Sputnik Кыргызстан агенттигинин шеф-редактору Эркин Алымбеков. Архив

"Ак жарыкты" баштайбыз! Баш редактордун окурманга каты

759
(жаңыланган 15:04 05.12.2019)
"Ак жарык" — биздин коомго учурда зарыл болуп турган жаңы рубрика. Акыркы жылдары, айлары, күндөрү кыргызстандыктарга терс маалыматтар көп жана тез тарап жатат. Бул туура эмес энергия болгон-бүткөн дасмиябызды, байымдуулугубузду жутуп жаткандай сезилет.

Муну мен жакында эле коңшум экөөбүз айдап жүргөн машинабыз менен бири-бирибизге орун бербей тирешкенде түшүндүм. Азыр эстесем, албетте, күлкүм келет, бирок учурунда ачууга алдырдык. Акырында жолду мен бошотуп бердим, бирок өзүмдүн да, анын да маанайын буздум. Буга мени эмне түрттү? Эмнеге минттим? Анан баарын дыкаттык менен көз алдыма келтирип ойлоно баштадым. Коңшума чейин эле ачуум келип жүргөн, абдан ачуулангам. Анан терс энергияны көтөрүп жүргөнүмдү түшүндүм. Кыязы, ошол жүктөн кутулгум келген окшойт. Коңшум башта сылык-сыпаа адам көрүнгөнү менен сөгүнүп-сагынып, ошол учурда таанылгыс эле.

Бир маалда айланамда канча жакшы иштер болуп жаткандыгын эстедим. Бир ирет бургер алганы кезекте тургам. Башкалар алдыдагы өспүрүмдөрдүн 50 сому жетпей калганын алардын бири чөнтөгүн сыйпалай баштаганда түшүндү. Жанында кезекте турган чоочун эле киши унчукпай 50 сом сунду. Рахматын айткан балдар гамбургер сатып алышты. Менин эсимде ушул учур калыптыр. Кайсы жакшы окуя эсимде сакталып калды эле деп өзүмө суроо узатканда дал ушул ирмемди эстедим. Балким алар эбак чоңоюп, баягы 50 сомду такыр эле унутуп калгандыр. Ал тургай акча берген киши деле эсинен чыгарып койсо керек. Бирок менин жадымда экен.

Кечээ ишке келип, кеңседен тааныш көрүнүштү байкадым — кезектеги негатив жаңылык агенттиктин кээ бир кызматкерлеринин ачуусун келтириптир. Бир катарлары өз пикирлерин айтып, ал эми биздин команда ушул үчүн эки лагерге бөлүнүүгө даяр эле. А мен эсимде калган жанагы жакшылыктын илебин жайылтууну эңсеп турдум.

Жаңы рубрика "Ак жарык" деп аталат. Бизди окуган адамдардын көңүлүн күн сайын, мүнөт сайын кайсы бир көчөдө, кайсы бир жерде жасалып, бирок биз байкабай калган жакшылыктарга бурсак дейбиз. Себеби биздин көңүлүбүз трагедиялуу же ачууну келтирген жаңылыктарга бурулуп калган. Менин баамымда, мындан баары чарчап бүттү. Рубрика өлкөбүздө болгон көйгөйлөрдү көз жаздымда калууга чакырбайт. Албетте, аларды да чечиш керек. Бирок ызы-чуу, паника менен эмес. Кеп-сөзгө келип, адилеттүүлүк менен тынч эле, тагыраагы, адамгерчилик менен жайгарса болот.

Эсиңизде болсо керек, Чыңгыз Айтматовдун "Эң кыйыны — күн сайын адам болуу" деген сөзү бар эмеспи.

Мындан ары Sputnik Кыргызстан сайтынан акыркы күндөрү бизге жетишпей жаткан жакшы, жарык окуялар туурасында окуп, жылуулук ала аласыз! Анда кеттик!

Эгер кандайдыр бир жүрөк жылыткан, жылмаюу тартуулаган ирмемдериңиз болсо, news@sputnik.kg дареги аркылуу биз менен бөлүшүп коюуну унутпаңыз.

759
Белгилер:
ак жарык, жакшылык, Кыргызстан
Тема:
Ак жарык (26)
Тема боюнча
Жумушуна 5 саат жөө баскан официант кызга кардарлары унаа белек кылышты
Жаза аткаруу боюнча мамлекеттик кызматтын кызматкери иш учурунда. Архив

Укук коргоочулар: түрмөдө COVID жуктургандар көп. Ага ЖАМКтын жообу

64
(жаңыланган 01:00 29.10.2020)
Укук коргоочулардын айтымына караганда, ЖАМКтын жабык мекемелеринде коронавирус инфекциясын жуктуруп алган учурлар көп кездешүүдө.

БИШКЕК, 28-окт. — Sputnik. Жаза аткаруу мамлекеттик кызматы эркинен ажырагандар отурган абактарда коронавирус инфекциясы көбөйүп кеткени боюнча билдирүү туура эмес деген маалымат таратты.

Буга чейин бир топ укук коргоочулар — Акыйкатчы институту, Кыйноолордун алдын алуу боюнча улуттук борбор "Бир дүйнө — Кыргызстан" укук коргоо уюмунун тартылган эксперттери менен чыгарган маалымат таратылган. Алар абактарда, психиатриялык ооруканаларда, балдар үйүндө коронавирус боюнча жүргүзүлгөн иликтөөнүн жыйынтыгын жарыялашкан.

Алар Жаза аткаруу мамлекеттик кызматтын (ЖАМК) жабык мекемелеринде COVID-19ду жуктуруп алган көп учурлар бар, ал эми айып салып кармап турган өзүнчө жайларда отургандар үчүн шарттар түзүлгөн эмес дешкен.

Садыр Жапаров: абакта жатканда коронавирус менен ооруп айыктым

"COVID-19 башталгандан тарта ЖАМКта коронавирустун тарап кетишине жол бербөө, аны алдын алуу боюнча иштер жүргүзүлүп келет. Андан сырткары, профилактикалык жана эпидемияга каршы тиешелүү аракеттер көрүлүп турат", — дешкен аталган ведомстводон.

ДССУнун, Саламаттык сактоо министрлигинин сунуштамаларын жана кылмыш-аткаруу системасынын өзгөчөлүгүн эске алып, эл аралык Кызыл жарым ай коомунун көмөгү менен ЖАМКтын медициналык кызматы атайын алгоритмдерди иштеп чыккан.

Алар COVID-19ду профилактикалоо жана аталган инфекцияга чалдыгышы мүмкүн деген адамдарды табуу боюнча түзүлгөн.

"Соттук-медициналык экспертизанын бүтүмүнө ылайык, пневмония илдетинен ЖАМКтан төрт киши, ал эми COVID-19дан эки киши каза тапты. Былтыркы жылы ушундай мезгил ичинде пневмониядан үч киши көз жумган", — деп айтышты ЖАМКтан.

Мамлекеттик кызматтан Жазык-аткаруу кодексине ылайык, айып изоляторунда кармалып тургандарга төшөнчү, шейшептер уктаган учурда гана берилет деп кошумчалашкан.

Ведомстводон тартип коргоочулар ЖАМК мекемелериндеги абалды туруксуздаштыруу максатында жасалма нерселерди түзүп жатат деп айтышкан.

64
Белгилер:
билдирүү, укук коргоочу, жугуу, коронавирус, түрмө, ЖАМК, Кыргызстан
Тема:
Кыргызстандагы коронавирус жуктуруп алгандар
Тема боюнча
COVID-19 дагы эки кишинин өмүрүн алып кетти
Шаардык парк

Бейшембиге карата аба ырайы

48
Бейшембиге караган түнү өлкөнүн көпчүлүк райондорунда жамгыр, тоо этектеринде жана тоолуу аймактарында кар жаайт.

БИШКЕК, 28-окт. — Sputnik. Бейшемби күнү, 29-октябрда, күндүз республиканын айрым аймактарында жамгыр, тоо этектеринде жана тоолуу райондорунда кар жаайт. Бул тууралуу Кыргызгидромет билдирди.

Чүй менен Талас облусунун өрөөндөрүндө жаан карга айланат. Түнкүсүн жана эртең менен кээ бир райондордо туман түшүшү мүмкүн.

Батыштан соккон шамалдын ылдамдыгы секундасына 4-9 метрден Ысык-Көл, Нарын жергесинде 15-20 метрге жетет.

Бишкекте абаны булгаган автоунааларды аныктоо үчүн рейд жүрүүдө. Видео

Абанын температурасы Чүйдө +4...+9, Талас менен Ысык-Көл аймагында +3...+8, Ош, Жалал-Абад жана Баткен облустарында +9...+14 жана Нарында +1...+6 градус болору айтылды.

Абанын температурасы Бишкекте +7...+9 жана Ош шаарында +12...+14 градусту көрсөтөт.

48
Белгилер:
Кыргызстан, октябрь, аба ырайы
Тема боюнча
Адаттагыдан суук болот. Ноябрга карата аба ырайы
ӨКМ кызматкерлери. Архив

Токмоктун базарында чыккан өрттү толугу менен өчүрүштү

0
(жаңыланган 00:22 29.10.2020)
Токмоктун базарындагы дүкөндөн чыккан жалынды өрт өчүрүүчүлөр болжол менен эки сааттан ашык алышып жатып өчүрүшкөн.

БИШКЕК, 29-окт. — Sputnik. Токмоктогу "Булак" базарынын аймагында эт саткан дүкөндөн чыккан өрттү үч бригада өчүрдү. Бул тууралуу ӨКМдин маалымат кызматынан кабарлашты.

"Тилсиз жоо алгач чектөөгө алынып, андан кийин толугу менен саат 23:29да өчүрүлдү", — деп билдирди маалымат кызматы.

Эске салсак, ӨКМге Токмок шаарынын базарындагы дүкөндөрдүн биринен чыккан тилсиз жоо тууралуу маалымат 19:12де түшүп, ал жерге үч бригада жөнөп кеткени кабарланган.

Министрликтен кырсыктан жабыркагандар жок экендигин айтышты. Өрттүн жалпы аянты болжол менен 600 чарчы метрге жеткен. 

0
Белгилер:
видео, өрт, базар, Токмок, Кыргызстан
Тема боюнча
Ош шаарындагы өрт: эки киши ооруканага түштү