Беременная женщина держится за плод

Кызым үчүн рахмат, Лариса! Аборттон баш тарттырган курбунун ак жарыгы

2785
(жаңыланган 15:28 07.03.2020)
Адамдын көңүлү — гүл. Жылт эткен жарык, жакшы көз караш, жагымдуу сөз маанай көтөрүп, ал тургай бир нече күн жүрөктү жылуулук аралап жүрөт.

Бул окуя 11 жыл мурда болгон. Жакын досумдун айтып берген баяны мага аябагандай чоң таасир калтырган. Sputnik агенттигинин "Ак жарык" рубрикасынын алкагында мен дагы бир адамдын тагдырына бурулуш жасаган окуяны окурмандар менен бөлүшкүм келди.

...Ал окуя күнү бүгүнкүдөй эсимде, көз алдымда. Азыр ойлосом кыйын кезеңди башыман кечирип жаткан учурум экен, мындай кылсаң туура болот деп багыт көрсөткөн киши болбоптур. Ал кезде балам бир жашка чыгып-чыга элек учуру, операция менен төрөдүм. Жолдошум да кызыктуудай болуп жүргөн, мени менен же жашаган киши эмес, же жашабаган киши эмес, чечкиндүү бир нерсеси жок, айтор, олку-солку эле. Эмчегимдин кесилгени өзүнчө бир эпопея, ичим тилик, баламдын ыйлаагы эми бир укмуш... Сиңдилерим, төркүнүм аябай жардам беришти, бирок ошол убакыт мен үчүн аябагандай оор болду.

Ошентип 10-11 айдан кийин эптеп-септеп өзүмө келип, баш көтөрүп калдым. Анан эле кош бойлуу экеним билинди. УЗИге түшсөм баланын жүрөгүнүн соккону билинип калыптыр. Кандай кылам? Атабыздын кейпи тиги. Боюмда бар экенин айтсам, тайсалдайт. Доктурлар "төрөсөң деле болот, алдырып салсаң деле болот" дешти. Жолдошум: "өзүң кесарево менен төрөсөң, белиң да ооруйт, мен сага эле карап атам..." деди. Эгер ошол жерден: "жакшы болгон турбайбы" деп эле койсо мен эки анжы болбойт болчумун. Баарын көтөрмөкмүн. Айтор, чечимди өзүм кабыл алышым керек эле, баланы алдырмай болдум.

Жеке клиникада каттоодо болчумун. Дарыгериме барсам, "анализдериңди алып, саат 3тө кел" деди. Абортко. Дагы 1-1,5 саат убакыт бар болчу. Үйгө барсам кеч болуп калчудай. Ошол жерде бир дүкөндө Лариса аттуу курбум иштечү, мамилебиз аябай жакшы эле. Ага бардым. Жакшы тосуп алды. Болгонун дасторконго жайып мага чай берди. Сөз ортосунда болгон окуямдын баарын айтып берип, "...азыр бир сааттан кийин абортко барам, ага чейин отура турайынчы" дедим. "Макул" деп экөөбүз ар нерсенин башын сүйлөшүп коюп отурдук. Бир саат тез эле өтүп кетти, туруп кийине баштадым. Коштошуп, эшикти көздөй жөнөдүм. Лариса менден мурда жетип, эшикти илип, ачкычты чөнтөгүнө салып алды да: "Никуда ты не пойдешь", - деди...

Мен эч нерсе деген жокмун, урушпадым, "коё бер" дебедим. Унчукпай отуруп бердим. Ансыз да эки анжы болуп, эмне кыларымды билбей, туура жолду тандай албай, керек болсо туурасы кайсы экенин билбей бычактын мизинде турганда Ларисанын бир эле сөзү баарына чекит коюп, мени туңгуюктан чыгарып койду.

Экөөбүз дагы бир сааттай отурдук, ал мени алаксытып бир нерселерди айтып берди, жумуш тууралуу сүйлөштүк. Кетип баратсам: "баары жакшы болот, кам санаба, мен жардам берем, жардам берчү кишилер табылат", - деди.

Ошентип андан кийинки жашоо башталды. Жолдошум менен ажырашып кеттим. Өзүмдү эч убакта ошондогудай ишенимдүү, бекем сезген эмесмин. Төрөгөнгө чейинки мезгил аябай тынч, жагымдуу өттү. Өзүмдү эч нерседен чектебей, каалаганымдай бастым, каалаган тамагымды жедим. Ай-күнүмө жетип кыздуу болдум, бактымда чек жок эле...

Наристем 2ге чыгып калганда көтөрүп алып Ларисага бардым. "Лариса, кызым үчүн чоң рахмат сага" дедим. Ошол боюнча байланышыбыз үзүлүп калды эле, былтыр курбумду кайра таап алдым. Азыр кызым 11ге чыкты. Эми буюрса, балдарымды ээрчитип алып, Ларисаны бир жерге чакырып, дасторкон четинде отурабыз деп пландап жатам.

Кызым үчүн ыраазымын, Лариса!

Жарыгыбызды чача жүрөлүчү!

2785
Белгилер:
операция, төрөт, күйөө бала, ажырашуу, үй-бүлө, аборт
Тема:
Ак жарык (26)
Тема боюнча
Мен ушинтет белем?.. Стамбулдан Анкарага келип Ошко китеп салган студент
Эне менен балдарды бириктирген тигүү машинасы. Айзатка тийген ак жарык
Чек ара. Архив

Казак чек арасындагы чатак: мигранттар алдамчылардын торуна кантип түштү

30
(жаңыланган 00:24 06.08.2020)
Оренбург менен Самаранын жанындагы чатыр шаарчанын жашоочулары үйүн көздөй жөнөдү. Кыргызстан жарандары Россиядан автобус менен жолго чыкты. Ал эми Өзбекстан атуулдарын жуманын түнүндө поезд менен алып чыгып кетишет.

Алексей Стефанов

Кыргызстан менен өзбекстандык мигранттар Самара менен Оренбург облустарынын админстративдик чек арасында россиялык тарип сактоочулар менен чырдашты деп ЖМКлар жаза баштаганда, маселе чечилип калган.

Казакстандын жанындагы аймакта үч лагерь пайда болгон. Оренбургдун Бузулук, Самаранын Большечерниговск райондорунда, үчүнчүсү эки аймактын чегиндеги админстративдик трассанын бойлой жайгашкан. Чатак дал ушул үчүнчүсүндө чыккан.

Россия-казак чек арасында чогулган кыргыз, өзбек мигранттары эртең мекенине жөнөтүлөт

Лагерлерде мекенине жетүүнү каалаган Кыргызстан менен Өзбекстандын жарандары жашап турган. Бирок жабылган чек арага туш келди. Алар бул аймакка кокустан келген эмес, мигранттар алдамчы мекендештеринин айтканына ишенип жолго чыккан.

Оренбург облусунун админстрациясы: колдон келишинче жардам бердик

"Бардык мамлекеттердин өкмөттөрү мигранттардын үйүнө жетип алышына жардам кылыш керек деген чечимге келип, жол ачып, кордидор уюштуруп берген. Кыргыздар эки миңден көбүрөөк эле, эки күн жолго чыгышты. Акыркыларын салган автобус да жөнөп кетти. Ал эми өзбектер 700гө чукул. Учурда Бузулук-Ташкент поезд каттамына билет алышууда, бейшемби түнү үйүнө кетет", - деп айтып берди Sputnik агенттигине Бузулуктун акиминин социалдык маселелер боюнча орун басары Татьяна Успанова.

Ал мигранттардын арбын бөлүгү талаада пайда болору менен райадминстрация Россияда калып калган бул калкка зарыл шарттарды түзүп берүү үчүн болгон аракетин кылгандыгын айтты. Тигилген чатырларга электр кубатын тартып алып келген, иче турган жана техникалык суу менен камсыздаган, таштанды салуучу контейнерди орноткон. Ажатканаларды курган.

Албетте, булар айылдагыдай болгону менен жоктон көрө жогору эле. Ага чейин бул жерде адам жашабаган ээн талаа болгонун Успанова кошумчалаган.

Оренбургдан келчү мекендештерди ташыган 43 автобус жолго чыкты

"Лагерге мекендештери келип мигранттарга жардам берип жатышты. Ишкерлер аларга жумуш сунуштаганы менен, эч ким иштей турган каалоосун билдирген жок. Кыязы, жашап турганга каражаттары бар окшойт. Биздин лагерь аркылуу үч миңге чукул мигрант өтсө, алардын 10го жакыны гана ишке чыгып, калганы жөнөп кетчү күндү күтүп отурушту", - деп айткан Успанова.

Гастарбайтерлер алдамчы-таксисттердин торуна түшүп калышты

"Азыр Бузулук районундагы лагерь жабылды, эл кетүүгө камынып отурушат", - деди ал.

"Бул деген алдамчылык да, эл социалдык тармакка жазылгандарга ишенип алыптыр. Анда бул жерде үйүнө кетебиз деген гастарбайтер пансиоанат, санаторийлерге жашап турат деп айтылган экен. Эки адам бир бөлмөгө жайгаштырылат жана үч маал тамак берилет дешиптир. Анан бизге Россиянын булуң-бурчтарынан – Москвадан, Сахалинден, Воронеж, Пермь, Краснодар, Тюменден келе башташыптыр… Бул жерге жеткенде эч нерсеси жок талаага туш болушту", - дейт ачууланган Успанова.

Ал улуттук топтордогу мындай билдирүүлөр токтобосо, ээн лагердин жанына чатырлар кайрадан тигилиши мүмкүн деп чочулап жатканын айтты. "Мен элди аяп жатам — алар ишенип, талаага келип жатышат".

"Ооба, туура, мындай маалыматты таксисттердин Telegram каналы таратат. Алар мигранттарды Өзбекстанга алып кетүүнү сунуштап, көп акча алышкан, бирок чек арадан жүргүнчүлөрдү таштап, өздөрү артка кетип калышкан", — деп билдирди Өзбектер жана өзбекстандыктардын бүткүл Россиялык конгрессинин аймактык бөлүмүнүн башчысы Диляра Сабирова.

Ал ушул күндөрдө мекендештерине күйүп-бышып жардам берип, көйгөйлөрүн чечкенге аракет кылып жатты.

"Биз Өзбекстандын жарандарын мекенине жөнөткөнү жатабыз. Бүгүн аталган өлкөнүн башкы консулу келип, аны менен биргеликте адамдардын санын аныктап, тизмесин түздүк. Эми 7-августка караган түнү Өзбекстанга эки курам жөнөтүлөт", — деди Сабирова.

16 вагондон турган бир поезд Оренбург облусундагы Бузулук станциясына, ал эми 20 вагондон турган экинчи поезд Самара аймагындагы Кинель станциясына келип, жума күнү кечинде 1500 адам Ташкентке кайтат.

"Бул жолкусунда маселеге олуттуу карадык. Кечээ түнкү саат бирге чейин тизмени түзүп, бүгүн бардыгын компьютерге тердик. Өткөндө жагымсыз жагдайга туш болдук эле, тагыргаагы, июль айынын орто ченинде мигранттарды поездге түшүрө баштаганда, ал жакта чоочун адамдар бар экени белгилүү болду. Эми мындай кырдаалга жол берилбейт, жөнөтүүнүн бардык процесси көзөмөлдөнөт", — деди Сабирова.

Ошондой эле Сабирова Кыргызстандын бардык жарандары лагердеги чатырлардан кеткендигин тастыктады. Ал эми Өзбекстандын жарандары билеттерди алып, поезддин келишин күтүп жатышат. Анын айтымында, Самара жана Оренбург облустарынын администрациясы мигранттар темир жол бекеттерине жетип алышы үчүн автобустарды беришет, андан кийин үйлөрүнө кетишет.

"Албетте, кыйынчылыктар дагы бар. Мисалы, бир адамды Новороссийскиден автоунаа менен алып келишкен, ал үчүнчү кабаттан кулап түшүп, өтө оор жаракат алган экен. Операция араң жасалган. Ал азыр деле автоунаада жатат, айланадагылар жардам берип атышат. Чартердик рейс жок болгондуктан, учак менен алып кете албай койдук. Кечээ бирөөлөр менен сүйлөшкөндө аны станцияга чейин алып барууну, мүмкүн болсо поезд менен жөнөтүүнү суранганбыз. Балдак таянган дагы эки киши бар, аларды тез арада мекенге кайтарышыбыз керек. Дагы кош бойлуу үч аял жана үч бала бар", — деп сөзүн жыйынтыктаган Сабирова.

Ал ойлогон ою ишке ашып, эл аман-эсен үйүнө жетип аларына үмүт артып турганын кошумчалады.

30
Белгилер:
поезд, автобус, коронавирус, мигранттар, Казакстан, Самара, Оренбург, Россия
Тема боюнча
Миңдеген кыргызстандыктар Россия менен каттамдын ачылышын күтүп жатат
Боом капчыгайындагы унаалар. Архив

Кулак кагыш! Ысык-Көл облусуна кирип-чыгуу өзгөрдү

323
(жаңыланган 21:55 05.08.2020)
Өкмөттүн облустагы өкүлү Түлөбаев аймактар аралык каттамга уруксат берилгенин айтып, жүргүнчүлөрдү ташуу менен алектенгендерге жоопкерчилик жүктөлө турганын эскерткен.

БИШКЕК, 5-авг. — Sputnik. Ысык-Көл облусунда аймактар жана райондор аралык каттамдарга уруксат берилип, карантиндик эки пост алынды. Бул тууралуу Облустук штаб кабарлады.

Штабдын жыйынында өкмөттүн Ысык-Көл облусундагы ыйгарым укуктуу өкүлү Балбак Түлөбаев айдоочуларга жана жүргүнчүлөрдү ташуу менен алектенген компания ээлерине жоопкерчилик жүктөлө турганын айткан.

"Райондор жана региондор аралык жүргүнчүлөрдү ташууга уруксат берилет. Бирок бет кап тагынуу режимин, санитардык нормаларды сактабаса мыйзам чегинде катуу чаралар көрүлөт", — деген Түлөбаев.

Тартип сактабаса, жабабыз! Балбак Түлөбаев Көлдө Жээнбековго убада берди

Ошондой эле облустун кире беришинде жайгашкан Ак-Кеме жана Кызыл-Омпол санитардык-карантиндик постторду алуу боюнча чечим кабыл алынган.

Түлөбаевдин айтымында, посттордо иштеп жаткан медиктер, мамлекеттик жана муниципалдык кызматкерлер өз ордунда иш алып баруусу керек.

"Медиктер, райондук мамлекеттик администрация жана мэриялардын кызматкерлери кезек менен посттордо нөөмөттө туруп келишкен. Учурда алар өз ордунда иштеши керек. Эгерде постторду иштетүүгө муктаждык болсо, бизде тиешелүү алгоритм бар", — деген облустун башчысы.

Белгилей кетсек, коронавирус кырдаалына байланыштуу Көлдө 10-июлдан тарта региондор аралык жана облустун ичинде каттаган автобус менен маршруткалар ишин токтоткон.

323
Белгилер:
чыгуу, кирүү, каттам, пост, Ысык-Көл облусу
Тема:
Коронавируска байланыштуу Кыргызстандагы кырдаал
Тема боюнча
"Колдоо керек". Чолпон-аталык дарыгерлер Жээнбековго даттанды. Сүрөт