттар "2019-жылдын 6-апрелинде Марокконун Марракеш шаарында кол коюлган Кыргызстан менен Ислам өнүктүрүү банкы жана Жеке секторду өнүктүрүүнүн ислам корпорациясынын ортосундагы "Кыргыз Республикасындагы адал эт паркы" долбоорунун техникалык-экономикалык негиздемесин даярдоо үчүн техникалык жардам алууга грант берүү жөнүндө макулдашууну ратификациялоо тууралуу" мыйзамдын долбоорун карап жатат. Ал биринчи окууга киргизилет.

Экономика министри Санжар Муканбетов текшерүүнү сертификациялоо органдары жүргүзөрүн айтты. Андан сырткары, санитардык-эпидемиологиялык көзөмөл борбору да жүргүзөт. Министр ошондой эле текшере турчу ар бир органда атайын инспекторлор окуудан өткөнүн билдирди.

"Биз Ислам өлкөлөрүнүн стандарттары жана метрология институтуна мүчө болгондон кийин ошол жааттагы профессорлор бизге келип окуу өткөрүп, сертификаттарын берген. Ошонун алкагында сертификациялоо органдары менен Санэпидемкөзөмөл борборунун текшерүүгө толук укугу бар", — деди Муканбетов.

Депутат Маматалиев "демек азыр продукцияларда "Халал" деген жазууга толук ишенсе болобу?" деп суроо салды.

Өз кезегинде Муканбетов "эгер ал Кыргызстандын сертификаттоо органдары тарабынан берилсе, ишенсе болорун" айтты.

"Кээ бири берилди деп эле жазып алып жатат. Биздин сертификациялоо органы жана Кыргызстан мусулмандарынын дин башкармалыгы (КМДБ) менен чогуу берилген болсо, анда ал адал стандартына туура келет", — деди министр.

Маматалиев КМДБ менен сертификациялоо органы берген белгилеринин кандай болорун тактап, ал боюнча коомчулукка кеңири маалымат берүү керектигин кошумчалады.

127
Белгилер:
санитардык, фитосанитардык жана ветеринардык чаралар боюнча департаменти, көзөмөл, сертификациялоо, эт, адал, халал
Тема боюнча
Кыргызстандыктардын ичкен-жегени акыркы 28 жылда кандай өзгөрдү. График
Кыргызстандагы малдын баасына саресеп. Аймактардагы нарктын графиги