Тигүү цехинин кызматкерлери. Архив

Ак жарык. Канададан баштыкка буюртма берип, өмүр узарткан мекендештер

1856
(жаңыланган 15:46 09.12.2019)
Адамдын көңүлү — гүл. Жылт эткен жарык, үлп эткен жел, жакшы көз караш, жагымдуу айтылган сөз маанай көтөрүп, ал тургай бир нече күн жүрөктү жылуулук аралап жүрөт.

Бүгүнтөн тарта окурмандарга жылуулук чачкан, жакшылык кылууга чакырган макалаларды жарыялап турууну чечтик. Алгачкы "Ак жарыкты" жазуу шыбагасы кабарчыбыз Таалайгүл Усенбаевага буюрду.

Жакшы жаңылык жазып, көңүл жылыткан кабар менен бөлүшүүнүн өзү эле кандай бакыт. Жасаган ишиң адамга кичине болсо да пайда алып келсе сүйүнүп, шыктанып, ойду омкоруп, тоону томкоруп жибергиң келет эмеспи. Өткөн жумада менде да ошондой кубанычтуу жаңылык болду. Аны сиздер менен чогуу бөлүшөйүн.

Апта башы. Эмгек өргүүдөн жаңы эле чыгып социалдык баракчаларымдагы билдирүүлөрдү карап жаткам. Арасынан "Канададан жазып жатам" деген Мира эженин билдирүүсү көзгө урунду.

"Саламатсызбы, Таалайгүл? "Рак оорусуна кабылган кыз-келиндер экобаштык тигип, дарысына акча табат" деген макалаңызды окудум. Канадада жашаган кыргыздар алардын баштыктарына буйрутма берели дегенбиз. Байланыш телефондорун бере аласызбы?", — деп жазып жибериптир.

Кубанып, дароо "макул" деп, баштык тиккен Шайыр эженин телефонун жөнөттүм.

"Бизди чалат деп алдын ала айтып коесузбу? Азыр бизде түн, эртең менен чалсам силерде кеч болуп калат, телефонун башка номер экен деп албай койбосун", - деп жазды мекендеш.

Убакыт өткөрбөй дароо баштык тиккен Шайыр эжеге чалдым.

— Шайыр эже, кандайсыз? Иштериңиз, ден соолуктарыңыз жакшыбы? Сиздердин экобаштыкка буйрутма беребиз деп Канададагы кыргыздар жазышты. Телефон номериңизди берип койдум. Жооп берип, сүйлөшүп алгыла, ээ? — дедим.

Эртең менен эле чалсам Шайыр эже дарыканага бара жатыптыр.

— Таалайка, таң атпай маанайды көтөрдүң. Алина деген кызыбыз химиотерапиясын алып баштаган, тең акчасын бердик, жарымын таппай жаттык эле. Бир химиотерапиясы эле 80 миң сомдон ашат. Бизге 100 миң сомдой жетпей жаткан. Жакшы болбодубу. Апасы да жалгыз бой, "кайдан акча табам" деп кайгырып жаткан. Азыр ошол кыздын дарыларын алып дарыканада жүрөм. Тиги аял менен сөзсүз байланышам, рахмат", — деп трубканы койду.

Рак илдетине кабылган кыз-келиндер тууралуу видеоматериалыбыз былтыркы жылы жарыяланган. Рак илдети менен күрөшүү, анын дары-дармеги кымбат болгондуктан бейтаптар жакшы болуп калганда иштей калып каражат табышарын айткан.

Бир апта өттү. Бүгүн жумушка келип отурсам, баштык тиккен Шайыр эже чалып калды.

— Кандайсың, Таалайка? Сен айткан аял менен байланыштым. 300 сомдон 1000 баштыкка буйрутма бермей болушту. Алдын ала кездеме жана башка керектүү нерсе алганга акча салабыз дешти. Жакын арада тигип баштайбыз. Бул каражат Алинанын химиотерапиясына жетет экен. Силерге чоң рахмат. Ажат ачып, бизди абдан кубанттыңар", — деп жашып кетти Шайыр эже.

Менин да көзүмө жаш айланды. Алинанын сакайып кетишинен үмүт кылалы. Ал эми алыстагы мекендештерге абдан ыраазы болдум.

Канададагы баштыкка буйрутма берген мекендештер, мага жазган Мира эже, рахмат сиздерге! Канча бейтапты кубанттыңар. "Маанай көтөрүлсө, адам өмүрү да узарат" дейт. Бир адамдын өмүрүн сактап калууга себепчи болдуңуздар.

Ушул убакыттан пайдаланып чет жакта иштеп жүргөн мекендештер тууралуу эки ооз сөз жазып кетейинчи. Алар өлкөгө акча которуп, бюджетти гана толтурбастан, кайрымдуулук иштерди да көп жасайт. Дайыма жардамга кол сунуп, сырттан акча которуп, кайрымдуулук кылып келишет. 100 же 500 сом айрым учурда жөн эле керексиз бир нерсеге короп кетет. Бирок ошол эле акча бир адамдын өмүрүн сактап, бир адамдын көңүлүн алып коюшу ыктымал.

Жакшылыктын үрөнүн себе жүрөлү, жылуу сөзүбүздү аябайлы, жакшылык жасайлы. Ансыз деле коомдо негатив жетиштүү чакта бир адамдын көңүлүн алсак да олжо эмеспи.

Эгер кандайдыр бир жүрөк жылыткан, жылмаюу тартуулаган ирмемдериңиз болсо, news@sputnik.kg дарегине "Ак жарык" рубрикасына жазып жибериңиз. Жакшылык жасоо ар бир адамдын колунан келет!

1856
Белгилер:
кайрымдуулук, мекендештер, ден соолук, жакшылык, ак жарык
Тема:
Ак жарык (26)
Тема боюнча
Жумушуна 5 саат жөө баскан официант кызга кардарлары унаа белек кылышты
Айына 100 миң сомдой керек, экобаштык алыңыздар! Ракка чалдыккан аялдар кайрылды
Жаза аткаруу боюнча мамлекеттик кызматтын кызматкери иш учурунда. Архив

Укук коргоочулар: түрмөдө COVID жуктургандар көп. Ага ЖАМКтын жообу

65
(жаңыланган 01:00 29.10.2020)
Укук коргоочулардын айтымына караганда, ЖАМКтын жабык мекемелеринде коронавирус инфекциясын жуктуруп алган учурлар көп кездешүүдө.

БИШКЕК, 28-окт. — Sputnik. Жаза аткаруу мамлекеттик кызматы эркинен ажырагандар отурган абактарда коронавирус инфекциясы көбөйүп кеткени боюнча билдирүү туура эмес деген маалымат таратты.

Буга чейин бир топ укук коргоочулар — Акыйкатчы институту, Кыйноолордун алдын алуу боюнча улуттук борбор "Бир дүйнө — Кыргызстан" укук коргоо уюмунун тартылган эксперттери менен чыгарган маалымат таратылган. Алар абактарда, психиатриялык ооруканаларда, балдар үйүндө коронавирус боюнча жүргүзүлгөн иликтөөнүн жыйынтыгын жарыялашкан.

Алар Жаза аткаруу мамлекеттик кызматтын (ЖАМК) жабык мекемелеринде COVID-19ду жуктуруп алган көп учурлар бар, ал эми айып салып кармап турган өзүнчө жайларда отургандар үчүн шарттар түзүлгөн эмес дешкен.

Садыр Жапаров: абакта жатканда коронавирус менен ооруп айыктым

"COVID-19 башталгандан тарта ЖАМКта коронавирустун тарап кетишине жол бербөө, аны алдын алуу боюнча иштер жүргүзүлүп келет. Андан сырткары, профилактикалык жана эпидемияга каршы тиешелүү аракеттер көрүлүп турат", — дешкен аталган ведомстводон.

ДССУнун, Саламаттык сактоо министрлигинин сунуштамаларын жана кылмыш-аткаруу системасынын өзгөчөлүгүн эске алып, эл аралык Кызыл жарым ай коомунун көмөгү менен ЖАМКтын медициналык кызматы атайын алгоритмдерди иштеп чыккан.

Алар COVID-19ду профилактикалоо жана аталган инфекцияга чалдыгышы мүмкүн деген адамдарды табуу боюнча түзүлгөн.

"Соттук-медициналык экспертизанын бүтүмүнө ылайык, пневмония илдетинен ЖАМКтан төрт киши, ал эми COVID-19дан эки киши каза тапты. Былтыркы жылы ушундай мезгил ичинде пневмониядан үч киши көз жумган", — деп айтышты ЖАМКтан.

Мамлекеттик кызматтан Жазык-аткаруу кодексине ылайык, айып изоляторунда кармалып тургандарга төшөнчү, шейшептер уктаган учурда гана берилет деп кошумчалашкан.

Ведомстводон тартип коргоочулар ЖАМК мекемелериндеги абалды туруксуздаштыруу максатында жасалма нерселерди түзүп жатат деп айтышкан.

65
Белгилер:
билдирүү, укук коргоочу, жугуу, коронавирус, түрмө, ЖАМК, Кыргызстан
Тема:
Кыргызстандагы коронавирус жуктуруп алгандар
Тема боюнча
COVID-19 дагы эки кишинин өмүрүн алып кетти
Шаардык парк

Бейшембиге карата аба ырайы

48
Бейшембиге караган түнү өлкөнүн көпчүлүк райондорунда жамгыр, тоо этектеринде жана тоолуу аймактарында кар жаайт.

БИШКЕК, 28-окт. — Sputnik. Бейшемби күнү, 29-октябрда, күндүз республиканын айрым аймактарында жамгыр, тоо этектеринде жана тоолуу райондорунда кар жаайт. Бул тууралуу Кыргызгидромет билдирди.

Чүй менен Талас облусунун өрөөндөрүндө жаан карга айланат. Түнкүсүн жана эртең менен кээ бир райондордо туман түшүшү мүмкүн.

Батыштан соккон шамалдын ылдамдыгы секундасына 4-9 метрден Ысык-Көл, Нарын жергесинде 15-20 метрге жетет.

Бишкекте абаны булгаган автоунааларды аныктоо үчүн рейд жүрүүдө. Видео

Абанын температурасы Чүйдө +4...+9, Талас менен Ысык-Көл аймагында +3...+8, Ош, Жалал-Абад жана Баткен облустарында +9...+14 жана Нарында +1...+6 градус болору айтылды.

Абанын температурасы Бишкекте +7...+9 жана Ош шаарында +12...+14 градусту көрсөтөт.

48
Белгилер:
Кыргызстан, октябрь, аба ырайы
Тема боюнча
Адаттагыдан суук болот. Ноябрга карата аба ырайы
ӨКМ кызматкерлери. Архив

Токмоктун базарында чыккан өрттү толугу менен өчүрүштү

0
(жаңыланган 00:22 29.10.2020)
Токмоктун базарындагы дүкөндөн чыккан жалынды өрт өчүрүүчүлөр болжол менен эки сааттан ашык алышып жатып өчүрүшкөн.

БИШКЕК, 29-окт. — Sputnik. Токмоктогу "Булак" базарынын аймагында эт саткан дүкөндөн чыккан өрттү үч бригада өчүрдү. Бул тууралуу ӨКМдин маалымат кызматынан кабарлашты.

"Тилсиз жоо алгач чектөөгө алынып, андан кийин толугу менен саат 23:29да өчүрүлдү", — деп билдирди маалымат кызматы.

Эске салсак, ӨКМге Токмок шаарынын базарындагы дүкөндөрдүн биринен чыккан тилсиз жоо тууралуу маалымат 19:12де түшүп, ал жерге үч бригада жөнөп кеткени кабарланган.

Министрликтен кырсыктан жабыркагандар жок экендигин айтышты. Өрттүн жалпы аянты болжол менен 600 чарчы метрге жеткен. 

0
Белгилер:
видео, өрт, базар, Токмок, Кыргызстан
Тема боюнча
Ош шаарындагы өрт: эки киши ооруканага түштү