Бишкекте түндө коменданттык сааттын эрежесин бузган 119 адам кармалды

БИШКЕК, 1-апр. — Sputnik. Бишкекте түндө коменданттык саатты бузган 119 адам кармалганын шаар коменданты Алмаз Орозалиев брифинг учурунда билдирди.

Алардын ичинен 102и эркек, 17си аял, үчөө чет элдик жаран.

Биринчи Май районунда — 55, Свердлов районунда — 80, Ленин районунда — 88, Октябрь районунда 80 пост иштеген. Түндө көчөлөргө жөө патрулдар чыгарылды.

Орозалиев эреже бузгандардын саны күнүгө 100дөн азайбай жатканын айтып, бул жакшы көрсөткүч эместигин белгиледи.

Коронавирус Кыргызстанда

Кыргызстанда коронавируска кабылгандардын саны 107ге жетти. Алардын 49у эркек, 58и аял. Ал эми мурдагы күнү Сузактын үч тургуну айыгып чыкканы кабарланган.

Бишкек, Ош, Жалал-Абад шаарларында жана Сузак, Ноокат, Кара-Суу райондорунда өзгөчө абал жарыяланган. Кечки саат 20.00дөн таңкы 7.00ге чейин коменданттык саат киргизилди. Мындай режим 15-апрелге чейин созулат.

Ушу тапта өлкө ичинде абал кандай болуп жатканын Sputnik Кыргызстан жүргүзгөн тексттик баяндамадан билүүгө болот.