Президент Сооронбай Жээнбеков. Архивдик сүрөт

Жээнбеков: көөнө өнөрүбүздү сактап, өркүндөтүүгө өзгөчө көңүл бөлүнүүдө

101
(жаңыланган 11:11 02.11.2019)
Мамлекет башчы маданият чөйрөсүнүн жаш муунду мекенчилдикке, жаратмандыкка тарбиялоого кошкон салымы баа жеткис экенин белгиледи.

БИШКЕК, 2-ноя. — Sputnik. Президент Сооронбай Жээнбеков бүгүн, 2-ноябрда, маданият жана искусство ишмерлерин кесиптик майрамы менен куттуктады. Бул туурасында президенттин маалымат кызматы билдирди.

Өлкө башчысы маданият коомдук жүрүм-турумдун нормаларынын системасы, ыймандуулук жана интеллектуалдык байлыктын, элибиздин дүйнө таанымынын казынасы экенин белгиледи.

"Мамлекет тарабынан маданиятыбызды, ата-бабаларыбыздан калган көөнө өнөрүбүздү сактап, андан ары өркүндөтүүгө өзгөчө көңүл бөлүнүп жатат. Бардык багытта: адабият, театр, кино, сүрөт, музыка жаатында жаңы табылгалар менен улуттук маданиятты өнүктүрүп жатканыңыздар үчүн ыраазылык билдирем", — деди Жээнбеков.

Ошондой эле Жээнбеков маданият чөйрөсүнүн жаш муунду мекенге, дүйнөгө болгон көз карашын калыптандырууга, мекенчилдикке, атуулдук намыска, жаратмандыкка тарбиялоого кошкон салымы баа жеткис экенин билдирди.

"Сиздер улуттук асыл дөөлөттөрүбүздү, кылымдардан бери келе жаткан нарктуу салтыбызды азыркы муунга сиңирип, урпактарга жеткирүүгө багытталган эмгегиңиздер менен коомубуздун урматына ээ болдуңуздар. Көөнөрбөс руханий мурасыбызды бөксөртпөй сактоого, элибиздин маданий казынасын байытууга кошкон баа жеткис салымыңыздарды жогору баалайбыз", — деп айткан куттуктоо сөзүндө.

Ошондой эле ал бардык маданият кызматкерлерине бекем ден соолук, бакубат жашоо жана чыгармачылык ийгиликтерди каалаган.

101
Белгилер:
майрам, Сооронбай Жээнбеков, куттуктоо, маданият
Тема боюнча
Асанбаева: жыл аягына чейин музей кызматкерлеринин маянасы көтөрүлөт
Бийликке ишеним милиционерден башталат. Жээнбеков тартип сакчыларын куттуктады