Абылгазиев: вирустан улам экономика алсырайт, бирок элдин ден соолугу маанилүү

БИШКЕК, 13-мар. — Sputnik. Коронавирустун жайылышына жол бербөө максатында киргизилген чектөөгө байланыштуу атамекендик экономика жоготууга учурайт. Бирок биз үчүн калктын ден соолугу маанилүү. Бул тууралуу премьер-министр Мухаммедкалый Абылгазиев коронавирус инфекциясынын тийгизген таасиринин кесепеттерин азайтууга багытталган эки республикалык штабдын ишин талкуулаган кеңешмеде билдирди.

Премьер вирустун өлкө аймагына киришине жана жайылышына жол бербөө үчүн тийиштүү чаралар кабыл алынганын белгилеген.

"Республикада эки штаб түзүлдү. Көзөмөл-өткөрүү жайларында текшерүү күчөтүлгөн тартипте жүрүп жатат. Эпидемиологиялык жагдайы жагымсыз болгон өлкөлөрдөн келген бардык жарандар 14 күндүк карантинге алынууда", — деди Абылгазиев.

Өкмөт башчы түзүлгөн кырдаалга байланыштуу бизнести өнүктүрүүгө көңүл буруу зарылдыгын баса белгиледи.

"Кытай - негизги соода өнөктөштөрүбүздүн бири, анын жалпы товар жүгүртүүдөгү үлүшү 26,4 пайызды түзөт. 2019-жылга карата импорттун жалпы көлөмүндөгү үлүшү 35,4 пайызга жетти. Негизинен бул өндүрүш үчүн сырьелук база. Азыр сырьенун запасы бар, бирок ташуулар качан жана кандай жол менен калыбына келери белгисиз. Мында биздин кемчиликтерди аныктоого гана эмес, өз өндүрүшүбүздү башынан баштоого аракет кылуу мүмкүндүгү пайда болду", — деди премьер-министр.

Премьер-министр өкмөт аппаратынын, министрликтердин жана ведомстволордун кызматкерлерине инфекцияны жуктуруу тобокелдиги бар чет өлкөлөргө болуучу бардык иш сапарларын токтотууну тапшырды. Ага ылайык, чет мамлекеттерге сапарлар мамлекеттин маанилүү иш-чаралары боюнча жана эпидемиологиялык кырдаал дурус өлкөлөргө гана жасалууга тийиш.