Кыз гүлдөр менен шаардын көчөсүндө басып жүргөн убакытта. Архив

Үйлөнөрдө эле жигиттер тескери басып кетет. Турмуштан жолу болбой жүргөн кыздын каты

3462
(жаңыланган 15:05 07.03.2020)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасынын бул жолку чыгарылышында турмуштан жолу болбой, күйөөгө тие албай жүргөн кыздын каты жарыяланат.

Психологдордун "ар кимден кеңеш сураба" деген пикирин окуп калгам. Мындан улам адистерге эле кайрылууну туура көрдүм.

Бир эмес, эки кесиптин ээсимин. Анын арты менен нан таап жеп, дүйнө таанымымды, өзүмдү өстүрдүм. Бир учурда үч-төрт жерде иштеп, тытынып жүрүп, өз күчүм менен үй, автоунаа алдым. Азыр чакан бизнес ачып жатам. Бирок "бири кем дүйнө" экен, турмуштан өз ордумду таба элекмин. 38ге чыктым, балам да жок...

Бой тарткандан баштап эле артыман жигиттер калбай чуркады. Алардын көптүгүнөн башым айланчу. Бирок жактырган жигиттин сунушун кабыл аларым менен эле баары тетири басып, жоголуп кетчү. Айрымдары кайрылып келчү, бирок үйлөнүп алгандан кийин. Бирөө эле эмес, бир нечеси ушундай абалга калтырды. Жакындарым "сага көз тийди, жолуңду дубалатып бууп коюшкан" дей беришчү. Бирок ага көп маани берчү эмесмин.

Жашым отузга келип калганда жумуш аркылуу бир жигит менен таанышып калдык. Жылдызыбыз келишип кыз-жигит болуп сүйлөшүп жүрдүк. Оор басырыктуу, адептүү жигит эле. Жакшы көрөрүн, сүйөрүн айтчу. Мамилебиз ысык болуп кетти. Бир күнү андан боюма бүтүп калганын билдим. Сүйүктүүмө абалымды айтсам так секирди. "Атайын кылдың" деп мени күнөөлөп, азыр үйлөнбөй турганын айтып басып кетти. Ата-энемдин алдында өзүмдү абдан күнөөлүү сездим, күйөөсү жок төрөп, аларды жер караткым келген жок. Боюман алдырдым. "Сени жан дилим менен сүйөм" деген жигит ошол окуядан эки ай өтпөй кесиптешине үйлөнүп алганын уктум. Ал кездеги абалымды сурабаңыз. Боюман алдырганым үчүн өзүмдү күнөөлөп, өзүмдү жеп салдым. Депрессияга түшүп, бир топ убакыт ооруканага да жатып калдым. Эптеп өзүмө келип жумушка чыксам жетекчим ачык эле куугунтуктай баштады. Ага менин ордум керек эле. Аргасыздан жумуштан арыз жазып чыктым. Кыйналдым, бирок убакыт баарын дарылады. Кайра жакшы жумушка орношуп алаксыдым. Ишим илгерилей баштады, бирок жеке жашоомдо баягы эле көрүнүш. 35 жашымда дагы бир жигитке кезиктим, бирок ал менден сегиз жаш кичүү эле. Буга чейин турмуш куруп, бир балалуу болгондо ажырашып кетиптир. Сезимдерин билдирди. Сүйүүдөн көңүл калган жаным ага көп ишенип, берилген жокмун. Бирок аны жактырам.

Өткөндө ал жигит да "кааласаң менден төрөп ал, бирок жакында башкага үйлөнөм" деди. Үстүмөн бирөө муздак суу куйгандай болду. Намыстандым, ызаландым. Төрөп алып, баламдын атасыз өсүшүн каалабайм, төрөбөй коё турайын десем жашым өтүп баратат. Эмне кылышты билбей калдым. Азыр жашоого тың, билимдүү, келишимдүү жигиттерди эбак эле ээлеп кетишкен. Алар үй-бүлөлүү. Экинчи аял катары колумду сурагандар болду. Бирок мага андай жашоо кызык эмес, корком. Эртеңки күнүм эмне болот? Мен кыялданган жигитке жолуккуча жашым өтүп кетмей болду. Же жашоомду тобокелге салып, чогуу жашабасак да бала үчүн нике кыйдырып, өзүмдөн сегиз жаш кичүү жигиттен төрөп, балалуу болуп алсамбы? Эмне кылсам?..

Гүлнара Жасоолова, психолог:

--Психолог маселе эмнеден келип чыкканын териштирип, багыт бере алат, бирок чечимди ар бир адам өзү кабыл алат. Азыр окуу, иш, карьера деп жүрүп үй-бүлөнү көп ойлобой, убакыттын кантип өткөнүн билбей калган кыздар көп. Бул бир эле бул кыздын эмес, ошол кыздардын баарынын көйгөйү.

Конкреттүү түрдө бул кыздын кырдаалын алып карай турган болсок, кат жазган адам өзүнө ишене албай жаткандай. Эмнени каалап жатканын өзү билбейт. Өткөн иштерине көп өкүнөт экен. Башка бирөөгө ишене албаган адам өзүнө да ишене албайт. Башкаларга ачылбайт. Мындай учурда чечкиндүү болуп, ар бир нерсеге жоопкерчиликтүү мамиле кылганы жакшы. "Өткөндөгүдөй болуп калсачы" деп күмөн санап, корко берсе ойлогондой болот. Бир адам менен экинчи адам окшошпойт, аларды салыштырган туура эмес.

Анан жашоодогу максатты туура койгон оң. Мисалы, кат жазган кыз жөн эле бирөөдөн балалуу болгусу келип жатабы же толук кандуу үй-бүлө кургусу келип жатабы? Жөн эле төрөп алса, бала толук кандуу үй-бүлөдө өспөй калат, атасыз чоңоёт. Аны да эске алсын.

Колунан келсе толук кандуу үй-бүлө курганга аракет кылышы керек. Өзүнө жашташ балдардын баарын "туура эмес" дебей карап көрсүн. Балким, алар да турмуштан ордун таба албай жүргөндүр. Ажырашкан аял-эркектин баары начар деген туура эмес. Алар да тагдырдын ар кандай сыноосунан улам ажырашкандар.

Үй-бүлө курууга эч убакта кеч эмес. Андыктан алгач эмнени каалап жатканын билсин. Ошого жараша чечимди өзү кабыл алат. Адамдарды өйдөдөн карап чечим чыгарбаш керек. Балким, артынан ээрчип, колун сурап жүргөндөрдүн ичинде өзүнө ылайыктуусу бардыр.

3462
Белгилер:
турмуш, жигит, үй-бүлө, кыз, кат, психолог
Тема:
Психолог менен баарлашуу (147)
Тема боюнча
Статком: Кыргызстанда эркектерге караганда билимдүү аялдар көп
Жээнбеков Чыңгыз Айтматовдун үйүнө барып, жубайын куттуктады
Ала-Тоо аянтындагы фонтандар. Архив

Жекшембиге карата аба ырайы

50
16-майга караган түнү кээ бир аймактарда жаан жаап, күн күркүрөшү, бийик тоолуу райондордо кар жаашы күтүлөт. Бийик тоолуу райондордо жолдор тайгак болот. Батыштан соккон шамалдын ылдамдыгы секундасына 4-9 метрге жетет.

БИШКЕК, 15-май — Sputnik. 16-май, жекшембиде, күндүз республика боюнча күн ачык болот. Бул тууралуу Кыргызгидромет билдирди.

Абанын температурасы Чүй, Талас аймактарында +22...+27, Ош, Жалал-Абад жана Баткен облустарында +26...+31, Ысык-Көл өрөөнүндө +14...+19, Нарында +15...+20 градус жылуу болот.

Ош жана Бишкек шаарларында жаан-чачын күтүлбөйт. Күндүн табы борбор калаада +24...+26, Ош шаарында +26...+31 градуска чейин көтөрүлөрү маалымдалды.

50
Белгилер:
Кыргызстан, аба ырайы
Тема боюнча
Кытай алгачкы жолу Марска космостук аппаратын кондурду
Кыргызстандын желеги. Архив

Өкмөт эгемендүүлүк майрамында кыргыздардын дүйнөлүк курултайын өткөрүүнү сунуштады

71
(жаңыланган 20:26 15.05.2021)
Буга чейин президент Садыр Жапаров кыргызстандыктардын бүткүл дүйнөлүк курултайын өткөрүү демилгесин көтөргөн.

БИШКЕК, 15-май — Sputnik. Министрлер кабинети эгемендүүлүктүн 30 жылдыгына карата
кыргыз элинин бүткүл дүйнөлүк курултайын өткөрүүнү сунуштады. Бул тууралуу өкмөт башчы Улукбек Марипов аталган күндү майрамдоо боюнча уюштуруу комитетинин кеңешмесин өткөрүп жатканда сөз болду.

Өкмөттүн маалымат кызматынан билдиришкендей, республиканын түптөлүшүнүн 30 жылдыгын майрамдоо боюнча иш-чаралардын планына Бишкек шаарында жана аймактарда өткөрүлчү 100дөн ашуун иш-чара киргизилген.

“Кеңешменин жүрүшүндө өлкө президентинин кайрылуусуна ылайык, планга кыргыз элинин бүткүл дүйнөлүк курултайын өткөрүүнү киргизүү сунушталды. Министрлер кабинетинин башчысы 30 жылдыкты майрамдоо боюнча иш-чаралар планын толуктап иштеп чыгууну жана сын-пикирлерди эске алуу менен үч күндүн ичинде уюштуруу комитетинин талкуулоосуна сунуштоону тапшырды”, — деп айтылат билдирүүдө.

Маалыматка караганда, юбилейлик датага карата театрлаштырылган оюн-зооктор уюштурулуп, бир катар ири көргөзмөлөр жана ат оюндары өткөрүлөт. Ошондой эле улуу Кыргыз каганатынын түзүлүшүнөн баштап, азыркы мезгилге чейинки басып өткөн жолу тууралуу сүрөт китебин түзүү пландаштырылууда.

Марипов белгилегендей, бардык иш-чаралар республикадагы эпидемиологиялык кырдаалды эске алуу менен санитардык ченемдерге жана талаптарга ылайык жүргүзүлүшү керек.
Буга чейин президент Садыр Жапаров кыргызстандыктардын бүткүл дүйнөлүк курултайын өткөрүү демилгесин көтөргөн. Анткени жаңы Конституцияга Курултай институту тууралуу киргизилген.

71
Белгилер:
план, курултай, Кыргызстандын эгемендүүлүк күнү, майрам, Улукбек Марипов, Кыргызстан
Тема боюнча
Жапаров кыргызстандыктардын бүткүл дүйнөлүк курултайын өткөрүүнү сунуштады