Жүргүнчүлөр аэропорттук терминалдын жанында. Архив

Кыргызстанга келчүлөр үч категорияга бөлүндү. Өкмөт себебин түшүндүрдү

873
(жаңыланган 14:11 13.03.2020)
Өлкөлөрдүн категориясы эпидемиологиялык абалдын курчушунан улам мамлекеттердин тизмеси ТИМ менен макулдашып, өзгөрүшү мүмкүндүгү айтылды.

БИШКЕК, 12-мар. — Sputnik. Кыргызстанга чет жактан келген четөлкөлүктөр жана жарандар үч категорияга бөлүнгөн өлкөлөрдөн келгенине жараша жоопкерчилик ала турган болду. Бул туурасында өкмөттүн маалымат кызматынан кабарлашты.

Саламаттык сактоо министрлиги коронавирустун пандемия деп жарыяланышынан улам өлкөлөрдү үч категорияга кошумча критерийлер менен баалап бөлдү. Алар:

  • ооруп калгандардын абсолюттук саны;
  • акыркы 10 күн ичиндеги инфекциянын тароо темпи;
  • эл аралык көз карандысыз уюмдардын баасы боюнча өлкөнүн пандемия, эпидемияга даярдык индекси.

3 категориядагы өлкөлөр

Өлкөлөрдүн категориясы эпидемиологиялык абалдын курчушунан улам мамлекеттердин тизмеси ТИМ менен макулдашып, өзгөрүшү мүмкүндүгү айтылды.

I категорияга жогорудагы үч критерийдин бири туура келген өлкө кирет.

Транзит менен Кытай, Италия, Иран, Түштүк Корея, Франция, Германия жана Испанияда акыркы 30 күн ичинде болгон четөлкөлүк жарандардын Кыргызстанга киришине тыюу салынат.

Кыргызстандыктар I категорияга кирген мамлекеттерде болуп же ал жактардан транзит менен келсе, атайын жайдагы 14 күндүк обсервацияга киргизилет. Бул ID-карта жана бардык паспорттордун ээлерине тиешелүү.

Ал эми жогоруда саналган өлкөлөрдө акыркы 30 күн ичинде болбогон чет элдик жана КР жарандары атайын текшерүүдөн өтүп, Кыргызстанга кирсе болот.

Ал эми обсервация шартын бузгандар Кыргызстандын мыйзамдары менен жоопкерчиликке тартылат.

II категория: буга АКШ, Япония, Швеция, Швейцария, Улуу Британия, Бельгия, Нидерланддар кирди.

Чет элдиктер жана КР жарандары эгерде ушул өлкөлөрдүн транзити менен келсе, 14 күндүк үй карантинине алынат.

Үй карантини боюнча эрежелерди бузгандар Кыргызстандын мыйзамдары боюнча жоопкерчиликке тартылат.

Вице-премьер-министр Эркин Асрандиев. Архив
© Фото / пресс-служба правительства/ Алишер Алиев
Кылмыш-жаза кодексинин 280-беренесинде атайылап же байкоосуздан санитардык-эпидемиологиялык эрежени бузса, байкабастан массалык ооруга себепкер болсо, элди ууландырып алса же башка оор залал келтирсе VI категориядагы айып менен жазаланат. Же болбосо кызматты ээлөө, же кайсы бир иш менен алектенүү укугунан эки жылга ажыратылат.

Кылмыш-жаза кодексинин 68-беренесинин негизинде жашы жете электер үчүн VI категориядагы айып пул салынат. Ал 1200дөн 1400гө чейинки эсептик көрсөткүчтөгү, ал эми башка жеке тараптар үчүн 2600дөн 3000ге чейинки эсептик көрсөткүч көлөмүндөгү айып пул.

Эгерде чет элдик жаран үй карантини боюнча шартты аткара албаса, Саламаттык сактоо министрлигинин бекиткен буйругунун негизинде КРге киргизилип, бирок атайын жайдагы 14 күндүк обсервацияга жатат.

III категория: буга Сингапур, Австрия, Дания, Кытайга караган Гонконг, Малайзия, Таиланд, Индия, Бахрейн, Австралия, Греция, Канада, Ирак, Бириккен Араб Эмирлиги, Кувейт, Ирак, Египет, Ливан, Катар, Сауд Аравиясы кирет.

Чет элдиктер жана КР жарандары эгерде ушул өлкөлөрдүн транзити менен келсе, баштапкы текшерүүгө алынып, андан ары үйүнө кое берилет. Бирок Кыргызстандын аймагында ары-бери каттап жүрүүгө 14 күнгө чейин чектөө болот.

КРде катталган дипломатиялык өкүлчүлүктүн жана эл аралык уюмдардын кызматкерлери, чет элдик делегациялардын мүчөлөрү ТИМге өз учурунда кабарлап турат жана милдеттүү болгон текшерүүдөн өтөт, бирок обсервацияга алынбайт (эгерде клиникалык белгилер байкалбаса).

Жарандар үчүн категориялар боюнча өзгөрүүлөр (КРдин аймагына киргендер үчүн) 2020-жылдын 14-мартынан тарта күчүнө кирет.

2019-жылдын декабрь айынын аягында Кытайдын Ухань шаарында белгисиз өпкө оорусу жайылып баратканы байкалган. Оору деңиз азыктарын саткан базардан тараган. Адистер дарттын козгогучу коронавирустун 2019-nCoV деп аталган жаңы тиби экендигин боолголошкон. Учурда ал дүйнөнүн 100дөн ашык өлкөсүнө тарап, жуктуруп алгандардын саны 126 миңден ашты. Алардын ичинен 4638 киши каза болуп, 68 284ү сакайды. 11-март күнү кечке жуук Дүйнөлүк саламаттык сактоо уюму дүйнө жүзү боюнча коронавирус пандемиясын жарыялады.

Кыргызстандагы коронавируска каршы өткөрүлүп жаткан чаралар жана анын кесепети, акыркы маалыматтарды Sputnik Кыргызстандын тексттик трансляциясынан окусаңыз болот.

873
Белгилер:
карантин, жоопкерчилик, коопсуздук, чет өлкө, категория, коронавирус, Кыргызстан
Тема:
Коронавируска байланыштуу Кыргызстандагы кырдаал (1484)
Тема боюнча
Борбор Азия өлкөлөрүнүн коронавируска каршы камы кандай?
Кыргызстан импорттук сырьёну ташуунун башка жолдорун издеп жатат

Кыргыз-казак чек арасындагы тыгын. Айдоочулардын көйгөйүн баяндаган видеорепортаж

13
(жаңыланган 01:09 04.06.2020)
Кыргыз-казак чек арасы. Бишкек — Торугарт жолу менен калаадан чыгып баратканда жүк ташуучу автоунаалардын узун кезеги алыстан көзгө даана көрүнөт. Кезек күткөн айдоочулардын көбү Казакстандан Кыргызстанга товар алып келип, кайра кете албай калгандар.

Казакстанга кирүү май айынын аягынан тарта кыйындай баштаган. Акыркы үч күн ичинде коңшу мамлекетке саналуу эле айдоочу кирген. Бирок 3-июндан тарта кыймыл бир аз жанданып, жүк ташыгандар чекесинен өтө баштаган.

Баарынан да тез бузулуп кетчү азыктарды ташыган айдоочулар санааркап жатышат. Жашылча-жемиштери чирип кетпеш үчүн күнү-түнү автоунаанын муздаткычтарын өчүрбөй жатканын айтышты.

"Россияга 22 тонна сабиз алып бара жаткам, тыгында турганыма үч сутка болду. Күн болсо кайнап, көчөдө 35 градус ысык. Көлөкө жок, талаада 40 градус ысыктай эле сезилип жатат. Кондиционер жок болсо сабиз биринчи күнү эле чирип кетмек. Жашылча соолубай турсун деп муздаткыч иштеттим. Ага эле май сатып алганга алты миң сомдой чыгым болдум. Бул чыгымды эч ким төлөп бербейт. Эгер соолуган сабиз алып барсам, анда мага акча да төлөп беришпейт", — деди айдоочулардын бири Умар Ханмончи.

Ысыктын күнү кезек күтүп Умарга окшоп тургандар жүздөп саналат. Алардын баары өз акчасына күйүүчү май алып, кайсы маалда өткөрүп жиберет деп уйку бетин көрбөй кезегин күтүп турган чактары.

Мамлекеттик чек ара кызматынын маалыматы боюнча, азыркы тапта "Ак-Тилек" жана "Чоң-Капка" өткөрмө пункттары гана иштеп жатат. Жүк ташуучу автоунаалардын узун кезегине ушул да себеп болушу ыктымал.

"Автоунаалар дезинфекциядан өтүп, айдоочулардан коронавируска анализ алып жатышат. Муну да эске алыш керек. Кыргыз тарап автоунааларды тез өткөрүү үчүн болгон күчүн жумшап жатканын баса белгилеп кетели", — дешти чек ара кызматынан.

Кыргызстандын жүк ташуучулар ассоциациясынын башчысы Темирбек Шабданалиев буга пандемиянын деле тиешеси жок деп эсептейт.

"Бул көйгөйгө үч жыл болду. Коронавирус Кыргызстан, Казакстанда пайда болгонго чейин эле айдоочулар чек арадан өтө албай 4-5 күндөп турушчу. Баарынан да үч суткалап тургандарга жаман болду. Дагы жакшы аларга жакын жашаган аймактагылар бекер тамак-аш алып келип берип жатышат", — деди Шабданалиев.

Кыргызстандын Экономика министрлигинин кызматкерлери жүк ташуучу автоунаалардын айдоочулары менен жолукканын айтып, алардын көйгөйүн укканын билдиришти.

"Жүк ташуучулар ассоциациясынын өкүлдөрү менен вице-премьер Эркин Асрандиев жолугат. Мындан тышкары казак тарап менен дагы сүйлөшүүлөр жүрөт. Ал жактан чечим кабыл алынгандан кийин гана жыйынтыгын билдире алабыз", — дешти маалымат кызматынан.

Экономика министрлигинин маалымат катчысы эксперттер көйгөйдү чечүү жолун издеп жаткандыктарын кошумчалады.

13
Белгилер:
жүк, айдоочу, чек ара, Казакстан, Кыргызстан
Тема боюнча
Казакстанга өткөрчү "Акжол" бекетинде ремонт качан бүтөрү айтылды
Мектеп бүтүрүүчүсүнүн аттестаты. Архив

Мугалим аттестатка акча сураса чалгыла! Мэрия вице-мэрдин телефонун жарыялады

33
(жаңыланган 01:15 04.06.2020)
Эгер аттестат жоголуп кетип же башка бир себептерден улам керек болуп калса, дубликатты 41 сомго, сырты менен кошкондо 61 сомго алса болот.

БИШКЕК, 3-июн. — Sputnik. Аттестаттар акысыз берилет, эгерде мектепте мугалимдер ата-энелерден кошумча акча сураса, вице-мэрдин түз өзүнө чалгыла. Бул кабарды мэриянын маалымат кызматы таратты.

"Урматтуу ата-энелер жана балдар! Эгер силерден же тааныштарыңардан мектеп кошумча акы талап кыла турган болсо, дароо шаардын вице-мэри Татьяна Кузнецованын 0554 312038 номерине чалып же ушул эле WhatsApp номерине видео, сүрөт фактыларын жибергиле", — деп айтылат маалыматта.

Мэрия социалдык тармакта мугалимдер ата-энелерден аттестатка акча сурап жаткандыгы тууралуу маалыматтар тарагандыгын айтып, бул вице-мэр Татьяна Кузнецованын жеке көзөмөлүндө болорун эскертти.

"Аттестаттар акысыз берилет. Эгер ал документ жоголуп кетсе же башка бир себептерден улам керек болуп калса, дубликатты 41 сомго, сырты менен кошкондо 61 сомго алса болот. Анын акысы банк аркылуу гана төлөнөт", — деп эскертти мэриядан.

Муниципалитет мектеп жетекчилиги, мугалим, бала бакча кызматкерлери окуучу, ата-энеден акча сурап, талап кылууга укугу жок экенин кошумчалады.

Аттестаттар акысыз берилерин буга чейин Билим берүү жана илим министрлиги да эскерткен.

33
Белгилер:
мектеп, окуучулар, акча, аттестат, Бишкек мэриясы, Бишкек, Кыргызстан
Тема боюнча
Министрлик бүтүрүүчүлөр аттестатты акысыз аларын эскертти