Ош базарындагы соодагерлер. Архив

"Ош" базары жарыкка 10 күндөн кийин кошулат. Соодагерлер менен мэрдин сүйлөшүүсү

84
(жаңыланган 16:09 25.09.2019)
"Берекет универсал" чакан базарынын сатуучулары базарды муниципалдык кылууну жана электр энергиясын туташтырып берүүнү талап кылып Жогорку Кеңештин алдына митингге чыкты.

БИШКЕК, 25-сен. — Sputnik. "Ош" базарынын аймагындагы "Берекет универсал" базарына 10 күндүн ичинде электр энергиясы берилет. Бул тууралуу сатуучулар менен мэрдин жолугушуусунда айтылды.

Бүгүн, 25-сентябрда, 150гө жакын сатуучу Жогорку Кеңештин имаратынын алдына митингге чыгып, бир нече талап койгон болчу.

Сатуучулар менен "Берекет" базарынын директорлор кеңешинин төрагасы Болотбек Бегалиевдин арыз-муңун уккан мэр Азиз Суракматов "Бишкек башкы архитектура" менен "Түндүк электр" ишканаларынын өкүлдөрүнө 10 күн ичинде маселени чечип, базарга электр энергиясын кошууну тапшырды.

Эскерте кетсек, "Берекет универсал" кичи базарын жаап, ал жерге соода комплексин куруу пландалууда. Буга каршы болгон соодагерлер жыл башынан бери эле митингге чыгып, мамлекеттик органдарга кайрылып келишет. Алар "эгер базар жабылса, кайда барабыз?" деп нааразы.

Базар жетекчилиги мурда өрттөнгөн базардын ордуна курулган имараттын ичинен күркө сатып алууну сунуштаган. Бирок соодагерлердин айтымында, анын бир чарчы метри — 1500 доллар. Мындан сырткары, күн сайын ар бир чарчы метрине 50 сомдон ижара төлөшү керек. Эгер 10 чарчы метр жерде иштесе, ижарага айына 15 000 сом кетет.

84
Белгилер:
талап, мэр, митинг, Ош базары
Тема боюнча
"Ош" базарынын сатуучулары кайрадан митингге чыгышты. Талаптары