Психологго кайрылган аял. Архивдик сүрөт

Турмушка чыгайын десем уулум каршы болууда... Аялдын каты

13852
(жаңыланган 14:27 16.11.2019)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет. "Психолог менен баарлашуу" рубрикасынын бул жолку чыгарылышында жашы өтүп калганда турмушка чыгар-чыкпасын билбей жаткан аялдын каты жарыяланды.

...Саламатсыздарбы? Жакын арада чоң бир чечим кабыл алышым керек болуп жатат. Бир тууган, жакын санаалаштарга айтсам "өзүң чеч" деп коюшту. 

40 жашымда күйөөдөн калдым. Жолдошум ооруп жүрүп каза болгон, бир уул, эки кызым бар. Кичүү балам тогуз жашта болчу. Кыздарым чоңоюп калган. Күйөөм каза болгон кезде айылдан шаарга көчүп келип там салып жатканбыз, бүтпөй калды.

Жолдошумду жоктоп бир жыл үйдө отурдум. Бирок шаар айыл эмес экен, балдарымдын баскан-турганы бүт акча болгондуктан, белди бекем бууп иштей баштадым. Кафе-ресторандарда идиш жуугуч болуп жүрүп, кийин администраторго чейин жеттим. "Балдарым эч нерседен кем болбосун" деп кошумча эки-үч жумушка чыгып, айтор, бардык күчүмдү жумшадым.

Тамды салып бүтүргөнгө бир туугандарым да жардамдашты. Ошентип жүрүп кантип 10 жыл өтүп кеткенин билбей калдым. Азыр 49дамын. Улуу кызым турмушка чыккан, жолдошу экөө Россияда иштейт. Экинчи кызым менен уулум студент. Азыр деле шаардагы тойканалардын биринде администратормун. Эки жылдан бери өзүмөн эки жаш улуу адам колумду сурап жүрөт. Анын да жубайы ооруп каза болуп калыптыр. Турмушка чыккан бир кызы бар экен.

Башында так секирип "болбойт" деп койгом. Бирок убакыт өткөн сайын анын жакшы адам экенине көзүм жетти. Оор басырыктуу, түшүнүктүү адам көрүнөт. Мурда мамлекеттик кызматта иштечү экен, азыр чакан бизнес менен алектенет.

Тиги кишинин колумду сурап жатканын кыздарыма айтсам каршы болушкан жок. Жакында эле уулума четин чыгардым. "Күйөөгө тийип кетсемби" деп тамашаламыш болуп койсом кызарып, жинденип кирди. Ошол бойдон унчуккан эмесмин. Өткөндө уулум экөөбүз жалгыз калганда да айттым,  так секирип болбой койду. "Элдин, балдардын көзүн кантип карайбыз, карыганда жөн отуруңуз, сизди өзүм эле багып алам" деп караманча каршы болуп туруп алды. Эмне кылышты билбей жатам. Балдарымдын кашында жөн отурайын дейм, алар кийин өзүнчө бүлө куруп кеткенде жалгыз калуудан корком. Анын үстүнө колумду сураган адамды жактырам. А бирок ага тийсем уулум менден кол үзүп кетеби деп чочулайм. Жаш неме өзүн бир нерсе кылып салбасын деп да санааркачу болдум. Кандай кылсам туура болорун билбей башым катты...

Гүлнара Жасоолова:

— Биринчиден, 49-50 жаш дасыккан курак, аябай деле жашы өтүп улгайды дегенге кирбейт. Уулунун так секирип каршы болгонунун деле жөнү бар. Анткени апасы ага өмүрү "күйөөгө тием" деп айткан эмес. Биринчи укканда эркек бала, албетте, "макул" дебейт. Анын үстүнө азыр уулунун өткөөл курагы экен. Эгер кат жазган аял колун сураган эркекти чындап жактырып, аны менен бактылуу болоруна көзү жетсе, баласын көндүрсө болот. Акырындан жубатып, айтып түшүндүрө берсин. Уулун да түшүнүш керек. Себеби энеси дайыма жанында болгондуктан, аны башкага ыраа көрбөй, көнө албай жаткандыр. Жашы өткөн сайын ага да акыл-эс кирет.

Дагы бир кеңешим, бул аял колун сурап жаткан адам менен уулун тааныштырып көрсүн. Ал киши балага "апаңды сыйлап өтөм, жакшы көрөм" деп айтып, ынандырышы керек.

Баланы багып, чоңойтуу эненин милдети, бирок бакыт аны менен чектелбейт. Ар бир адам өз бактысы үчүн күрөшүү керек. Уулуңузга зыянын тийгизбей турмушка чыгайын десеңиз аны акырындык менен көндүрүңүз. Ага бир аз убакыт керек. Эгер таптакыр болбой жатса психолог менен сүйлөштүрүп көрүңүз.

13852
Белгилер:
турмуш, үй-бүлө, психолог, эне, бала
Тема:
Психолог менен баарлашуу (122)
Тема боюнча
Камкор кайнагамды жактырып калдым. Келиндин каты
Күйөөмө бой сала албай койдум... Ата-энеси кудалашкан жерге барган келиндин каты
Мектептеги окуучулар. Архив

Кыргызстанда окуучулар кайсы айда мектепке барары айтылды

2505
(жаңыланган 22:40 30.09.2020)
Мектептерде ар кандай иш-чаларды өткөрүүгө жана ата-энелер менен башка уюмдардын өкүлдөрүнүн имаратка кирүүсүнө уруксат жок.

БИШКЕК, 30-cен. — Sputnik. 2020-жылдын 6-октябрынан тарта 1-класстан 6-класска чейинки окуучулар жалпы билим берүү мекемелеринде салттуу түрдө окуй баштайт. Мындай чечим Республикалык ыкчам штабдын отурумунда кабыл алынды.

Маалыматка караганда, 2020-2021-окуу жылында 1-6-класстын окуучулары үчүн билим берүү процессин реалдуу режимде жандандырууда санитардык-гигиеналык нормаларды сактоо боюнча иш-аракеттердин алгоритми иштелип чыкты. 

Ага ылайык, окуучулардын жана мугалимдердин ден соолугу медицина кызматкерлери тарабынан көзөмөлдөнүп, мугалимдердин дене табы өлчөнүп турууга жана бет кап режимин сактоого тийиш. Окуучулар окуу процессинде аралыкты сактоо менен отургузулат. Алар колдорун бат-бат жууп турушу үчүн тиешелүү каражаттар менен камсыз кылынат.

3D китебинин автору: оюн түрүндөгү "Ойнобук" баланын акылын өстүрөт

Ошондой эле кызматкерлердин, үй-бүлө мүчөлөрүнүн ден соолугу, аларда илдеттин белгилеринин бар-жогу боюнча анкета толтурулуп турат.

“Эгерде мектепте окуучулардын саны 200гө чейин болсо, план боюнча бекитилген расписаниеге ылайык кадимки режимде окуу процесси уюштурулат. Ал эми балдардын саны 350гө чейин болсо, ийкемдүү расписание боюнча окутулат. Тагыраагы, сабактардын башталышы жана тыныгуулар ар кандай убакытта уюштурулат. Мисалы, 1-2-класстарда сабак 8.00дө башталса, 3-4-класстар саат 8.30га келишет. Балдардын саны 500гѳ чейин болсо, кезектешүү негизде болот. Мисалы, 1-2-3-класстар 1-кезметте, 4-5-6-класстар 2-кезметте окушат. Ашканада тамактануу процесси да смена боюнча уюштурулат”, — дешти штабдан.

Муну менен катар мектептерде ар кандай иш-чаларды өткөрүүгө жана ата-энелер менен башка уюмдардын өкүлдөрүнүн имаратка кирүүсүнө уруксат жок.

Ал эми мектеп балдар келгенге чейин дезинфекцияланууга тийиш. Бирок бул иш-чарада пайдаланыла турган каражаттардын концентрациясы белгиленген өлчөмдө гана колдонулат.

2505
Тема:
Коронавируска байланыштуу Кыргызстандагы кырдаал
Тема боюнча
5-октябрдан тарта башталгыч класстар мектепке барып окуйбу? Расмий жооп
Кол чатыр көтөргөн кыз. Архив

Бейшембиге карата аба ырайы

55
(жаңыланган 21:03 30.09.2020)
Бейшембиге караган түнү айрым райондордо жамгыр жаап, тоолуу өрөөндөрдө кар жаашы күтүлөт.

БИШКЕК, 30-сен. — Sputnik. 1-октябрь, бейшембиде, күндүз Талас облусунун кээ бир райондорунда, Ысык-Көл, Нарын жергесинин көпчүлүк аймактарында, Чүй, Ош, Жалал-Абад, Баткен облустарынын тоо этектеринде жамгыр жаап, тоолуу жерлерге кар түшөт. Бул тууралуу Кыргызгидромет билдирди.

Батыштан соккон шамалдын ылдамдыгы секундасына 4-9 метрге жетет.

Жер көчкөн Кара-Кече көмүр кенине электр жарыгы берилди. Сүрөттөр

Абанын температурасы Чүйдө +14...+19, Талас, Нарын жана Ысык-Көл аймактарында +12...+17, Ош, Жалал-Абад, Баткен облустарында +16...+21 градус болот.

Термометрдин көрсөткүчү борбор калаабыз Бишкекте +17...+19, Ош шаарында +18...+20 градусту көрсөтүп турат.

55
Белгилер:
Кыргызстан, аба ырайы
Тема боюнча
Кыштын илеби жакындап... Октябрь айына карата аба ырайы
АКШнын Киевдеги элчилигин имараты. Архив

Киевде АКШ элчилигинде иштеген аялдын өлүмүнүн себеби иликтенип жатат

0
(жаңыланган 22:39 30.09.2020)
Алгач полиция аялды өлтүрө сабап кетишкенин билдирсе, кийинчерээк жергиликтүү баслымага укук коргоо органдарындагы ишенимдүү адам аны поезд коюп кетиши мүмкүндүгүн маалымдаган.

БИШКЕК, 30-сен. — Sputnik. Украинанын борбору Киевде АКШ элчилигинин кызматкеринин өлүмү иликтенип жатат. Бул тууралуу РИА Новости жазды.

Киев Улуттук полициясынын маалымат кызматы дипөкүлчүлүктүн кызматкери ооруканага токмок жеп түшкөндөн кийин каза тапканын билдирген. Укук коргоо органдары окуянын жагдайын тактап жатат.

Трамп: полиция кызматкерлерин жөн жерден атып кеткен киши өлүм жазасына тартылат

Полициядан билдиришкендей, шаршемби күнү Киев шаарынын Шевченко районундагы темир жол каттамына жакын жердеги токойлуу аймакта башынан жаракат алган аял жатканы тууралуу маалымат түшкөн. Ал жакка полиция кызматкерлери жана башка кызматтардын өкүлдөрү жөнөп кеткен.

"Аял эс-учун жоготкон абалда ооруканага жаткырылып, кийин ал ошол жерден көз жумган. Жабырлануучунун буюмдарын текшерүү учурунда анын АКШ элчилигинде иштей турганын тастыктаган күбөлүк табылган. Ыкчам иликтөө иш-чараларынын натыйжасында кызматкерге кол салышы ыктымал делген адамдын болжолдуу портрети түзүлүп, изделип жатат", — деп айтылат маалыматта.

Украина полициясынын өкүлдөрү РИА Новостиге маркумдун жарандыгы тактала электигин билдиришкен. Жергиликтүү маалымат каражаттарынын жазышынча аялдын аты Санвер Никаело болгон.

Андан кийин "Цензор.НЕТ" басылмасы укук коргоо органдарындагы ишенимдүү адамга таянуу менен элчиликтин кызматкерин поезд коюп кетиши ыктымалдыгын жазган. Аял кулакчын тагынып алып темир жол жакта чуркаганы божомолдонгон.

Ошондой эле маалымат берген киши элчиликтин кызматкери желке тушунан оор жаракат алганын кошумчалаган.

0
Белгилер:
иликтөө, өлүм, кызматкер, элчилик, АКШ, Киев, Украина
Тема боюнча
Киев: бомба жардырам деген өзбекстандыкты аскерлердин кармаган учуру. Видео