Муштум. Архив

Маршрутка айдоочусун бет талаштыра койду делген жигиттин ким экени такталды

3123
(жаңыланган 12:53 12.10.2019)
Издөө иш-чараларынын натыйжасында аталган кылмышка шектүү катары 24 жаштагы К.Н. аттуу жаран кармалып, Ленин РИИБине алып келинген. Андан соң суракка келүүгө милдеттендирилип кое берилгени айтылды.

БИШКЕК, 12-окт. — Sputnik. Бишкек шаардык милициясы Ленин РИИБ кызматкерлери менен бирге маршрутка айдоочусуна кол көтөрдү деген шек менен 24 жаштагы кишини кармап, бөлүмгө алып келишти. Бул тууралуу ШИИБ билдирди.

Эскерте кетсек, социалдык тармактарга маршрутканын эшигин ачып, орто курактагы айдоочуну ай-буйга келбей бет талаштыра чаап, жулкулдатып жаткан жигиттин видеосу тараган. Аны жолдон өтүп бараткан киши тартып алган. Видеодон "Ай, сен эмне кылып жатасың?" деп кыйкырып жаткан аялдын үнүн угууга болот. Ошондой эле эркек кишинин дагы "Өзүңдөн улуу киши экен, эй жигит!" деп жатканы тартылып калган.

Тараган видеону шаардык милиция текшерип, айдоочуга кол көтөргөн адамды издеп жатканын белгилеген.

"Милицияга 10-октябрь күнү саат 18.35те Toyota үлгүсүндөгү унаанын айдоочусу маршруттук такси айдап бара жаткан адамга кол көтөрүп, из жашырып кеткени кабарланган. Ошол эле күнү С.Т. аттуу жарандан Mercedes-Benz Sprinter унаасын айдап баратып, экинчи тилкеге өткөнүн, ошол маалда Toyota машинасынын айдоочусу андан ашып өтүп токтоп, түшүп, кол көтөргөнүн айтып арыз жазган", — деп айтылат маалыматта.

Аталган факты Кылмыш-жаза кодексинин 65-беренесинин («Токмокко алуу») негизинде Кылмыш жана жоруктар реестрине каттоого алынып, сотко чейинки иштер башталган. Иликтөөнүн материалдары боюнча тийиштүү экспертизалар дайындалган.

Издөө иш-чараларынын натыйжасында аталган кылмышка шектүү катары 24 жаштагы К.Н. аттуу жаран кармалып, Ленин РИИБине алып келинген. Андан соң суракка келүүгө милдеттендирилип кое берилгени айтылды.

3123
Белгилер:
машина, жол, ур-токмокко алуу, маршрутка, айдоочу
Тема боюнча
Милиция маршрутканын айдоочусун бет талаштыра чапкан кишини издеп жатат