Белгилүү дизайнер, мода боюнча бир катар долбоорлордун автору жана ишкер айым Замира Молдошева

43 жашында биринчи жолу көз жарган Замира Молдошева: эми да төрөөгө даярмын!

21539
(жаңыланган 18:17 23.01.2020)
Замира Молдошева — белгилүү дизайнер, мода боюнча бир катар долбоорлордун автору жана ишкер айым 43 жашында бала көрдү. Мындай бакытты ал 15 жыл зарыгып күткөн. "Биз – ата-энебиз" долбоорунун алкагында ал дарыланган жылдарын жана төрөттөн кийинки мезгилин айтып берди.

Кош бойлуулук жана төрөттөн кеп козгоону көп туура көрө бербейт, андайды сураш да көпчүлүк учурда ыңгайсыз. Ошентсе да аялдар жана балдардын зордук-зомбулукка кабылган окуяларынын фонунда мындай позитивдүү, шыктандырган баяндар аялзатынын табиятын, аярдыгын жана ошол эле учурда эрдигин дагы бир ирет эске салат. Булар баарыбызды суктандырып, аларга болгон сый-урматыбызды арттырат.

— Кеч перзент көрүү эмнеге байланыштуу? Дарылануу сизди бир топ азапка салдыбы?

— 43 жашымда көз жардым. Он беш жыл дегенде эне болуу бактысы буюрду. Ошончо жыл дарыландым, бир катар операцияларды башымдан өткөрдүм. Тилек кылдым, сыйындым. Дарылоонун бардык ыкмаларын көрдүм, салттуу медицина гана тургай эмчи-домчуларга да кайрылдым. Улам үмүт жанат, жазда күздү, күздө жазды күтүп жүрдүм. Ошентип 15 жыл өтүп кетти. Анан айлам түгөнгөндө ЭКУ (экстракорпоралдык уруктандыруу) жасатууну чечтим. Мага бул ыкманы мурдатан эле сунуштап келишкен, бирок чочулап жана андан да майнап чыкпай калсачы деп санаркачумун. Кудайга шүгүр, мына төрт жылдан бери бактылуу энемин, ар күнү шүгүр келтирем.

— Врачтар балалуу боло албай жүргөндөрдү дарыланууну создуктурбоого кеңеш берет. Эмнеге мурдатан ЭКУ ыкмасын жасатууга барбадыңыз?

— Бул процедурадан чочулар элем. Ушундай ыкма менен боюна бүткөндөр да жаап-жашырууга аракет кылышат, себеби коомдо бул туура эмес кабылданат. Көпчүлүк андай балдарга башка планетадан келгендей карайт. Бирок бул процедуранын дагы бир артыкчылыгы бар — түйүлдүктүн эрте баскычында эле ар кандай оору, маселен, даун синдрому бар же жок экенин аныктоого болот. Дыкат текшерүүлөрдөн кийин гана уруктандыруу операциясы жасалат. Биздин өлкөдө тукумсуздуктун өтө жашарганы да мени таң калтырды. Көрсө, маселе жаш куракта эмес экен. 17синде турмушка чыгып, табигый жол менен боюна бүткөрө албай жүргөн 18 жаштагы кыздарды көп көрдүм.

Известный дизайнер, автор модных проектов и бизнес-леди Замира Молдошева на радиостудии Sputnik Кыргызстан
© Sputnik / Азамат Тотубаев
Замира Молдошева: 43 жашымда көз жардым. Он беш жыл дегенде эне болуу бактысы буюрду.

— Кош бойлуулук кандай өттү? Талгак кыйнаган жокпу?

— Мен үчүн абдан татаал болду. Дээрлик жети ай бою талгак болдум. Апельсинден бөлөк тамак жей албас болдум, анан суу эле иче бердим. Салмагы аз, тамак жеш керек деп врачтар кайра-кайра эскертет. Көз жарганча көңүлүм айнып, кускум келе берчү. Эч бир жытты көтөрө албайм десеңиз. Алтургай, жамгырдан кийинки таштын жыты да көңүл айнытчу. Эт жана тамактын сүрөттөрүн карай алчу эмесмин, алар да көңүлүмдү айлантар эле. Шаар аралап жүргөндө көзүмдү жумуп алчумун. Багым бар экен, дени сак, салмагы 3,5 килограмм болгон балалуу болдум. Көз жаргандан кийин жолдошум дагы төрөгүм келер-келбесин сурап жатпайбы. "Ананчы, даярмын! 10 бала болсо дагы төрөйм!" дедим. Бала эле болсунчу, андай талгакка деле кайылмын. Андай абал го 9 айга созулат, ал эми наристе – бул бүтүндөй бир өмүр эмеспи!

— Экинчи балалуу болууга камынып калгандайсыз?..

— Ооба, азыр 47 жаштамын, экинчи ирет эне болууну да көздөп жүрөм. Кош бойлуу болуп, көз жарганча 48ге чыгам. Аракет кылам. Эгер Кудай экинчи мүмкүнчүлүк берсе, эмнеге болбосун? Эл: "Эми бул төрөп эмне кылат?" – деп мени кеп кылышы ыктымал. Балдарым майда, алар чоңойгончо карып калат дешер. Менимче, андай ой жүгүртүү натуура. Анткени ар кимдин тагдыр жолу башка. Кызым жалгыз перзент болбосун дейм. Эне болуу — чексиз бакыт. Күнү-түнү мээримиң төгүлүп, сүйүүң ашып-ташып турат.

— Көп күттүргөн ымыркайыңызды алгач колуңузга алганыңызда кандай сезимдерге тушуктуңуз?

— Аны дароо көргөн жокмун, себеби операциядан улам чүрпөбүздү жолдошумдун көкүрөгүнө жаткырышты. Аны мен кечинде гана көрдүм. Мага аябай күлкүлүү көрүндү, менин кызым экенине ишене албадым. Бир жарым жылча ошол нерсе оюмдан кетпей туруп алды. Кайра-кайра карайм, чындап эле ушундайбы, баары жайындабы деп улам текшерем. Ушул тирүү жан менин ичимде беле деп ишене албай жүрдүм.

— Төрөттөн кийинки депрессия болоруна ишенесизби же бул көңүл бурдурууну каалаган аялдын назыбы?

— Өз башымдан өткөрдүм муну, көрсө, төрөттөн кийинки депрессия өтө жаман нерсе тура. Балдарын таштап же өлтүрүп койгон аялдарды эми түшүнүп калдым. Аларды коргогонум жок, бирок депрессия абалында өз эмоцияларыңды жана жүрүм-турумуңду көзөмөлдөө абдан татаал экен. Баары жайында, анан туруп-туруп эле жашагың келбей калат. Бир туруп бакытка балкып күлөсүң, анан эч себепсиз ыйлап киресиң. Өзүңө өзүң ээ боло албайсың. Баланы бирөө уурдап же ал жоголуп кетчүдөй корко берчүмүн. Төрөттөн соңку депрессия экенин жарым жылдан кийин гана – капысынан эле жаңы коллекция жараткым келгенинде аңдадым.

Ошондо гана депрессиядан чыгып, өзүмө келе баштаганымды сездим. Артыма кылчая карап, үрөйүм учту. 15 жыл бою ымыркай күткөн мен ошондойду баштан кечирсем, анда эрте турмушка чыгып, көз жарып, эмне болуп жатканын аңдай билбеген жаш кыздарга кандай оор экенин элестетиш кыйын. Андай маалда жакындарыңдын колдоосу зарыл. Башта жолдошум да менин абалымды түшүнгөн жок. Кубангандын ордуна эмнеге ыйлап жатканымды аңдай албады. Депрессияны ар ким ар башкача көтөрөрүн түшүндүм. Кай бирөө тез эле өзүнө келет, башкасында узакка созулат, аябай байкалат же билинбей өтүп кетет. Өз жон терим менен сезген соң кош бойлуу аялдарды жана энелерди туура түшүнүп калдым. Эне болгон соң апам да мени, дегеле энелер өз балдарын канчалык жакшы көрөрүн түшүндүм.

Известный дизайнер, автор модных проектов и бизнес-леди Замира Молдошева на радиостудии Sputnik Кыргызстан
© Sputnik / Азамат Тотубаев
Азыр 47 жаштамын, экинчи ирет эне болууну да көздөп жүрөм. Кош бойлуу болуп, көз жарганча 48ге чыгам. Аракет кылам. Эгер Кудай экинчи мүмкүнчүлүк берсе, эмнеге болбосун?

— Эне болуу сизге кандай таасир этти, мүнөзүңүз өзгөрдүбү?

— Ооба, катуу өзгөрдүм, кыйла боорукер болуп, жумшара түштүм. Зордук-зомбулук чагылдырылган тасмаларды көрө албай калдым. Мурда андайдан түк коркчу эмесмин. Азыр балдарды урушуп жаткандарын жөн карап тура албайм, сөзсүз болуша кетем. Балдарга байланыштуу нерселердин баары мага катуу таасир этчү болду. Менимче, аялдардын баары төрөгөндөн кийин өзгөрөт.

— Ишиңизди жолго коюп койгонсуз, татаал иш тартиби менен бала багууну кантип айкалыштырасыз?

— Үч жашка толгонунда гана бала бакчага бердик. Ага дейре жолдошум менен кезектешип карадык. Ал жумушта болгон кезде мен бактым, ал келгенде мен жумушка кетчүмүн. Эмнеге бала багуучу албадыңар деп баары таң калышат. Зарыгып тапкан балабызды кимге ишенип калтырабыз? Жолдошумдан башка эч кимге ишене албадым.

— Жаш кезде балалуу болуу менен акыл токтолуп, турмуштун ачуу-таттуусун татып калган убакта перзент көрүүнүн айырмасы эмнеде?

— Менимче, жоопкерчиликте. Мисалы, мен балага кам көрүүгө жакшылап камындым. Тамак ичүү, уйку жана жуунтуу тартибин так сактадым. Азык-түлүктү катуу көзөмөлгө алдым, таттуу, цитрус жана аллергендик азыктардан оолак болдук. Шоколаддын даамын бир жашында гана татты, аны да өзүм даярдагам. Суюктукту да тамактан бир саат өткөрүп гана ичирем. Эч кандай чай бербейм, компот же суу гана берем. Азыркыга чейин кола же чипс эмне экенин билбейт. Кызым төрөлгөндөн тарта айрым энелер көп нерсени туура эмес кыларын түшүнө баштадым. Мисалы, йогуртту үйдөн алда канча даамдуу жана коопсуз кылып даярдоого болоруна карабастан сатып алышат.

Кызыма быштак болобу же балмуздакпы, баарын өзүм даярдайм. Күндүн белгилүү бир маалында сейилге чыгабыз, көнүгүү жана укалоо күндө жасалат. Классикалык музыканы тыңдачубуз. Кош бойлуу кезде да жомок окуп берчүмүн, ал адат алигүнчө уланып келет. Баланы багыттаганыңа жараша болору чын белем, азыр китептерди аябай жакшы көрөт.

Баса, жаш энелерге упчу менен абдан этият болууга кеңеш берер элем. Бала тарбиялоодо ушул менин тек катачылыгым болду. Эки жашка чейин упчу эмди. Бул адатын калтыралы деп аракет кылганыбызда аябай стресс болду. Он күн кызым дагы, өзүм да уктаган жокпуз. Эгер экинчи балалуу болуп калсак, упчу эмизбөөгө аракет кылам.

Известный дизайнер, автор модных проектов и бизнес-леди Замира Молдошева на радиостудии Sputnik Кыргызстан
© Sputnik / Азамат Тотубаев
40 жашта төрөткө кеч деп ойлоодон оолак болуу зарыл. Өзүн сыйлабаган жана сүйбөгөн аял гана мындай куракта "мен карыдым да" деп айтат.

— Көз жаргандан кийин саламаттыгыңыз кантти? Калыптанууңуз канча убакыт алды?

— Тогуз ай бою түзүк тамактанбадым, андыктан салмак кошкон жокмун. Бирок төрөттөн кийин табитим ушундай ачылды, ошондо толо түштүм. Бирок жарым жылдан кийин 15 килограммга арыктап, кайра калыбыма келдим.

— Балалуу болууну самап же чочулап жүргөн 40 жана андан жогорку курактагы айымдарга кандай кеңеш берер элеңиз?

— Биринчиден, 40 жашта төрөткө кеч деп ойлоодон оолак болуу зарыл. Өзүн сыйлабаган жана сүйбөгөн аял гана мындай куракта "мен карыдым да" деп айта алар. 50 жаштагы аял да кантип карыган деп эсептелсин? Төрөөгө эч качан кеч эмес! 52 жашында үч эм төрөгөн бир айымды билем. 53 жашында да табигый жол менен боюна бүткөн аялдардын толтура баяндары бар. Ошондуктан эч качан "Мен карыдым, төрөөгө кеч" деп айтууга болбойт.

Сүйүктүү айымдар, чочулабагыла. Биз ушул үчүн жаралыппыз. Мисалы, бир аял 26 ирет ЭКУ жасатыптыр. Акыры тилеги орундалыптыр! Дал ошол окуя мага үлгү жана өбөлгө болгон. Эң башкысы — үмүт үзбөш керек!

21539
Белгилер:
тарбия, бала, төрөт, Замира Молдошева
Тема:
"Биз - ата-энебиз" социалдык долбоору (18)
Тема боюнча
Дарика Асылбашева: үй-бүлөмдү да, карьерамды да эбак пландаштырып койгом
Назира Айтбекова: уулума ата тарбиясы жетпей жатат
Ички иштер министринин мурдагы орун басары Курсан Асанов. Архив

Курсан Асанов пневмония болуп ооруканага түшүп, соту жылдырылды

23
(жаңыланган 00:52 11.07.2020)
Эске салсак, шаардын Биринчи май райондук сотунда Асановго козголгон кылмыш иши боюнча жараян болмок. Курсан Асанов "кыргыз милициясына чыккынчылык кылды, ишенимден кетти" деген негиз менен 2019-жылы 13-августта кызматтан бошотулган.

БИШКЕК, 11-июл. — Sputnik. Ички иштер министринин мурдагы орун басары Курсан Асанов өпкөнүн эки тараптуу пневмониясына чалдыкты. Бул тууралуу Sputnik Кыргызстан агенттигине өзү билдирди.

Ал шаардагы ооруканалардын биринде дарылана баштаганын айтып, буга байланыштуу сот жараяны жылдырылганын кошумчалады.

Эске салсак, шаардагы Биринчи май райондук сотунда Курсан Асановго карата козголгон кылмыш иши боюнча жыйын болмок.

Суракка чакырылган экс-министр Космосбек Чолпонбаев оор абалда ооруканага түштү

Курсан Асанов "кыргыз милициясына чыккынчылык кылды, ишенимден кетти" деген негиз менен 2019-жылы 13-августта кызматтан бошотулган. Ага карата кылмыш иши козголуп, үй камагына алынган.

Анын артынан жан сакчысы Дамирбек Пайзылда уулу кармалып, кийин үй камагына чыгарылган. Ал эми өкүл баласы Турсунбек Бейшенбековду ушул жылдын 20-январында Аскер прокуратурасы сурактан кийин кармаган. Бирок баш коргоо чарасын тандаган сот аны үй камагына чыгарган. Мындан сырткары, Асановдун жубайы жана туугандары да суракка чакырылганы айтылган.

Ал эми уулу Мухаммед-Али Асановго издөө жарыяланган.

23
Белгилер:
кылмыш иши, сот, оору, оорукана, пневмония, Курсан Асанов
Тема:
Курсан Асановдун министрдин орун басарлыгынан алынышы
Тема боюнча
Саламаттык сактоо министринен пневмония, орун басарынан COVID аныкталды
Дарыгер шаардык клиникалык ооруканада. Архив

COVID жана пневмонияны дарылаган ооруканаларга бирден өкмөт мүчөсү бекиди. Тизме

310
(жаңыланган 22:01 10.07.2020)
Буга чейин өкмөт башчы борбор калаадагы коронавирус жана пневмонияны дарылаган ар бир мамлекеттик ооруканага бирден өкмөт мүчөсү бекитилерин айткан. Ал өкмөт мүчөлөрү оорукананын башкы дарыгери менен "тең жатып, тең турарын" кошумчалаган.

БИШКЕК, 10-июл. — Sputnik. Өкмөттүн маалымат кызматы коронавирус жана пневмония дарттарын дарылап жаткан ар бир ооруканага министрлик жана ведомстволордун жетекчилери бекитилгенин кабарлап, алардын тизмесин жарыялады.

Эске салсак, буга чейин өкмөт башчы Кубатбек Боронов борбор калаадагы коронавирус жана пневмонияны дарылаган ар бир мамлекеттик ооруканага бирден өкмөт мүчөсү бекитилерин айткан. Премьер-министр бекиген өкмөт мүчөсү ошол жерден ишин баштап, ошол жерден жумушун бүтүрөөрүн, оорукананын башкы дарыгери менен "тең жатып, тең турарын" кошумчалаган.

  • Улуттук госпиталь — вице-премьер Акрам Мадумаров;
  • №1 шаардык клиникалык оорукана — вице-премьер Эркин Асрандиев;
  • Жугуштуу оорулардын республикалык клиникалык ооруканасы —вице-премьер Аида Исмаилова;
  • "Семетей" обсервациясы (Ганси) — өзгөчө кырдаалдар министри Замирбек Аскаров;

Бишкектеги кырдаал сабак болсун! Президент облус башчыларына тапшырма берди

  • Кыргыз-Түрк достугу ооруканасы — тышкы иштер министри Чыңгыз Айдарбеков;
  • Улуттук урология борбору — юстиция министри Марат Жаманкулов;
  • Улуттук фтизиатрия борбору — маданият, маалымат жана туризм министри Азамат Жаманкулов;
  • Темир жол ооруканасы — транспорт жана жолдор министри Жанат Бейшенов;
  • Кыргыз курортология жана калыбына келтирип дарылоо илим-изилдөө институту — эмгек жана социалдык өнүктүрүү министри Улукбек Кочкоров;
  • Улуттук онкология борбору — эмгек жана социалдык өнүктүрүү министри Улукбек Кочкоров;

Кыргызстанга анализ жыйынтыгын 30-45 мүнөттө көрсөтчү ПЦР-тесттер келди

  • Мамбет Мамакеев атындагы Улуттук хирургия борбору — коргоо иштери боюнча мамлекеттик комитетинин төрагасы Эрлис Тердикбаев;
  • "Континент Интергельпо" обсервациясы — маалыматтык технологиялар жана байланыш мамлекеттик комитетинин төрагасы Алтынбек Исмаилов;
  • №2 төрөт үйү — милдеттүү медициналык камсыздоо фондунун төрайымы Эльнура Боронбаева;
  • Көзү азиз жана көрүүсү начар балдардын атайын билим берүүчү мектеп-интернаты — мамлекеттик каттоо кызматынын төрагасы Акын Мамбеталиев;
  • Абдылда Каниметов атындагы №1 интернат — мамлекеттик мүлктү башкаруу фондунун төрагасы Жылдызбек Исакулов;
  • №6 шаардык клиникалык оорукана — архитектура, курулуш жана турак жай-коммуналдык чарба мамлекеттик агенттигинин директору Урматбек Кокочаров.
310
Белгилер:
пневмония, коронавирус, тизме, көзөмөл, оорукана, өкмөт, Кыргызстан
Тема:
Коронавируска байланыштуу Кыргызстандагы кырдаал
Тема боюнча
Германиядагы кыргызстандык дарыгерлер онлайн кеп-кеңеш бере баштайт