Көчөдө бараткан аял. Архивдик сүрөт

Кызым турмушка чыкпай калабы деп корком... Эненин каты

20293
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасынын бул жолку чыгарылышында жашы өтүп бараткан, турмушка чыга элек кызына кабатыр болгон эненин каты жарыяланды.

Саламатсыздарбы? Жашым 60ка чамалап калды, абышкам болсо 67де. Төрт балабыз бар, үчөө эркек, бирөө кыз. Эки эркектен кийин төрөлгөн кызыбыз Жийдени абышкам экөөбүз көзүн карап чоңойттук. Оозунан чыкканын алып берчүбүз. Сабактарын жакшы окуду. Кийин өз күчү менен чет мамлекетке окууга өттү. Кызыбыз менен сыймыктанып, кубанган элек. Ал окуусун бүтөрү менен дагы башкасына тапшырды. Ошентип чет өлкөдө 10 жылдай жүрдү окшойт. Ортодо каникулга келип-кетип жатты. Күйөө, жигитти сөз кылчу да эмес. Таптакыр эле башка улуттун жараны болуп калбасын деп 10 жылдан кийин атасы экөөбүз чакыртып алдык. Антпесек жүрө берчүдөй. Бишкекке келгенине эки жыл болду, кызыбыз азыр 35те. Жашоого көз карашы, баалуулуктары аябай өзгөрүптүр. Өзүм тарбиялаган кызды өзүм түшүнө албай отурам. Үй оокаттарына жок сыяктуу. Элге да көп аралашпайт, өзү менен өзү. "Турмушка чык" десек эле "силерден күйөө сураган жокмун" деп кагып салат. Атасы экөөбүз себинен бери даярдап койгонбуз. 40ка чыкканда баарын чанып, күйөө да албай калат го деп корком. Көзүбүз өткүчө бир жерден орун-очок алып, балалуу болуп калса. Анымды түшүнбөйт, уккусу да келбейт. Алдында автоунаасы бар, эми үй алып берели деп жатабыз. Аны менен тең кыздардын балдары мектепке барып жатат. Кээде "күйөөгө тийбесе да, жок дегенде төрөп алса" деп ойлоп кетем. Анымды абышкам укса чалкасынан кетет го. Эмне кылышты да билбей калдым. Урушуп айттым, алдап айттым, болбой койду. Жигит тууралуу сурасам да унчукпайт. Кайра чет өлкөсүнө кетип, ошол жакта биротоло калып калбаса болду. Жүргөнү башкача. Жалгыз кызымдын жанымда болушун каалайм. Элдин кыздарындай балалуу болуп, бактысын тапса экен. Эр албай же эрге тийбей кара далы болуп калса кантем? Кызыма эмне кылып жардам бере алам? Же мен туура эмес ойлонуп жатамбы? Кеңеш бергилечи.

Нуриза Батырбекова, психолог:

— Бул суроого транзакттык анализдөө методу менен жооп берейин. Аталган методдо "ар бир адам жакшы, ар бир адам туура чечим кабыл алат" деген позиция бар. Кат жазган эженин кызы Жийденин да өз ою бар. Ал азыр жаш, кичинекей кыз эмес. Акыл токтотуп калган убагы. Балким, пландап жүргөн чыгар. Анын ою, пландары менен да эсептешүү керек. Баланын көзүн карап, аны менчиктеп алуу туура эмес.

Эгер Жийде жашы өтүп, күйөөгө тийбей жатканын көйгөй катары көрсө, анда консультацияга чакырабыз. Эгер ал бул көрүнүштү көйгөй деп санабаса, анда ага жардам бере албайбыз. Кат жазган эжени кызы менен ачык сүйлөшүүгө чакырат элем. Дагы бир кеңешим, эмне кылышты өзү чечкидей жайына коюп койсун. Кызы кандай чечим кабыл албасын апасы аны жакшы көрөрүн айтышы керек. Бул учурда экөөнүн ортосундагы барьер жок болот. Бир айткан нерсени дайыма кайталай берүүнүн кажети жок. Ал бул сөздөн кутулуш үчүн чет өлкөгө кайра кетип калышы да мүмкүн, эркин койгула.

"Өзү үчүн ымыркай төрөп алсын" деген нерсеге кошулбайм. Жеке менин көз карашымда бул туура эмес. Анткени ар бир бала төрөлгөндө анын атасы жана апасы болушу керек. Өзү үчүн төрөп алса, түйшүктүн баары Жийдеге эле түшөт. Наристе да толук эмес үй-бүлөдө чоңоюп калат.

Кызыңыздын өз ою бар, чоң адам деп кабыл алсаңыз көп нерсе ордуна келет. Анткени акыркы чечимди баары бир өзү кабыл алат.

20293
Белгилер:
турмуш, үй-бүлө, кат, эне, психолог
Тема:
Психолог менен баарлашуу (121)
Тема боюнча
Камкор кайнагамды жактырып калдым. Келиндин каты
Небере күтүп калган кезде күйөөм жаш келинге кетип калды. Аялдын каты
Жүк көтөргөн адамдар. Архив

Россияда мекендештерди чек арадан өткөрөм деп алдап кеткен шылуун изделүүдө

27
(жаңыланган 00:41 23.09.2020)
Өзүн элчиликтин кызматкери катары тааныштырган киши чек арадан өткөрүүгө жардам берем деп ар бир мигранттан 7000 рублден алган.

БИШКЕК, 23-сен. — Sputnik. Россиядагы кыргызстандыктарды автобус менен мекенге жеткирүүнү убадалап, акчасын алдап кеткен киши изделүүдө. Бул тууралуу Тышкы иштер министрлиги билдирди.

Маалыматка ылайык, аты-жөнүн Кубанычбек Жээнкулов деп элчиликтин кызматкери катары тааныштырган жаран Казакстан чек арасын ачканын айткан. Ал жерден автобус менен өткөрүүгө жардам берем деп ар биринен 7000 рублден алып Башкыртстандан Оренбургга алып келген. Натыйжада шылуундун тузагына түшкөн мекендештер ара жолдо калышкан. Бул иш боюнча 22 киши элчиликке арыз жазды.

"Кубанычбек Жээнкулов деген элчиликтин кызматкери жок. Аны жоопко тартуу үчүн КР ИИМинин Россиядагы өкүлчүлүгү РФ ИИМи менен биргеликте издеп жатат. Мыйзамсыз түрдө акча чогултканы үчүн катуу жазага тартылат. Элчилик мекендештерди ушул сыяктуу фактылар болсо кылмыштын алдын алып, күнөөлүүлөрдү жоопко тартуу үчүн кабарлап коюуга чакырат", — деп жазылган билдирүүдө.

Даттануулар менен Россиядагы элчи Аликбек Жекшенкуловдун elchi.ru сайтындагы жеке блогуна жана КР ИИМдин РФтеги өкүлчүлүгүнө predstavitelstvomvd@mail.ru электрондук дареги же +7(926) 890 87 00 ыкчам байланыш номерине кайрылууга болот. Купуялуулукка кепилдик берилет.

Авиакаттам жанданса да Россиядан кыргызстандыктарды автобус менен ташуу уланат

Учурда Оренбург облусундагы орус-казак чек арасында Россиянын шаарларынан жана Башкыртстан Республикасынан келген 3500дөн ашык кыргызстандык топтолуп турганы маалым болду.

Элчилик Казакстандын аймагынан автобус менен өтүү үчүн "жашыл коридор" ачып берүү өтүнүчү менен казак тарапка кайрылган. Азырынча жооп келе элек.

Ошондой эле Оренбург облусунун жана Башкыртстандын жергиликтүү бийлик органдары менен биргеликте ал жердеги кыргызстандыктарга шарт түзүү иштери жүрүп жатканы белгиленди. Ушул тапта Россия тарап аларды акысыз түрдө жатаканаларга, балдар лагерлеринин аймактарына жайгаштырды, мындан тышкары, чатыр лагери түзүлгөн. Айрымдары мейманканаларга жана жатаканаларга жайгаштырылды. Жарандарга үч маал бекер тамак берилип жатканы айтылды.

Ошону менен катары элчилик мекендештерге Казакстан чек арасын толук ача электигин эскертип, өз алдынча келип топтолбоого чакырат.

Мүмкүнчүлүккө жараша учак менен кетүүнү сунуштайт. Ошону менен катар элчилик авиакаттамдардын санын көбөйтүү жана билет баасын арзандатуу боюнча сүйлөшүү жүргүзүп жатканы айтылды.

27
Белгилер:
Мигрант, автобус, алдамчылык, чек ара, Элчилик, Россия
Тема боюнча
Кыргызстандан чет өлкөлөргө ачылган каттамдардын тизмеси
22 миң рубль. Москва — Бишкек каттамына авиабилеттердин октябрдагы баасы айтылды
Лаборатория кызматкерлери. Архив

Казакстан коронавируска каршы вакцина чыгарып, ДССУда талапкер болуп катталды

76
(жаңыланган 21:13 22.09.2020)
Азыркы тапта Дүйнөлүк саламаттык сактоо уюмунун тизмесине Казакстандын COVID-19га каршы төрт вакцинасы катталганы айтылат.

БИШКЕК, 22-сен. — Sputnik. Казакстан коронавируска каршы колдонулуучу вакцина иштеп чыгып, Дүйнөлүк саламаттык сактоо уюмуна талапкер катары каттады. Бул тууралуу Sputnik Казакстан агенттиги билдирди.

Аталган препарат ийнесиз колдонулуп, мурунга чачыла турганы белгиленет.

Иштеп чыгуу процессине катышып жаткан казакстандык профессор Кайсар Табынов учурда вакцина жаныбарларга сыналып жатканын билдирген.

Россия Кыргызстанга коронавируска каршы вакцина жөнөтүүнү көздөп жатат

Азыркы тапта Дүйнөлүк саламаттык сактоо уюмунун тизмесине Казакстандын COVID-19га каршы төрт вакцинасы катталганы айтылат. Анын ичинен үчөө клиникага чейинки сыноо стадиясында турса, бирөө ыктыярчыларга сынала баштаган.

76
Белгилер:
Дүйнөлүк саламаттыкты сактоо уюму, Казакстан, вакцина
Тема:
Дүйнөгө жайылган коронавирус
Тема боюнча
Кыргызстанда COVID-19га каршы вакцинаны биринчи кимдер алат
ДССУ COVID-19га каршы чыгарылып жаткан вакциналардын санын айтты