Билим берүү жана илим министрлиги. Архивдик сүрөт

23 жаштагы мугалим кантип "Билим берүүнүн мыктысы" болду? Министрликтин жообу

1818
(жаңыланган 17:17 07.10.2019)
Министрлик жаш мугалимге сыйлык берүүдө эч кандай мыйзам бузулбаганын айтып, ал боюнча түшүндүрмө берди.

БИШКЕК, 7-окт. — Sputnik. Ош шаарында иштеген 23 жаштагы мугалимдин "Билим берүүнүн мыктысы" төш белгисине ээ болгону боюнча Билим берүү жана илим министрлиги түшүндүрмө берди.

Буга чейин интернет булактарына сыйлыкты министр Каныбек Исаков өзүнүн жакынына берди деген маалымат тараган. Бирок министрлик муну четке какты.

"Министр менен мугалимдин эч кандай тууганчылык жайы жок. Сөз болуп жаткан Бактыгүл Жапар кызы Билим берүү жана илим министрлигинин сыйлыктар жөнүндөгү жобосунун негизинде, мыйзамдуу түрдө төш белгиге татыган. Ал №50 Паиз Нышанов атындагы мектептин география мугалими. Ош шаарында өткөрүлгөн "Жылдын мыкты мугалими 2019" конкурсунун жеңүүчүсү болгондугуна байланыштуу Ош шаардык билим берүү башкармалыгынын сунушунун негизинде "Билим берүүнүн мыктысы" төш белгиси менен сыйланды", — деп айтылат маалыматта.

Тактоо үчүн министрлик 2018-жылдын 12-февралындагы №157/1 буйрук менен бекитилген ведомстволук сыйлыктар жөнүндөгү жобонун 7-пункту (Сыйлыкка көрсөтүүдө комиссиянын өзгөчө учурларда кароо тартиби жөнүндө) менен тааныштырды.

Билим берүү жана илим министрлигинин ведомстволук сыйлыктар боюнча комиссиясы өзгөчө учурларда министрликтин Ардак грамотасы менен сыйланбаган адамдарга төмөнкү учурларда сыйлык бериши мүмкүн:

"Жыл мугалими" сынагында, республикалык жана эл аралык масштабдагы сынактардан 1-2-3-орунду ээлегендерге;

Окуучулары республикалык, эл аралык олимпиадалардан, дүйнөлүк жана Азия оюндарынан жеңүүчү болгон мугалимдерге;

Республикалык же көз карандысыз рейтингдерде алдыңкы катарга чыккан, билим берүү тармагынын өсүп-өнүгүшүнө, материалдык-техникалык базасын чыңдоого, жогорку көрсөткүчтөргө жетишкендерге "Билим берүүнүн мыктысы" төш белгиси жана Ардак грамота берүүгө мыйзам жол берет.

Буга чейин дал ушундай сыйлык Жогорку Кеңештин депутаты Тазабек Икрамовго берилгенде министрлик "Билим берүүнүн мыктысы" төш белгисин берүү жол-жобосун айтып берген.

1818
Белгилер:
министрлик, сыйлык, мыктылар, төш белги, Билим берүү министрлиги
Тема боюнча
"Мыкты" боло албаган мугалим көп. Икрамов алган төш белги кимге берилиши керек
Тигүүчү, тамада, ырчы. Өз кесибинен тыш кошумча жумушта иштеген мугалимдер