Терезенин жанында отурган кыз. Архив

Келиниме "башкадан төрөп ал" деп айтсамбы?.. Кайнененин каты

4354
(жаңыланган 10:37 05.03.2020)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасынын бул жолку чыгарылышында уул-келини балалуу боло албай жүргөн эненин каты жарыяланды.

Саламатсыздарбы? Жашым 50дөн өтүп калса да чыгынып психологго кат жаздым. Бул кадамга деле аргасыздан барып жатам.

Көйгөйү жок адам болбосо керек, сөзсүз бир нерсе чыгат. Абышкам экөөбүз деле пайгамбар жашына жетели деп калдык. Үч уул, эки кызым бар. Жашоо-шартыбыз эл катары. Буга чейин айылда турчубуз. Кийин балдарым чет жакта иштеп келип шаарга үй салышты. Абышкам экөөбүздү ой-боюбузга койбой бул жакка алып келип алышкан. Азыр улуу баламдын колундабыз. Экинчи уулум да Россияда иштеп жүрүп үйлөндү, кийин шаарга там салды.

Бирок жүрөгүмдү өйүгөн маселе бар. Экинчи уулум менен келиним сегиз жылдан бери наристелүү боло албай жатышат. Экөөнүн ынтымактуулугун айт, бири-бирин сыйлап, көзүн карап турушат. Келинимдин барбаган дарыгери, көрүнбөгөн көз ачыгы калган жок. Дарынын түрүн ичип чыкты. Өткөндө уулум дагы кошо кеткен. Буга чейин мойну жар бербей барчу эмес. Анан эле дарыгерлер кептин баары баламда экенин айтышты. Уулум өзү билбейт, келинчеги да унчукпаптыр. Уккан кулагыма ишенбей, бир топко чейин жаман болуп жүрдүм. Көрсө, балам Россияда иштеп жүргөндө табарсыгына суук тийгизип алган экен. Келинимдин апасы жок, аны да аяйм. "Наристе жытын искесем" дегенде эки көзү төрт. Кайнагасынын балдарын укмуш карайт, аябай мээримдүү. Анын уулуман кетип калышын каалабайм. 

Ошондон улам мага "башкадан төрөп алсачы" деген ой келди. Бирок аны дегеле бирөөгө айтуудан айбыгып жатам. Уулумдун балалуу боло албай калышы мага да кыйын. Бирок ортодо бала жок болсо, маселе уулумда болсо келиним кетип калабы деп корком. Анда баламдын көргөн күнү эмне болот. Эптеп бирөөдөн төрөп, уулум менен жашай берсе кандай болот деп ойлоп жатам. Айрымдар мени "бул аялды мээсинен алган го" деп ойлоп жатса керек. Анан кантем? Балдарымдын бактысы мен үчүн биринчи орунда. Мындан улам психологго кат жаздым.

Балдарыма кантип жардам бере алам. Эмне кылса болот. Келиниме айтсамбы же айтпай эле койсомбу? Мага өткөндө "ушинтип жүрө беребизби" деп четин чыгарып ыйламсырады. Ошондон бери оюм бир жерде эмес. "Балдарым балалуу болбой калабы" деп ойлонгондо түнү менен кирпик какпай чыгып жатам. Келиним "бала багып алалы" десе, уулум "өзүбүз эле балалуу болобуз" деп болбой жатыптыр. Келинимдин чүнчүгөнүн, балага зар болуп жатканын көрүп эмне кылып жардам береримди билбей жатам. Аргасыз ушул ойду ага сунуштап көрсөмбү деп жатам. Башым катты.

Гүлнара Жасоолова, психолог:

--Эне катары балдарыңыздын турмушун ойлоп психологго кат жазганыңыздын өзү эле эрдик. Бирок уулуңуздун балалуу боло албай турганын, дарты бар экенин жашырбашыңар керек. Тескерисинче, эртерээк айтып, эртерээк дарыланса, балким, балалуу болоттур. Анын үстүнө уулуңуз жаш. Азыр заман илгеркидей эмес. Медицина өнүккөн, балалуу болууга шарттар көп. Бала багып алууга деле мүмкүнчүлүктөр толтура. "Ылайыктуу бала жок болуп жатат" деп жазыптырсыз. Бала эч качан ылайыктуу же ылайыксыз болуп бөлүнбөйт. "Башкадан төрөп алсачы" деген ойду түк ойлобоңуз. Аны келиниңизге айтканыңыз чекилик болот деп эсептейм. Уул-келиниңиздин үй-бүлөсүн андан башка жолдор менен деле сактап калса болот. Андан көрө уулуңуздун ден соолугун ойлоңуз.

Келиниңиз "бала багып албайм, өзүм төрөгүм келип жатат" дей турган болсо дарыгерлер, психологдор менен сизди аралаштырбай эле консультация алышы керек. Сиздин кеңеш менен бирөөнү таап, балалуу болсо, келин өмүр бою өзүн күнөөлүү сезип өтөт. Мындай жол менен балалуу болууну сиз эмес, психолог же дарыгер айтса бир жөн. Сиздин айтканыңыз ашыкча болуп калат. Бирок биринчи кезекте бул жаш үй-бүлө экен. Уулуңуз дарыланып, өздөрү аракет кылсын. Таптакыр болбой калса анан башка жолдорду караштырса болот.

4354
Белгилер:
кат, бала, уул, келин, үй-бүлө, ата-эне
Тема:
Психолог менен баарлашуу (108)
Тема боюнча
Кесиптеш кыз бассам-турсам оюман кетпей кууратты... Бүлөлүү эркектин каты
Жаш келинге кетип калган күйөөм майып болуп кайра келди... Аялдын каты
Өткөрүү бекетинде медициналык кызматкер. Архив

Жээнбеков: коронавирус инфекциясы аймактардагы көйгөйлөрдү ачыкка чыгарды

17
(жаңыланган 14:02 04.06.2020)
Жээнбеков бүгүнкү онлайн-жыйында аймактарды санариптештирүү боюнча талаптар эми бир топ күчөтүлөрүн билдирди.

БИШКЕК, 4-июн. — Sputnik. Коронавирус инфекциясынан кийинки өзгөчө кырдаал аймактардагы топтолгон бир топ кемчилик, көйгөйлөрдү ачыкка чыгаргандыктан, облустарды санариптештирүү мамлекеттик саясаттын артыкчылыктуу багыты бойдон калат. Бул туурасында президент Сооронбай Жээнбеков өлкө аймактарынын жетекчилери, Бишкек жана Ош шаарларынын мэрлери менен санарип баарлашуу учурунда айтканын анын маалымат кызматы кабарлады.

Президент аймактарды башкаруу, жергиликтүү бизнести колдоо үчүн жаңы мүмкүнчүлүктөрдү натыйжалуу пайдаланып, региондордун атаандаштык артыкчылыктарын болушунча жогорулатуу керектигин баса белгилеген.

"Аймактарды санариптештирүү боюнча талаптар күчөтүлөт", — деген Жээнбеков.

Бул жыйында облус жана райондордун жетекчилеринин ишин баалоонун башкы критерийи эмнелер болорун да айткан.

"Негизги максатыбыз — жаңы санарип мамилелерди колдонуу менен региондорду комплекстүү жана ырааттуу өнүктүрүү. Бюрократияны кыскартып, жер-жерлерде калкка кызмат көрсөтүүнүн сапатын жогорулатуу, муниципалдык кызматтагы жол-жоболорду автоматташтыруу менен жарандарыбыздын жашоо-турмушун жеңилдетүү — негизги милдеттерибиздин бири. Региондорго санарип технологияларды киргизүү жана колдонуу чөйрөсүн кеңейтүү облус жана райондордун жетекчилеринин ишин баалоонун башкы критерийлеринин бири болуп калат", — деген президент.

Онлайн-жыйында өлкөнү санариптештирүү, аймактарды өнүктүрүү жана коронавирус инфекциясы менен күрөшүү боюнча чаралар талкууланды.

17
Белгилер:
жетекчи, талап, аймактар, коронавирус, Сооронбай Жээнбеков, Кыргызстан
Тема:
Коронавируска байланыштуу Кыргызстандагы кырдаал
Тема боюнча
Жээнбеков жардамчысын Кадр кызматынын жетекчи орун басары кылып дайындады
Эл аралык Манас аэропортунда учак. Архив

15-июндан тарта тышкы каттамдар жанданат. Кайсы компаниялар учууга макулдук берди

44
(жаңыланган 13:44 04.06.2020)
“Түрк аба жолдору” 22-июндан баштап аба каттамдарын баштоого арыз берсе, “Аэрофлот” компаниясы июндун ортосунан тарта ишке киришүүгө даяр экендигин билдирген.

БИШКЕК, 4-июн. — Sputnik. Эл аралык аба каттамдарын 15-июндан баштап жаңылоо пландалып жатат. Бул тууралуу брифинг учурунда Жарандык авиация агенттигинин директору Курманбек Акышев билдирди.

Анын айтымында, Саламаттык сактоо министрлиги, аэропорттор жана Жарандык авиация агенттиги бир аптанын ичинде сырткы каттамдар боюнча алгоритм иштеп чыгат.

"Чет элдик компанияларга 15-июндан тарта учкула деп сунуштап жатабыз. "Түрк аба жолдору" 22-июндан баштап аба каттамдарын баштоого арыз беришти. Ал эми "Аэрофлот" компаниясы 15-июндан тарта ишке киришүүгө даяр экендигин билдирди", — деди Акышев.

Директор кошумчалагандай, бардык компанияларга бир ай бою жумасына бир жолу учуп туруу сунушталып жатат.

"Жалпысынан Кыргызстанга каттаган 6-7 компания бар. Алардын жарымы эле аптасына бир ирет учса, бир жумада барып-келиши менен 6-7 каттам жасап калат экен. Биздин жергиликтүү "Авиа Траффик" жумасына бир жолу ар кыл шаарларга учуп, 3-4 каттамдан аткарат", — деди жетекчи.

Каттамдардын саны азырынча дал ушунча болушуна Саламаттык сактоо жана Өзгөчө кырдаалдар министрликтери макул. Анткени бул көрсөткүч анча көп эмес болгондуктан, жүргүнчүлөрдү тосуп алып, медициналык кароодон өткөрүүгө жана обсервацияга жаткырууга мүмкүнчүлүк жетет.

Эске салсак, 5-июндан тарта өлкөдө ички авиарейстер менен аймактар аралык коомдук транспорт иштеп баштайт.

44
Белгилер:
авиакомпания, коронавирус, алгоритм, учак, каттам, Курманбек Акышев, Кыргызстан
Тема:
Коронавируска байланыштуу Кыргызстандагы кырдаал
Тема боюнча
Министр: Бишкек — Оштун ортосунда авиакаттам жумасына бир эле жолу болот
РФ элчилиги "Кант" базасынын аймагы Россияга өтөт деген кабарды төгүндөдү