Паратхэквондо менен машыккан Нишан Жээналиева

Крокодил тиштеп кеткен десем ишенишчү. Бишкектик өзгөчө айымдын маеги

Бир убактарда Нишан Жээналиева өз күчүнө анча ишене бербеген жан болчу, колу-бутунда манжалары жок болуп, ден соолугу боюнча мүмкүнчүлүгү чектелген эле. Ушул тапта ал паратхэквондо боюнча эл аралык мелдештерге катышып келет, жакында жеке бизнесин түптөдү.

Эки жыл мурун Нишан машыгууга келет. Машыктыруучу андан "бутуңду чеч" деп өтүнгөндө ыйлап сала жаздаганын эстейт... Ал эми азыр Нишан тхэквондо күч бергенин, өзүндө ишеним жаратканын айтып, турмуштагы эң чоң жеңиши катары уулун атайт.

— Өзүңүз тууралуу билсек.

— 3-класска чейин Чалдыбарда окудум. Совет убагында ал жакта ден соолугунан мүмкүнчүлүгү чектелген жападан жалгыз атайын мектеп-интернат бар эле. СССР ыдыраган соң мектепти каржылай албай калышты, ошондо үчүнчү класста болчумун. Бардык балдарды ата-энелер алып кетишти, апам мени Бишкектеги атайын интернатка берди. Бирок кишинин көптүгүнөн таптакыр көнө албай койдум. Ошондо ата-энем батирибизди сатып, айылга көчүүнү чечти. Ал жакта мен кадимки мектепте окуй баштадым.

— Классташтарыңыз сизге кандай мамиле кылышчу эле?

— Жакшы. Айланамдагылар мага жаман мамиле жасаган жок. Балдардын өзгөчө көз карашын эс тартып калган кезде байкадым. Адатта чоң кишилер жанында мүмкүнчүлүгү чектелген адамды көрсө, эч үндөбөй өтүп кетишет эмеспи. Ал эми балдар оюндагысын бүт айтат.

Негизинен наристелер гана машыккан менчик балет студиясында төрт жыл администратор болуп иштедим. Улам жаңы келгендердин реакциясы ар кандай болчу — кээ бири таң калчу, кай бири коркчу, айрымдар суроолорун жаадырчу. Андайда мен тамашалап, манжаларымды крокодил жеп кеткен деп койчумун. Балдар аябай таң калып: "Оу! Сиз Африкага бардыңыз беле?" — деп сурашат. Баса, кээде чоңдор деле ишенип алышчу, анан гана тамаша экенин түшүнүшчү. 

Кинорежиссер Нишана Жээналиева во время беседы на радио Sputnik Кыргызстан
© Sputnik / Табылды Кадырбеков
Нишан тхэквондо күч бергенин, өзүндө ишеним жаратканын айтып, турмуштагы эң чоң жеңиши катары уулун атайт

— Спортко кандайча аралашып калдыңыз?

— Курбум телефон чалып паратхэквондого кандай карай турганымды сурап калды. Кызыга түштүм, анан бир көрөйүнчү дедим. Азия жана Иорданиядагы Ачык чемпионатка катышып келүүгө үлгүрдүм, эми токтотпойм.

Эл аралык мелдештер жөнүндөгү кабар мени ар кандай сезимдерге бөлөдү: кубаныч, жоопкерчилик, жеңишке умтулуу, анан утулуп, ыйладым. Спортто кээде утуларыңды да түшүнүү керек эмеспи, негедир мен дароо эле жеңишти самап алсам керек, ошол мага чоң сабак болду. Бирок машыктыруучум Азиз Боталиев мага ишенгенин туюп турам. Балким, муну айтканым өзүмчүлдүк болор, бирок үмүт болбосо, ал башка параспортчуну издемек да.

— Машыктыруучу сизди аяп, эркиңизге коюп койбойбу?

— Жок. Ал мага анын ишеничин актаганымды, жаш баладай артымдан убара тарттырбай турганымды айтты. Менимче,  бизди коом көбүрөөк чектейби деп ойлоп калдым. Паратхэквондо мага күч берди. Мурда мен өз күчүмө ишенбеген, ойлорум менен баарын чектеп койгон адам элем. Мисалы, машыгуу маалында жылаңайлак жүрүш керек. Ал эми менин колдорум эле эмес, буттарымда да мандем бар. Машыктыруучу:

"Байпагыңды чеч" дегенде дендароо болуп, ыйлап жибергем. Мурда мен көл жээгинде да жылаңайлак жүргөн эмесмин, ал эми залда толтура майда балдар, спортчулар... Ошондо машыктыруучу: "Эгер залда жылаңайлак жүрө албасаң, мелдештерге кантип чыгасың?!" – деп катуу айтты.

Анан ал: "Же азыр байпагыңды чечесиң, биз машыга баштайбыз. Болбосо, азыртан кол куушуруп, токтотосуң", — деп шарт койду. Улантам деп чечтим.

Жакшы жыйынтыктарга жетип, медаль тагынуу үчүн машыгууга көбүрөөк убакыт бөлгүм келет. Бирок жоопкерчилиги менин мойнумда болгон апам менен балам бар. Уулум былтыр мектепке барды, ошондуктан иштөөгө тийишмин. Эгер биз жалгыз пенсиябызга гана таяна турган болсок, жашаш кыйын. Апам 5 миң сом, мен болгону 4 миң сом пенсия алам. Убакытты жумушка, машыгууга жана бала тарбиялоого бөлүшкө аргасызмын. 

Предприниматель из Кыргызстана занимающаяся паратхэквондо паратхэквондо
© Sputnik / Табылды Кадырбеков
Бир убактарда Нишан Жээналиева өз күчүнө анча ишене бербеген жан болчу, колу-бутунда манжалары жок болуп, ден соолугу боюнча мүмкүнчүлүгү чектелген эле

— Уулуңуз да спорт менен машыгабы?

— Менден кийин ал да тхэквондо менен машыга баштады. Ашкере кыймылдуу, ошондуктан машыгууга келгенде бүт энергиясын сарптайт. Жакшы жыйынтыктарды жаратат деп үмүт артам. Машыктыруучудан анын канчалык жөндөмдүү экенин кайра-кайра сурай берем. Бирок уулум али кичине, эгер кийин да тхэквондо менен машыгууну уланткысы келсе, колдобой койбойм. Азыр машыгуудан калып калса аябай санаага батат.

— Кай бир адам спорт менен ден соолугу, айрымдары ырахат алуу үчүн машыгат. Ал эми сиз медаль тагынууну самайт экенсиз.

— Өмүрүм текке кетпегенин өзүмө далилдегим келет. Уулум, элим мени менен сыймыктанса, өзүм өзүмө ыраазы болсом дейм. Андан сырткары, мүмкүнчүлүгү чектелген көп адамдар жашоого нааразы болуп, айрымдары өз өмүрүн кыюуга чейин барат. Андай адамдар өздөрүнө: "Нишандын колунан келди, демек, менин да күчүм жетет" – дегендей болушун каалайт элем. Адам максатын жүзөгө ашырууга аттанганда күчү топтолот. Мага ал жөн эле медаль болбойт. Ал медаль жоопкерчилик артат.

— Маекке чакырарда машыктыруучуңуз сизди жеке иш баштаганыңыздан кеп салган.

— Россиядан кол менен чиймеленген идиш-аяк соода түйүнүн Бишкектин ири борборлорунун биринде ачтым. Ар бир сатылган идиштен кийин кардарлардын достору жана туугандары келишет. Бирок башта өз күчүмө көп ишене алчу эмесмин. Паратхэквондо менде ошол ишенимди ойготту, анан билек түрө кириштим. Көрсө, өзүңө өзүң ишенишиң гана керек экен, анан сөзсүз баары ишке ашчудай. Көңүлүңө жаккан иш менен алектенсең, киреше да келет, жашоо да жакшыра түшөт.

Айлыктан айлыкка чейин күтүп жашабай жеке ишимди ачуу боюнча мурдатан эле ойлорум бар эле. Мындан тышкары, тхэквондо мелдештерине акча керек. Акысыз машыгабыз, форма да сатып албайбыз. Бирок мелдештерге барарда бардык каалгаларды каккылоого аргасыз болобуз. Эгер 10 эшикти каккыласак, бирөө гана ачат. Кыргызстанда эл аралык деңгээлде өлкөнү тааныта турган спортчуга колдоо көрсөтүү керек деген түшүнүк жок. Адатта: "Адегенде ийгиликке жетиш, анан биз каржылык жактан жардам беребиз", – дешет. Эгер бул тескерисинче болсо, кыргызстандыктар көп жакшы жыйынтыктарды көрсөтүшмөк. 

Предприниматель из Кыргызстана занимающаяся паратхэквондо паратхэквондо
© Sputnik / Табылды Кадырбеков
Ушул тапта Жээналиева паратхэквондо боюнча эл аралык мелдештерге катышып келет, жакында жеке бизнесин түптөдү

— Эгер сизден эң чоң жетишкендигиңизди айтыңыз десе, эмнени атамаксыз?

— Уулумду. Сенин жолуңду улаган бирөө болгону керемет да. Аны менен аябай сыймыктанам. Көкүрөк кере: "Мына менин апам" деп сыймыктанышы үчүн ага үлгү болгум келет. Менин утулганымда ал: "Апа, эч нерсе эмес, биз чогуу барабыз, анан чогуу утуп келебиз", – деди. Менден кыйла улуу мүмкүнчүлүгү чектелген бир таанышым бар. Ал бир жолу: "Бала төрөп алууга батынбадым. Сен эр экенсиң", – деген. Сонун жана дени сак бир уулум бар деп сыймык менен айта алам. Уулум — менин чоң жеңишим.

Буга чейин маек курган Айдана майыптарга жалооруп кароонун кереги жок деген пикирде. Окуп көрүңүз.

Белгилер:
бизнес, акча, мелдеш, машыгуу, крокодил, майып
Тема боюнча
Паралимпиадачы Эсен Калиев: тагдыр экен, уулумду жалгыз тарбиялайм
Дүйнө чемпиону Жолдошбеков: сыртка чыкканда чучук, кукси салып алабыз
Жамгырдуу аба ырайы. Архивдик сүрөт

Жекшембиге карата аба ырайы

Жекшембиге караган түнү Ош, Жалал-Абад жана Баткен облустарынын кээ бир райондорунда жамгыр, тоолуу жерлеринде кар жаайт.

БИШКЕК, 17-апр. — Sputnik. 18-апрель күнү күндүз өлкөнүн көпчүлүк аймактарында мезгил-мезгили менен жаан, тоолуу райондордо кар жаашы күтүлөт. Бул тууралуу Кыргызгидромет билдирди.

Батыштан соккон шамалдын ылдамдыгы секундасына 4-9 метрден айрым жерлерде 15-20 метрге жетет.

Абанын температурасы Чүй менен Таласта +16...+21, Ош, Жалал-Абад жана Баткен облустарында +17..+22, ал эми Ысык-Көл, Нарын жергесинде +11...+16 градус болору айтылды.

Бул күнү Бишкек, Ош шаарларында жамгыр жаашы мүмкүн. Күндүн табы Бишкекте +19...+21, Ошто +20...+22 градуска көтөрүлөт.

Белгилер:
Кыргызстан, апрель, аба ырайы
Тема боюнча
Жайдагыдай ысыйт! Май айына карата аба ырайы
Заслуженная артистка КР Алина Жетигенова во время фотосета

Беш неберем бар, алтынчысын күтүүдөбүз. Ырчы Алина Жетигенова менен маек

(жаңыланган 19:50 17.04.2021)
Кыргыз эстрадасында өзүнүн назиктиги, өзгөчө имиджи жана ЖМКга көп чыкпаганы менен айырмаланган ырчы Алина Жетигенованын ысымы жумурай-журтка маалым.

Сахнада ырдап жүргөнүнө кырк жылга аяк баскан ырчы айым бүгүн да кырктын кырындагыдай кулпуруп турат.

КРдин эмгек сиңирген артисти Алина Жетигенованын Sputnik Кыргызстан агенттигине берген маегин окуп отуруп, бул инсандын ар ишке өтө жоопкерчилик менен мамиле жасай турганына күбө болосуздар.

— Биз сизди сырдуу, экинчи жагынан бир калыпта жүргөн сахна адамы катары тааныйбыз. Анан дагы массалык маалымат каражаттарына өтө эле аз чыгасыз. Бул сиздин имиджиңизби же жөн гана ушундай учур болуп калып жатабы?

— Менин сахнада жүргөнүмө быйыл 40 жылдын жүзү болот. Байкаган адам болгон мүнөзүм ушундай экенин айтар. Башында такыр интервью берүүнү билчү эмесмин. Оюмду чогулта албай, тартынып, маек берүүдөн качып турчумун. Буга кээ бирлер китепти көп окуу керек деген кеңештерин беришти. Бирок мен башынан эле китеп сүйгөн адаммын. Азыр да тынбай окуйм. Ошентсе да негедир оюмду билдирүүдө, жан дүйнөмдөгү нерсени түшүндүрүүгө сөз байлыгым аз. Сөзгө чоркокмун. Азыркы маалда өзүңө жарнама болбосо, артта калып кете бересиң. Кудайга миң мертебе ыраазымын, журналисттердин, коомчулуктун арасында мени унутпай, сыйлап, чакырып турган адамдар бар. Негизи башынан эле элдик ырларга жакынмын, анткени джаз, блюз ыргактары ушул ырларда камтылгандай сезилет. Учурда ушул жагын колго алып иштеп чыгууну пландап жатам. 

Заслуженная артистка Кыргызской Республики Алина Жетигенова во время интервью на радио Sputnik Кыргызстан
© Sputnik / Асель Сыдыкова
Сахнада ырдап жүргөнүнө кырк жылга аяк баскан ырчы айым бүгүн да кырктын кырындагыдай кулпуруп турат. КРдин эмгек сиңирген артисти Алина Жетигенова

— Ушул 40 жыл аралыгында кыргыз эстрадасында кандай өзгөрүүлөр болду деп ойлойсуз? Кайсы жагы көңүлгө толбойт же мактаныч дегендей?

— Мен алгач ирет сахнага 1982-жылы чыккам. Ушул аралыктан бери башка эч бир тармакта иштебей, бир гана чыгармачылык менен алектенип келем. Негизинен сахнада эки доорду басыптырмын. Биринчиси — Советтер Союзу учурунда жандуу үн менен, музыкалык аспаптардын коштоосунда ырдап, чоң сыноодон өтүп сабак алдык. "Ариет" тобу менен биргеликте Борбордук Азияны, союздун 15 өлкөсүн кыдырып байгелүү, жемиштүү кайтканбыз. 1989-жылы Юрмалага, 1986-жылы Ташкентке, 1987-1989 -жылдары Москвада өткөн коңкурстарга катышып, алдыңкы орундарды багындырган элек.

Ал эми эгемендик алгандан кийин эстрада жааты фонограммага өттү. Фонограмма — бул тазаланган, жасалган, таптаза үн. Буга азыр элдин кулагын көндүрүп койдук. Анан жандуу ырдаганда аппаратурага жараша кээде туура эмес созуп алуу же кайсы бир сөздү адашып ката айтып алуу мүмкүн. Баары бир фонограммадай идеалдуу ырдай албайсың да. Жаңылып калсаң "ырдай албай калды" деген негатив сөздөр айтылат. Фонограмманы клипте же телевидениеге гана колдонсо болор эле. Бирок жандуу ырдоо үчүн ырчылардын баары эле атайын аппаратура, музыкалык аспаптарды сатып ала албайт.

— Жасалмалуулукка көнө түштүк. Мындан чыгууга болобу?

— Мамлекетибиз байыса, мурдагыдай мыкты аппаратураларды алып келсе, акырындап мындан да кутулсак керек. Мурда керектүү сонун аппаратуралар бар болгондуктан жандуу ырдоого да шарт бар болчу. Жандуу ырдоо да өзү керемет. Фонограмманы жоюу керек деген да сөздөр айтылбадыбы, бирок мурда мамлекеттик ырчыларга цензура бар болчу. Азыр эми мамлекеттик ырчылар аз. Экинчиден, алгач шарт түзүп, анан талап коюу керек да. Акырындап мамлекет өнүгүп, аппаратура жаңырып, каржылоо жакшырса, ырчылар да иргелет эле. Азыр техниканын күчү менен үндү тазалап коюп жатышат, негизи чыныгы ырчы болуу өтө кыйын. 

— Репертуарыңызда канча ырыңыз бар?

— Жазылган, жазылбаган болуп отуруп 300дөй ырым бар. 1991-жылдан 2005-жылга чейин чыккан ырлар элге абдан тараптыр. Мурда атайын комиссия ырлардын сөзүнө, обонуна, ырчылардын сахнага чыкчу кийимине чейин көңүл бурчу. Азыр андай эмес. Элдин табити да өзгөрүп калды. Кээ бир ырларды 1000 долларга жаздырып келсең, эл кабыл албай коёт. Тескерисинче, 200 долларга эле жазылган ырлар жакшы тарап кетет эмеспи. Эми бул жерде кеп акчада эмес, бирок сапат акчаны талап кылат да. Баары бир эле эл деген элек. Ушул 40 жылдан бери эл баалаганы үчүн келе жатам деп ойлойм. 

Заслуженная артистка КР Алина Жетигенова во время фотосета
© Фото / предоставлено Алиной Жетигеновой
Алина Жетигенова: мен алгач ирет сахнага 1982-жылы чыккам. Ушул аралыктан бери башка эч бир тармакта иштебей, бир гана чыгармачылык менен алектенип келем

— Чыгармачыл адам болуу өтө кыйын. Жасаган эмгектен тышкары таанымал адам өзүн дайыма көзөмөлдөп, адаттан тыш окуялардан оолак болуусу кажет. Себеби эл көзүндө. Сизде артка карап бир өкүнгөн учурлар болобу?

— Көбүнчө кайра жаралсаңыз ким болмок элеңиз деп суроо узатып калышат. Анда деле ырчы болмокмун. Жолдошум да чыгармачылыгымды колдогондуктан бул жагынан мага жакшы болду. Демөөрчүм да ошол киши. Анан кайын-журтумдан да бут тосуулар болгон жок. Эми жашоомдо кетирген катачылыктар болгондур, бирок арман кылган учурум болгон эмес. 

— Үй-бүлөңүз да коомчулукка көп ачыкка чыкпайт. Уулуңуз Азизди билебиз, жакындарыңыз тууралуу айтып берсеңиз...

— Азиз мага караганда чыгармачылыкта, ыр тандоодо майын чыгара иштейт. Өзү Мукаш Абдраев атындагы музыкалык мектепте саксофон классын бүткөн. Кызым да фортепиано классын аяктаган. Азиз жалаң классикалык музыкаларды угат, жөн эле барып бир жерде ырдай бергенди жактырбайт. Үйдө, бөлмөсүндө музыкалык аппаратурасы бар. Көбүнчө ошол жакта болуп, дайыма машыгат. Ушул убакка чейин Жамилия Муратовага барып, үнүн койдуруп келет. Ушул жагынан өзүнө өтө эле сын көз менен карайт. Мындан улам мага уулумдун ушул сапаты аны артка тартып жаткандай сезилет. Өзүнө да бушайман болуп айтам. Убакыт болсо минтип зымырап уча берет экен. Өзү да намаз окугандыктан текстти дагы кылдат карап, көз карашына туура келбеген жерлери болсо ырдабай коёт.

Ал эми кызым азыр үчүнчү баласын төрөп үйдө. Убагында Казакстандан мыкты хореографтардын бий мектебин бүтүп келген, музыкалык билими да бар. Азыр да бийден сабак берет. Өзүнө талапты катуу койгон сапаты бар. Балдарыма "убактыңар өтүп жатат" деп көп айтам, экөөнөн үмүтүм чоң.

Эң кичүү уулум Алтынбек музыкадан алыс адам. Ал чоң аталарынын колунда өстү. Кайната, кайненемдер кесиби боюнча дарыгер жана мугалим болгондуктан уулум да университетти бүтүп, мамлекеттик кызматта иштейт. Менин эмес, атасынын жолун жолдоду. Ишин абдан жакшы көрөт. Үйлөнткөнбүз, эми кудай буюрса небере күтүп жатабыз. 

Заслуженная артистка Кыргызской Республики Алина Жетигенова в офисе Sputnik
© Sputnik / Асель Сыдыкова
Алина Жетигенова: жазылган, жазылбаган болуп отуруп 300дөй ырым бар. 1991-жылдан 2005-жылга чейин чыккан ырлар элге абдан тараптыр. Мурда атайын комиссия ырлардын сөзүнө, обонуна, ырчылардын сахнага чыкчу кийимине чейин көңүл бурчу. Азыр андай эмес

— Жалпы канча небереңиз бар?

— Беш неберем бар. Алтынчысын күтүп жатабыз.

— Өмүрлөрү узун болсун! Ырчылардын арасында кыргыз кинолоруна тартылуу модага айланды. Сиз тартылууга чакырса барат белеңиз?

— Режиссёр Геннадий Базаров мени киного тартылууга эки жолу чакырганда рахматымды билдирип, актрисалык шыгым жок экенин айткам. Бирок болбой эле "Метаморфоза шоу самоубийц" фильмине катышып калдым. Ал жерде деле ырчынын ролун ойногондуктан мага жеңил болду. Кийин Ырыс Жоомартова "Шаардык келин Шарапат" фильминде шаардык кыздын апасынын ролун аткарууга чакырып, тартылдым. Кечирим сурайм, бирок кино тармагы меники эмес экенин түшүндүм. Кийин барбай эле койбой деп да өкүнгөн учурлар болду. Анткени кино да чоң жоопкерчиликти талап кылат да. Андан соң да чакыруулар болду, бирок мен жөн эле коёюнчу дедим. Өзүмдүн ойногонум өзүмө жаккан жок. Советтер Союзу убагында "Экран" деген журнал бар болчу. Ошондо не деген залкарлардын тасмадагы эмгектери чагылдырылган. Өзүмдү салыштырып, уялдым. Ал кишилер кандай гана чеберлер эле, ушул убакка чейин суктанып көрөм. Мен өзүмдү кинодон көрүп суктанган жокмун. 

Заслуженная артистка КР Алина Жетигенова во время фотосета
© Фото / предоставлено Алиной Жетигеновой
Алина Жетигенова: режиссёр Геннадий Базаров мени киного тартылууга эки жолу чакырганда рахматымды билдирип, актрисалык шыгым жок экенин айткам. Бирок болбой эле "Метамарфоза шоу самоубийц" фильмине катышып калдым

— Чыгармачылык адамдардын арасында акыркы убакта саясатка аралашуу күч алды. Мурда журналисттер саясатка аралашса таң калчубуз. Азыр шоу-бизнес өкүлдөрү Жогорку Кеңешке чейин баш багышууда. Буга кандай көз караштасыз?

— Саясатка аралашпасаң, ал сага аралашат деген сөз бар. Мурда саясатка аттанган чыгармачыл адамдарга такыр түшүнө алчу эмесмин. Көрсө мында да кызыкчылыктар бар өңдүү. Бирок менде саясатка баруу тууралуу ой жок. Анткени бул чоң жоопкерчилик. Буга чейин президентке, депутаттарга "мойнунда кандай жоопкерчиликтүү милдет турат" деп аячумун. Азыр, тескерисинче, ачуум келет. Бийлик эл алдында сыйын жоготуп алган өңдүү. Отуз жыл мурда кыйналып жашаган эл дагы эле ошол, өз түйшүгү менен өзү. Саясатка баргым келбейт, өзүмдүн чыгармачылыгым, сүйүктүү кесибим менен эле жүрө берейин.

— Обонун да, сөзүн да өзүңүз жазган сүйүктүү ырыңыз барбы?

— Жок, обон жазуу — бул да чоң жоопкерчилик. Өзүмдү кыйнап жаза албайм. Ар ким колунан келген ишин кылышы керек. Мага караганда уулум Азиз жакшы обондорду жазат. Мен эмнеге шыктуумун? Мен балдарыма, үй-бүлөмө кам көрүп, түрдүү тамактарды жасап алардын курсагын тойгузуп, камкор болууга жарайм. Анан да түймөнү мыкты түйөм. Ар кандай кийимдердин түрүн токуй алам. Ошондой эле дизайнердик шыгым бар. Креативдүү, башкача стилдеги сүрөттөрдү жакшы көрөм. Ушул нерселерден жаңыча ачылыштарды жасап, изденип, алардан жаңы нерселерди көрө алам. 

Заслуженная артистка Кыргызской Республики Алина Жетигенова в офисе Sputnik
© Sputnik / Асель Сыдыкова
Алина Жетигенова: обон жазуу — бул да чоң жоопкерчилик. Өзүмдү кыйнап жаза албайм. Ар ким колунан келген ишин кылышы керек

— Демек, сахнага чыккан имиджиңизди өзүңүз эле жасап коёт экенсиз да...

— Ооба, көбүнчөсүн өзүм эле даярдайм. Бирок профессионалдарга да кайрылып турам.

— Стилисттин таңуулаган имиджи сизге жакпасачы?

— Менин көңүлүм жумшак. Көпчүлүк учурда стилисттин сунуштаган көйнөгү жакпай калса деле көңүлүн калтырбай кием. Анан жакындарымдан тил угам (күлүп). Сиңдилерим да профессионал стилист болгондуктан көбүнчө аларга кайрылам. Алар мени оңдоп-түзөп турушат.

— Канча бир туугансыз?

— Биз төрт кызбыз. Мен эң улуусумун. Сиңдим Назира мага караганда сөзгө чечен. Кичинесинен эле куудулдук жагы бар. "Чоңойгондо клоун болом" дей берчү. Назираны (Жетигенова — ред.) россиялык куудул айым Елена Воробейге окшоштура берем. Анан ага "сен ушуларды көрүп, классикага басым жаса" деп айтам. Мен, тескерисинче, айылда кемпир-чалдын колунда чоңойгом. Ал шаарда өстү. Бирок Назира айылдык кыздардын образын чагылдырганды жакшы көрөт. Мен кичинемден эле пластинкаларды коюп, орустун классик ырчыларын угууну каалачу элем. Кийинчерээк европалык ырчыларды, француз ырчыларын да көп угуп калдым. Эдит Пиафты ушуга чейин жакшы көрөм. Азыр да анын тагдырына таң калам. Андан кийин Мирей Мотьенин ырларына ашык болдум. Мотьенин бир ырын сөзсүз ырдап чыгам деп атайын даярданып, француз тилинен сабак алып жүрүп ырдап чыккам. Көрсө француз тили биздин тилге окшош, аларда да ү, ө, ң тыбыштары бар экен. Көп кыйналган жокмун. Бул ырга он беш жылдан ашып калды. Анан, албетте, россиялык Лариса Долина, Алла Пугачёва, Софья Ротаруну жакшы көрүп угам. Алла Пугачёванын ар бир ырында өзүнүн тагдырын ачып берген сапаты жагат. Бир ырын укканча кино көргөндөй болосуң. Анан Мыскал Өмүрканованын үнүнө суктанам. Негизи дүйнөлүк нукура таланттарды баалайм. 

Заслуженная артистка КР Алина Жетигенова во время фотосета
© Фото / предоставлено Алиной Жетигеновой
Алина Жетигенова: көпчүлүк биле бербегени менен мен комуз күүлөрүн ушунчалык жакшы көрүп угам жана чоң-чоң күүлөрдү чертем

— Эң алгач ирет чоң сахнага чыккан күн эсиңиздеби?

— Эсимде, 1982-жылы "Жетиген" ансамбли менен филармонияга барганбыз. Анда бизде күнүнө репетиция болчу да. Абдан такшалып калганда гана сахнага чыгарчу. Жалил Сыдыковдун "Бозойго" деген ырын ырдап абдан толкундангам. Анан 1989-жылы Юрмалага барганда аябай толкунданганым эсимде. Микрофонду таштап эле качып кетким келди. Бирок артыңдагы "Кыргызстан" деген чоң намысты ташташ өтө оор экен. Коркконуман тизелерим калчылдап, ошонун баары үнүмө берилбесе экен деп кооптонгом. Болгондо да абдан оор джаз ырды тандап алыпмын. Бирок ошону татыктуу ырдап, ортосундагы импровизациясын аткарып чыктым. Экинчисинде Жылдыз Малдыбаеванын "Сезим ойлору" деген ырын ырдадым. Мени жалгыз бир эле адам коштоп барган. Негизи мындай коңкурска көп жандооч менен барган дем-күч болот. Сосо Павлиашвили менден кийин чыкмак, аны 20дай адам жандап жүрдү. Жанында жандоочтор көп болсо адам ишенимдүү да болот экен. Павлиашвилини "чёрный ворон" десем, ал мени "кролик" деп койчу (күлүп). Анткени сахнага чыгардын алдында коркуп турчумун. Бирок ошол Юрмалага барганыма абдан сыймыктанам. Анткени Прибалтика, Өзбекстан, Казакстан, Россиядан келген бир топ ырчы досторду тапканбыз. Көпкө чейин байланышта болдук. Павлиашвили менен бир топ мезгилге чейин телефон аркылуу сүйлөшүп турчубуз. Кийин эле номерлерибиз алмашып, адашып калдык.

— Алдыда кандай пландарыңыз бар, шакирт таптап жатасызбы?

— Биздики үй-бүлөлүк топко айланып кетти. Өзүмдүн тобума 30 жыл болуп калыптыр. Керек болгон учурда чогула коёбуз. Нурлан Намазалиев хореограф, Назира Жетигенова куудул, Мирлан Жетигенов алып баруучу жана окуучум Фарида Карбозова болуп байланыш бекем. Булар менен тартынбай туруп "чыгармачылык тобубуз бар" деп айта алам. Бирок атайын бирөөнү шакирттикке алып, ага продюсерлик кылуудан корком. Анткени ал абдан таланттуу адам болуп калса, жакшы чыгара албай каламбы же таланты жок болсо деле убара боломбу деген түйшүктөрү болот. Бул да болсо чоң милдет. 

Заслуженные артистки Айчурек Иманалиева, Алина Жетигенова и Асель Турдалиева исполняют хит Кыргызстан,алга,алга!
© Фото / предоставлено Айчурек Иманалиевой
Алина Жетигенова: биздики үй-бүлөлүк топко айланып кетти. Өзүмдүн тобума 30 жыл болуп калыптыр. Керек болгон учурда чогула коёбуз. Нурлан Намазалиев хореограф, Назира Жетигенова куудул, Мирлан Жетигенов алып баруучу жана окуучум Фарида Карбозова болуп байланыш бекем. Булар менен тартынбай туруп "чыгармачылык тобубуз бар" деп айта алам

— Биздеги музыкалык билим берүү деңгээлин кандай баалайсыз. Ошол эле медицина же аскер жаатында билим берүүнүн сапаты түшүп кеткендигин айтышат?

— Бизде жакшы мугалимдер бар. Бирок жалпы музыкалык билим берүү жаатында да ошол сапаттын төмөндөө тенденциясы байкалат. Ошол эле Мукаш Абдраев атындагы музыкалык мектепти алалы. Мурда еврейлер, немецтер күчтүү билим берчү, алардан билим алып калган мыкты кыргыз мугалимдер деле бар. Бирок билимдин сапаты жалпысынан төмөндөп бара жаткандыгы сезилет.

Кубандырганы, эл арасынан чыгып жаткан нукура таланттар көп. Мисалы, төкмө акындар менен сыймыктанам. Айтыштарын калтырбай көрөм. Казактар менен айтышып жеңгенде абдан ыраазы болуп, сыймыктанып калам. Кичинемде атамдын алдына отуруп алып Саякбай Каралаевдин манас айтканын теле аркылуу оозумду ачып көрчүмүн. Манасчыларды да баалайм. Көпчүлүк биле бербегени менен мен комуз күүлөрүн ушунчалык жакшы көрүп угам жана чоң-чоң күүлөрдү чертем. Сахнага мурдараак комуз менен чыксам болот эле, бирок азыр укмуштай мыкты ойногон жаштар бар. Көрүп көз сүйүнөт. Элдик аспаптарда ойногон адамдарга таазим кылам.

Белгилер:
билим, мугалим, Манас, комуз, обончу, үй-бүлө, чыгармачылык, ыр, Алина Жетигенова
Тема боюнча
Укук коргоочулардын үйүндө чоңойгом. Ырчы НурЧолпондун маеги
Беларустун ички иштер министрлигинин кызматкерлери.Архивдик сүрөт

ФСБ: Лукашенкону өлтүрүүгө камданып, Беларуста төңкөрүш даярдагандар кармалды

(жаңыланган 03:18 18.04.2021)
Зенкович АКШ менен Польшада жүрүп келгенден кийин Москвадагы ресторандардын биринде беларустук генералдар менен жолугуп, пландалган аракеттердин ишке ашышы үчүн өлкө башында тургандардын көзүн тазалоо керектигин айткан.

БИШКЕК, 18-апр. — Sputnik. Москвадан 9-май күнү Беларусь президенти Александр Лукашенкону жок кылып, өлкөдө аскердик төңкөрүш жасоого камданып жүргөндөр кармалды. Бул тууралуу ФСБнын коомдук байланыш борборуна таянуу менен РИА Новости жазды.

Маалыматта колго түшүрүлгөндөр Беларусь менен Россиянын жарандыгын алган Юрий Зенкович менен беларусиялык Флександр Федута аттуу адамдар экени айтылат.

Россиянын атайын кызматы коңшу өлкөнүн Мамлекеттик коопсуздук комитети менен биргеликте иш алып барган.

"Беларустук кесиптештердин берген маалыматы боюнча, Зенкович менен Федута мессенжерлердин биринде аскердик төңкөрүштүн планын талкуулап, Москвада оппозициялык маанайдагы генералдар менен жолугууну көздөгөн", — деп айтылат кабарда.

Зенкович АКШ менен Польшада жүрүп келгенден кийин Москвадагы ресторандардын биринде беларустук генералдар менен жолугуп, пландалган аракеттердин ишке ашышы үчүн өлкө башында тургандардын көзүн тазалоо керектигин айткан. Түзүлгөн план боюнча радио жана теле борборлорду басып алып, ички аскер бөлүктөрүнүн жолун тосуу каралган. Күч структураларынын ишин токтотуу үчүн электр энергияны өчүрүү даярдалганы маалым болду.

Натыйжада конституциялык түзүлүш өзгөрүп, бийлик "Улуттук элдешүү комитетине" өтмөк.

Зенкович менен Федутага карата Беларустун тергөө органдары 357-беренесинин ("Мамлекеттик бийликти басып алууга аракет кылуу") негизинде иш алып барууда.

Белгилер:
бийлик, мамлекеттик төңкөрүш, Өлтүрүү, ФСБ, Александр Лукашенко, Россия, Беларусь
Тема боюнча
Лукашенконун уулуна генерал наамы берилди
Лукашенко Беларустагы митингдердин көпкө созулушуна пандемияны айыптады