Түгөй. Архивдик сүрөт

Жаш жигит колумду сурап жатат... Жалгыз бой аялдын каты

6317
(жаңыланган 12:14 28.12.2019)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасынын бул жолку чыгарылышында жаш жигитке турмушка чыгар-чыкпасын билбей жаткан аялдын каты жарыяланды.

...Саламатсыздарбы? Абалым түшүнүксүз, колумду сураган адамга эмне деп жооп беришти билбей жүрөм. Себеби ал менден бир топ жаш кичүү. Кой десем болбой, артыман калбай жүрөт. Мен 40 жаштамын, ал жигит болсо 32де. Ортобузда сегиз жаш айырма.

27 жашымда турмушка чыккам. Үйлөнгөндө экөөбүз тең иштеп, кызматтан орун-очок алып калган кезибиз болчу. Жолдошум менен жумуштан таанышкам. Жашым өтүп турмушка чыкканга удаа эле төрөдүм. Эки кызымдын ортосу бир эле жаш. Ошентип үйдө үч жылдай отуруп, андан кийин жумушка чыктым. Жолдошум жарым ай иштеп, жарым ай бош болчу. Ошол себептен кыздарын өзү карады. Андан кийин кайненем айылдан шаарга келип каралашты. Айтор, көп кыйынчылык болгон жок. Күйөөм кызматтагы адамды түшүнгөн жан эле. Иштеп жүргөндө колдон-буттан алып "иште" деп турчу. Тааныштардын баары "идеалдуу үй-бүлөсүңөр", "күйөөң сонун" деп атып көз тийип кеттиби, айтор, жети жыл чогуу түтүн булаткандан кийин жолдошум экөөбүздүн мамилебиз сууй баштады. Кайсы кара теке сүздү билбейм, үйдөн болоор-болбос нерсеге кийлигишип, кулак-мээмди жейт, кызганат. Негизи башында эле идиш-аякка кийлигишчү. Анысы кийин күчөп кетти. Баягы күйөөм жок, кыял-жоругунан бери дароо өзгөрдү.

Менин да кыялым оңой эмес, үйдө күндө уруш-талаш. Урушуп кеткенде үйдөн чыгып кетет дагы түнү менен келбей коет. Көрсө, башка адамы бар экен. Анысын билип калгандан кийин эч нерсеге карабай кыздарымды алып үйдөн чыгып кеттим. Артыман келип, кечирим сурап жүрдү. Кечирдим, бирок кайра чогуу жашай албай койдук. Баягы уруш-талаш кайра кайталанат. Эки-үч жолу келип-кетип жүрдүм да, аягында "сен да, мен да жаш бала эмеспиз" деп мыйзамдуу түрдө ажыраштык. Андан бери беш жыл өттү. Жолдошум жакында эле үйлөнүптүр. Антсе да кыздар менен катышып турат, алимент төлөйт, айтор, сыйбыз. Жайына койгом. Анын үстүнө ага болгон сезимим эбак эле өчкөн.

Ажырашкандан кийин белди бекем бууп тытынып иштедим. Кызматтан көтөрүлдүм. Ата-энемдин жардамы менен бир бөлмөлүү үй алгам, алдымда унаам бар. Кыздарымды жакшы эле багам. Артыман ээрчиген эркек көп болду, бирок эч кимди жолоткон жокмун. Аларга алаксыгым келген жок. Ажырашып кеткенимди, жашымды укканда айрымдары так секирип өздөрү эле жоголчу.

Жакында эле, тагыраагы, жарым жыл мурда жашоомдо бир адам пайда болду. Оор басырыктуу, айтканын аткарган азамат жигит. Жумуш аркылуу таанышканбыз, бирок чогуу иштебейбиз. Мени жактырып калган окшойт, ар кайсы шылтоо менен чалып жүрдү. Белегин берип, жакшы сөздөрүн айтты. Тилекке каршы, ал менден кичүү, болгондо дагы сегиз жашка. Буга чейинки артыман ээрчигендер кыздарымды же жашымды айтсам эле жоголуп кетишчү. Бул адам андай кылган жок, эч нерсеге карабай колумду сурады. Буга чейин үйлөнүп, бирок ажырашып кетиптир. Кыздарым чоңоюп калгандыктан, улуусуна "турмушка чыгайынбы" деп чет-четин чыгарсам макул болбой койду. Ал азыр 12де.

Өзүм деле жаш балага күйөөгө тийбей эле коеюн деп макул болгон эмесмин. Бирок күйөөм үйлөндү. Тааныштарым айткандай, мен да өз бактымды тапсамбы дейм. Чынын айтсам, бул адамда көңүлүм бар, жактырам. Бирок жаш экени мага жолтоо болуп жатат. Эл эмне дейт, ата-энем, бир туугандарымчы. Анын ата-эне, туугандары кабыл алабы? Кыздарыма жаман үлгү көрсөтүп жаткан болсомчу? Аны кабыл албай коюшсачы? Баш тартып койгондон да коркуп жатам. Балким, бул менин бир келген бактымдыр. Андан артык кимди табам. Өмүр бою жалгыз өтөмбү? Бул суроолор мага тынч уйку бербей койду. Жалгыз бой болгон деле оңой эмес. Башым катты. Кеңеш күтөм.

"Психоанализ.кг" психотерапия борборунун жетекчиси Муратбек Султанбеков:

Үй-бүлө оңой эле курулуп калбайт. Жубай тандоо кесип тандоо сыяктуу. Аны туура тандасаң жашоодо өкүнбөй, андан ырахат алып өтөсүң. Өзүңө жар тандоодо билим, тажрыйба керек, бирок биринчи кезекте жүрөк менен тандаш керек. Ошол сыяктуу бул каттын автору ал адамды жакшы көрөбү? Кеп ошондо. Эгер экөө тең бири-бирин чындап жакшы көрсө, тоскоолдукту бирге жеңет. Албетте, кыйынчылык болот. Биринчиден, келин айлана-чөйрөнүн кеп-сөзүнө даяр болушу керек. Анткени жолдошу өзүнөн кичүү болгондо достору, алардын аялдары да кичүү болушат. Алар менен эс алууга чыкканда ыңгайсыздыктар жаралышы мүмкүн. Экинчиден, тууган-туушкан деген бар. Аял кичүү болсо да, улуу болсо да келин болот, кызмат кылат. Үчүнчүдөн, күйөөсү жаш болсо, андан дагы жаш көрүнөм деп жаштыкка көп каражат коротушу ыктымал.

Бирок эгер эки адам чындап бири-бирин жакшы көрсө, бул никенин жакшы жактары көп болот. Айрыкча аял киши үчүн. Алсак, күйөөсүнө карап ал жашарат. Жаш көрүнүүгө аракет кылып, өзүн карайт. Аял өзүн караган сайын эркекке жагат. Жанында жөлөнүп-таянаар адам пайда болуп, көйгөй, маселелерин жалгыз чечпей калат. Колун сурап жаткан адам аны аябай жакшы көрсө, андан бетер ырахат. Анткени өзү каалаган нерсени жасай алат, өзүнө болгон ишеним көбөйөт. Аял жаңыдан төрөлүп, кайра жаралгандай болуп, жашара баштайт. Эгер колун сураган адам жакшы болсо, кыздар да ата тарбиясын алат.

Эркек үчүн жакшы жагы - бул аял менен сексуалдык жактан, башкача айтканда, төшөктө маселе жаралбайт. Бир айтаарым, эгер мүмкүнчүлүк болсо төрөгөнгө аракет кылып, жолдошун кубантса болот. Бирок ал өзүнчө маселе.

Эң башкысы, чечимди өзү кабыл алат. Бири-бирин чындап жакшы көрөбү? Колун сураган адамдын сүйөрүнө көзү жетеби? Турмушта кандай жолдош боло алат? Ошол нерсеге карасын. Жардам, кеңеш керек болсо биздин борборго же башка психологдорго кайрылса болот. Айлана-чөйрөнүн кеп-сөзүнөн коркпосун. Анткени кеп кылган адамдар идеалдуу үй-бүлөнү деле кеп кылат. Силердикиндей нике биринчи жолу болуп жаткан жок. Турмушта ар ким өз түгөйүн табышы керек. Бирок нике эки адам тең бири-бирин жакшы көрсө, көңүлдөрү төп келсе гана бекем болот.

6317
Белгилер:
курак, жаштар, үй-бүлө, нике, кат, психолог
Тема:
Психолог менен баарлашуу (123)
Тема боюнча
Турмушка чыгайын десем уулум каршы болууда... Аялдын каты
Бообекова: тагдырым ушундай деп турмуштун агымы менен кете берген болбойт
Аялымды ыраазы кылгым келет, бирок кантип... Майып эркектин каты
Парктагы бакта клен жалбырактары

Шейшембиге карата аба ырайы

6
27-октябрга караган түнү жаан-чачын күтүлбөйт. Батыштан соккон шамалдын ылдамдыгы секундасына 4-9 метрге жетет.

БИШКЕК, 26-окт. — Sputnik. 27-октябрь, шейшембиде, күндүз өлкө аймагында күн ачык болот. Бул тууралуу Кыргызгидромет билдирди.

Абанын температурасы Чүй өрөөнүндө +17…+22, Таласта +16…+21, Ош, Жалал-Абад, Баткен облустарында +18…+23, Ысык-Көл жана Нарын аймактарында +11…+16 градус болору айтылды.

Ош менен Баткенде бүгүн жер силкинди

Бишкек жана Ош шаарларында жаан-чачын күтүлбөйт. Күндүн табы Бишкекте +20…+22 градус, Ош шаарында +21…+23 градуска чейин жетет.

6
Белгилер:
Кыргызстан, октябрь, аба ырайы
Тема боюнча
Адаттагыдан суук болот. Ноябрга карата аба ырайы
Кыргызстандык окуучу Нурболот Исматиллаев

Көзүмө жаш келди. Россияда сынакта элди сыймыктанткан Нурболоттун апасы менен маек

211
(жаңыланган 20:54 26.10.2020)
Жекшемби күнү “Россия 1” телеканалынын “Удивительные люди” деп аталган таланттуу адамдардын сынагына кыргызстандык окуучу Нурболот Исматиллаев катышып, калыстарды таң калтырды.

Өспүрүм эки этаптан турган сынактын биринчи турунда стакандардан тездик менен пирамида куруп (спорт-стекинг) жатып берилген арифметикалык эсепти так аткарып койгон. Экинчи этабында 15 орундуу санды 15 орундуу санга көбөйтүү менен укмуш адам аталып, залды жаңырткан көрүүчүлөрдүн сүрөөнүнө, калыстардын суктануусуна ээ болду. Бирөөсүнүн "Кыргызстанда ушундай балдар бар экенине сыймыктанам" деген сөзү өлкөнүн абалына тынчсызданып турган ар бир мекендештин жүрөгүнө дары болду.

Баарыбызды сыймыкка бөлөгөн Нурболот Бишкектеги №68 гимназияда 6-класста окуйт. Ал “Интеллект” билим берүү борборунда менталдык арифметика боюнча эки жыл билим алган. Ушул эле борбордон спорт-стекинг (стакандардан тездик менен пирамида куруу) менен да алектенип, жакшы ийгиликтерди жараткан. Аталган борбордун жетекчиси Жакшылык Матановдун айтымында, менталдык арифметика жана спорт-стекинг баланын акыл-эсинин өсүшүнө, мээдеги майда моторикалардын өрчүшүнө чоң өбөлгө түзөт. Менталдык арифметикага беш жаштан он эки жашка чейинки гана балдар кабыл алынат. Андан кийин кеч болуп калат.

Sputnik Кыргызстан агенттиги Нурболоттун апасы Минура Токторова менен байланышып маек даярдады.

Минура Токторова уулу Нурболот учурда IT тармагына да кызыгып, келечекте IT адиси болууну жана дүйнөнү кыдырууну кыялданат.

Юный кыргызстанец Нурболот Исматиллаев во время выступления. Архивное фото
© Фото / из личного архива Минуры Токторовой
Башкалардан 15 орундуу санды 15 орундуу санга көбөйтө алгандыгы менен айырмаланды. Негизи жыйырма орундуу санды көбөйтүүгө жетишкенбиз. Бирок ал кээде туура, кээде туура эмес чыгып калып жаткандыктан 15 орундуу сан менен бардык

— Нурболотту кандайча менталдык арифметикага катыштырып калдыңыз?

— Мен башынан эле Нурболоттун математикага жөндөмдүүлүгүн байкачумун. Кыргызстанга менталдык арифметика алгач келгенде эл арасында аябай талкуу жараткандыктан жакшы көрсөткүчтөр болуп жатканын угуп кызыгып калдык. Ошондон тарта окуу борборлорду тандап, Жал кичи районунда жайгашкан "Интеллект" билим берүү борборуна барып, алгачкы сабагына катыштык. Бирок өзүбүз Кызыл-Аскерде тургандыктан аябай алыс болуп каларын ойлогондо айный баштадым. Жолдошум экөөбүз үйгө жакыныраак жерден окуталы дедик. Аны балама айтсак "бул жакка бир келгенден кийин аягына чыгам" деп болбой койгон. Акыры жаман болгон жок. Бир жыл алты ай окуп, жакшы жыйынтыктарды көргөздү. Кышында эшик ызгаар болуп турганда боорум ооруп "бүгүн барбай эле койчу" деп айныткан күндөрүм да болду. Бирок көгөрүп "жок" деп болбой барчу.

Юный кыргызстанец Нурболот Исматиллаев с отцом и матерью. Архивное фото
© Фото / из личного архива Минуры Токторовой
Алгач Россияга видео жөнөттүк алар жактырып, кийин онлайн текшеришти. Андан өтүп кетти. Ошондон кийин гана келишим түздүк. Негизи жаздан бери эле даярдык көрүп жатканбыз

— "Удивительные люди" теледолбооруна кандайча барып калды?

— "Интеллект" билим берүү борборунун "Россия 1" телеканалынын таланттуу адамдар катышкан "Удивительные люди" сынагы менен келишими бар экен. Анын негизинде аталган долбоорго Кыргызстандан жылына онго чейин бала катышып турууга мүмкүнчүлүк бар. Былтыр да Кыргызстандын атынан бир эле бала катышкан. "Интеллект" окуу борборундагы окуган башка балдардан 15 орундуу санды 15 орундуу санга көбөйтө алгандыгы менен айырмаланып, быйыл Нурболот барды. Негизи жыйырма орундуу санды көбөйтүүгө жетишкенбиз. Бирок ал кээде туура, кээде туура эмес чыгып калып жаткандыктан 15 орундуу сан менен бардык. Алгач Россияга видео жөнөттүк, алар жактырып, кийин онлайн текшеришти. Андан өтүп кетти. Ошондон кийин гана келишим түздүк. Негизи жаздан бери эле даярдык көрүп жатканбыз.

Юный кыргызстанец Нурболот Исматиллаев во время занятий по футболу. Архивное фото
© Фото / из личного архива Минуры Токторовой
Балам Кыргызстандын атынан катышып жатканына сыймыктанып отурдум. Башкача сезимдер коштоду. Бир чети санааркадым. Бирок Нурболотко ишендим

— Балаңыз "Россия 1" телеканалында эл алдына чыкканда кандай сезимде болдуңуз?

— Аябай толкунданат экенсиң. Балам Кыргызстандын атынан катышып жатканына сыймыктанып отурдум. Башкача болдум, айтор. Бир чети санааркадым, бирок Нурболотко ишендим. Себеби ага чейин элдин алдына чыгып көнүп калган. Анын үстүнө "Баластан" каналында да иштеп жатат. Ошентсе да сахнага жаркыраган жарыктар берилип, элдин көбүнөн балам деле бир аз сүрдөдү. Атасы да колу бошобой бара албай калган. Теледолбоорго Нурболот экөөбүздүн эле видеобуз чыгып, ал да интервьюсунда "менталдык арифметикага апам алып барган" деп мен жөнүндө эле айта бериптир. Кийин режиссёрлор "баланын атасы жокпу?" деп сураганын угуп, балам аягында атаң тууралуу да айт дегем. Бирок сүрдөп унутуп калыптыр (күлүп). Болбосо атабыз Нурболотту абдан колдойт. Бардык олимпиадаларга өзү алып барат.

Юный кыргызстанец Нурболот Исматиллаев во время участия в проекте Удивительные люди на телеканале Россия 1
© Фото / WeiT Media
Ташкентте өткөн эл аралык олимпиадада менталдык арифметика боюнча 3-орунду алып келди. Андан кийин Ысык-Көлдө жана Оштон 1-орунду багынтып, кийин онлайн турүндө өткөн дүйнөлүк олимпиадада 1-орунга ээ болду

— Нурболот берүүнүн жүрүшүндө орто жерден ыйлап жиберген экен...

— Кечээтен бери тааныштардын баары мага чалып, көрүп отуруп сүйүнгөндөн ыйлаганын айтып "кантип жөн эле отурдуң?" деп сурап жатышат. Мен балама ишенгем. Негизи баарын туура эле чыгарган. Бирок 15 орундуу санды көбөйткөндө компьютердин экранына толук батпай, алдына түшүп кеткендиктен кээ бир сандары көрүнбөй калган. Кайра текшерип жатканда ошондон жаңылып калды. Жөн гана "жооп" деген баскычты эле басып коюшу керек эле. Бала неме адашып кетти. Ошол жерде отуруп уулума "жоопту" эле басасың деп айта албай же баламдын оюн түшүндүрүп бере албай кызыктай абалда калдым. Режиссёрлор "ыйлаган жериңди кийин көрсөтпөй кесип коёбуз" деп кайра экинчи мүмкүнчүлүк бергенде дароо чыгып эле эсепти туура чыгарып кетти. Аталган долбоордо 600 киши иштейт экен. Репетиция учурунда бир эле Нурболот менен он чакты киши иштеди. Психологдору да күчтүү экен.

Юный кыргызстанец Нурболот Исматиллаев во время участия в проекте Удивительные люди на телеканале Россия 1
© Фото / WeiT Media
Менталдык арифметика жана спорт-стекинг боюнча Казакстанда өткөн Central Asia"s Got Talent сынагына катышып, финалга чыккан. Бирок добуш берүүдө Тажикстан биринчиликти алып кетти

— Канча күн жүрдүңөр?

— Россияга 20-сентябрда учуп кеткенбиз. Үч күн даярдандык, үчүнчү күнү кечинде сынакка тартылдык. Ага чейин бизди шаарга алып чыгышып, кошумча видеого тартып даярдашты. Кандай кийим кийип, кайсы жерден чыгуу керектигинен бери дайындалып туруп тартуу иштери башталды. Шоунун ортосунда Нурболот сүрдөп, ыйлап жибергенде да, залга дароо эле психологдор чуркап чыгып, балага психологиялык колдоо көрсөтүп кайра сахнага алып чыгышты. Кийин калыстар тобу да жылуу пикирин билдирип, "Кыргызстанда ушундай балдар бар экенине сыймыктандым" дегенде көзүмө жаш тегеренди.

— Жыйынтыгы кандай болду?

— "Удивительные люди" телесынагынын 5-сезонундагы добуш берүүнүн жыйынтыгы менен Нурболот 3-орунду алды.

Юный кыргызстанец Нурболот Исматиллаев во время участия в проекте Удивительные люди на телеканале Россия 1
© Фото / WeiT Media
Нурболот көп орундуу сандарды көбөйтүүгө аябай кызыгып окуйт. Генден да көп нерсе көз каранды го деп калам, себеби атасы математикага абдан кызыгат. Тайларында да математиктер бар

— Азыр "Баластанда" да иштеп жатабы?

— "Баластан" балдар каналында "Билесиңби?" берүүсү жаңы ачылды. Аталган телеберүүнү алып баруучулукка кастинг жарыяланган. Нурболот сынактан өтүп, азыр ошол жакта иштеп жатат.

— Буга чейин да эл аралык олимпиадаларга катышкан экен?

— Аталган окуу борборунда окуп жатып эле олимпиадаларга бара баштады. Алгач Ташкентте өткөн эл аралык олимпиадада менталдык арифметика боюнча 3-орунду алып келди. Андан кийин Ысык-Көлдө жана Оштон 1-орунду багынтып, кийин онлайн түрүндө өткөн дүйнөлүк олимпиадада 1-орунга ээ болду. Нурболот көп орундуу сандарды көбөйтүүгө аябай кызыгып окуйт. Генден да көп нерсе көз каранды го деп калам, себеби атасы математикага абдан кызыгат. Тайларында да математиктер бар.

Юный кыргызстанец Нурболот Исматиллаев во время участия в проекте Удивительные люди на телеканале Россия 1
© Фото / WeiT Media
Кийин калыстар тобу да жылуу пикирин билдирип, "Кыргызстанда ушундай балдар бар экенине сыймыктандым" дегенде көзүмө жаш тегеренди

— Спорт-стекингден да ийгиликтерди жаратканын уктук?

— Ооба, "Интеллект" борборунан спорт-стекинг курсуна да катышты. Аталган спорттун түрү боюнча былтыр эл аралык олимпиада өтүп, ага катышуу үчүн Кыргызстанга бир орун берилген. Нурболот Кыргызстан боюнча 1-орунду камсыздап, 2020-жылдын апрель айында Сингапурда өтүүчү олимпиадага жолдомо утуп алган. Бирок коронавирус пандемиясынан улам бара албай калды. Ошондой эле менталдык арифметика жана спорт-стекинг боюнча Казакстанда өткөн Central Asia's Got Talent сынагына катышып, финалга чыккан. Бирок добуш берүүдө Тажикстан биринчиликти алып кетти.

— Үй-бүлөңүздөр тууралуу айтып берсеңиз?

— Мен Улуттук университеттин кыргыз филологиясы факультетин бүтүргөнүм менен мугалим болуп иштеген жокмун. "Эркин Тоо" гезитинде корректор болуп иштеп, кийин балдарга тарбия берүү, окутуп эле үйдө отуруп калгам. Атасы "Дордойдо" соода кылат. Нурболот улуу балабыз. Мындан кийин тогуз жана беш жаштагы балдарыбыз бар.

211
Белгилер:
сынак, маек, менталдык арифметика
Тема боюнча
3D китебинин автору: оюн түрүндөгү "Ойнобук" баланын акылын өстүрөт
Баланы китепке кантип кызыктыруу керек. Култаеванын балдар адабияты тууралуу маеги
Facebook компаниясында иштеген Зияда: телегейи тегиз эч бир өлкө жок