Члены медицинского персонала работают в отделении коронавирусной болезни (COVID-19) в больнице CHU de Liege в Льеже. Бельгия, 4 апреля 2020 года

Кызыбызды сагындык... COVID-19 менен күрөшкөн кызматкерлердин үй-бүлөсүнүн баяны

2146
(жаңыланган 14:07 09.04.2020)
Дүйнө элин дүрбөлөңгө түшүргөн коронавирус Кыргызстанга да жетип, көпчүлүктүн жашоо-турмушун түп-тамырынан бери өзгөрттү окшойт. Айрым дарыгер, милициялар жакындарын жарым айдан бери көрө элек...

Карантинде элдин көбү үйдө жатса, айрым кызматкерлердин жумушу, тескерисинче, көбөйдү. Алар милиция, медицина, ӨКМ кызматкерлери, республикалык штабдын өкүлдөрү жана башка мамлекеттик кызматкерлер. Элдин коопсуздугу жана саламаттыгы үчүн жан үрөп иштеп жаткандардын жакындары, өздөрү азыркы кырдаалда кандай күн кечирип жатканын Sputnik Кыргызстан агенттиги билип көрдү.

Назгүл Мамбетова Бишкек шаарындагы жугуштуу илдеттер ооруканасында дарыгер болуп иштейт. Ушу тапта коронавирус жуктурган бейтаптарга жардам берип, аларды дарылап жаткан убагы. Ал вируска байланыштуу үйүнө эки жумадан бери бара электигин, балдарын көрө элегине жарым ай болуп калганын айтты.

"Кырдаал баарыбыздын жашообузду өзгөрттү окшойт. Эс алуу, дем алыш деген жок. Коргоочу кийимдерди кийип алты саат бою тикебизден тик туруп бейтаптар менен иштейбиз. Коронавирустан улам эки жумадан бери үйгө бара элекмин. Анткени бизге сыртка чыкканга болбойт. Үч балам бар. Улуу кызым турмушка чыккан. Эки уулумду туугандарыбыздын үйүнө жиберүүгө туура келди. Себеби жолдошум да жумушта. Эркек балдар болсо өз алдынча тамак жасап жей алышпайт. Ошондуктан туугандарга каратып жатабыз. Алты саат иштесек, алты саат эс алмай. Бейтаптар менен иштегенде ал жакка телефондорду алып кирбейбиз. Ооруканадан тамак ичип, ооруканада уктап, короого чыкканда алысыраак эч жакка да баса албайбыз. Балдарымдын ал-жайын телефондон эле сурап коюп иштеп жатам", — деди дарыгер.

Мамбетова вирус жуктуруп алган бейтаптар менен иштөө оңой эмес экенин, бирок аларды айыктырып чыгаруу үчүн дарыгерлер бардык күчүн жумшап жатканын кошумчалады.

"Бул оору бизге келип, адам өмүрүн алып жатса, албетте, жугузуп албасак экен деп кооптоносуң, коркосуң. Бирок биз жугуштуу илдеттер ооруканасында иштегендиктен, көнүп калсак керек. Коронавирус жайыла баштаганда баарына даярданганбыз. Бейтаптардын баары окшош эмес. Бири түшүнсө, бири айтканга көнбөйт. Бирок колдон келген аракетти көрүп, дарылап жатабыз", — деди Мамбетова.

Республикалык штабдын маалымат кызматында иштеген Мээрим Искакова азыркы кырдаалдан улам үч кызын ата-энесинин үйүнө жеткирүүгө аргасыз болгон. Апасы Гүлнара Асанованын айтымында, неберелери апасын эки жумадан бери көрө элек, кичүүлөрү сагына баштаптыр.

"Мээримдин жумушу көп. Кыздары менен телефон аркылуу эле сүйлөшүп жатат. Тамак-аш керек болсо, үйгө кирбей дарбазанын алдына таштап кетет же берип жиберет. Мээримди кыздары эле эмес, атасы экөөбүз да сагынып кеттик. Бирок иштебей үйдө жатып алса да болбойт. Мен өзүм дарыгер болуп иштейм. 15 күнгө эс алууга чыккам. Азыр үйдөн неберелеримди карап, тамактарын жасап берип, сабактарын окутуп коюп отурабыз. Эртерээк бул кырдаалдан чыгып, жакындарыбыз менен чогуу болсок экен деп тиленип жатабыз", — деди Асанова.

Кыйын кырдаалда күнү-түнү элге кызмат көрсөткөндөрдүн арасында милиция кызматкерлери да бар. Бишкек шаардык ички иштер башкармалыгында иштеген кызматкердин жубайы аты-жөнүн жарыялабай эле коюуну суранып, карантинде кантип күн кечирип жатышканын айтып берди.

"Коронавирусту медиктер жугузуп алыптыр" деген маалыматты укканда жүрөгүм "шуу" дей түштү. Анткени милиция кызматкерлери да вирус жуктургандар менен иштешет. Жолдошумдун чөнтөгүндө антисептик, кошумча бет кап барбы деп текшерип турам. "Ооруп калбасын" деп иммунитетти бекемдеген тамак-аштарды жеп жатабыз. Пияз, сарымсак дайыма столдун үстүндө. Үйдө кичине балабыз бар. Мындан улам үйдү арчалап, хлор менен тез-тезден жууп жатам", — деди милиция кызматкеринин жубайы.

Ал жолдошунун кесиптештеринин арасында вирусту үй-бүлөсүнө жуктуруп албайын деп иш бөлмөсүндө, жатаканада жашап иштеп жаткандар бар экенин укканын айтты.

"Күйөөм үйгө келгенде кээ бир кесиптештери жакындарын бир-эки жумадан бери көрө электигин айтып келет. Булардын иши да оңой эмес. Элдин коопсуздугу үчүн күнү-түнү кызматта. Сарсанаа болуп эле үйдө отурабыз. Кырдаалдан эртерээк чыксак экен", — деди ал.

ӨКМде куткаруучу болуп иштеген Замир Эрмаматовдун иш графигине жубайы Чынара Токурова көнүп калган. Бирок азыркыдай кыйын кырдаал алардын үй-бүлөсүн да санаага салып жаткан убагы.

"Коронавирус менен биздин атабыз да күрөшүп жатат. Жолдошум жумуштан келгенде балдар анын мойнуна асылып, ойногулары келет. Бирок атасы азырынча балдарын жакын жолоткон жок. Келери менен жуунуп, тазаланат. Жумуштан чарчап келгендиктен, ага жакшы жаңылыктарды айтып берип, маанайын көтөрүүгө аракет кылабыз. Кээде кызматынан улам үйгө келбей да калат", — деди Токурова.

Куткаруучунун аялы үйүнүн подъездин кошуналары менен кезектешип тазалап жатканын да кошумчалады.

"Дарыгердин кызымын, андыктан тазалыкка бала кезимен көнгөм. Балдарды үйдөн эч жакка чыгарбайм, дүкөнгө анда-санда эле барам. Жолдошумдун айлыгы тийгенде баарын бир эле алып койгонбуз. Вирус эртерээк кетсе экен деп жакшылыктан үмүт кылып отурабыз", — деди ал.

Коронавирустун кесепети

Бир суткада Кыргызстанда дагы 42 адамдан коронавирус аныкталды. Ушуну менен өлкөдө COVID-19 жуктургандардын саны 270ке жетти. Анын ичинен 35и айыгып, тилекке каршы, төрт адам каза болуп калды. Ошондой эле 32 медик дагы коронавируска чалдыкканы маалым.

Бишкек, Ош, Жалал-Абад шаарлары менен Сузак, Кара-Суу, Ноокат райондоруна 25-марттан 15-апрелге чейин өзгөчө абал киргизилди. Бул аймактарда саат 20:00дөн 7.00гө чейин көчөгө чыгууга тыюу салынган. Күндүз ооруканага, дарыканага жана дүкөнгө гана барууга уруксат берилген.

2146
Белгилер:
бала, үй-бүлө, милиция, дарыгер, коронавирус
Тема:
Коронавируска байланыштуу Кыргызстандагы кырдаал (1510)
Тема боюнча
5 жылга камалышы мүмкүн. Ошто COVID-19дун белгилерин жашырган адамга иш козголду
Күнүмдүк акчага жашагандарга бийлик кантип жардам берет? Өкмөттүн жообу
Кыргызстан футбол курамасы. Архивдик сүрөт

Дүйнө чемпионатына жолдомо: КР футболчуларынын оюнга чыкчу күндөрү айтылды

11
Мурдагы график боюнча Кыргызстан командасынын тандап алуу турлары марттан июнь айына чейин өтүшү керек эле, бирок коронавирус пандемиясынан улам жылдырылган.

БИШКЕК, 7-июн. — Sputnik. Кыргызстан футбол союзу 2022-жылкы Дүйнө чемпионатына тандап алуу оюндардын боюнча болжолдуу датасын жарыялады.

Улуттук курама команда өткөн жылы Тажикстан, Мьянма, Монголия, Япония өлкөлөрүнүн футболчулары менен төрт жолу беттешкен. Ал эми экинчи айлампада 2019-жылы ноябрь айында Тажикстан менен ойногон. Калган таймаштар март-июнь айларына белгиленген болчу. Бирок коронавирус пандемиясынан улам мелдештер жылган.

Мындан улам оюндарды күздө өткөрүү пландалууда.

  • Мьянма — Кыргызстан (конокто) — 13-октябрь;
  • Кыргызстан — Монголия (өз үйүндө) — 12-ноябрь;
  • Япония — Кыргызстан (конокто) — 17-ноябрь.

Учурда F тайпасында Кыргызстан экинчи орунда турат.

11
Белгилер:
график, дүйнө чемпионаты, дүйнө, оюн, футбол, Кыргызстан
Тема боюнча
Франциялык футболчу дүйнө чемпионатында алган алтын медалын сатып жиберди
Кирешеси 1 млрд. долларга жете турган биринчи футболчунун ысымы аталды
Facebook соцтармагы. Архивдик сүрөт

Facebook расизмге каршы аракет көрө баштады

13
Жакында эле дүйнөлүк ЖМКлар Facebook афроамерикалыктарды кемсинткен постторду жазган 190 миң аккаунтту өчүрүп салганын жазды.

БИШКЕК, 7-июн. — Sputnik. Facebook компаниясынын жетекчиси Марк Цукерберг афроамерикалык Жорж Флойддун өлүмүнөн кийин өзү негиздеген социалдык тармак расалык теңчилик боюнча жаңы саясат баштаарын билдирди. Бул тууралуу "Известия" басылмасы жазды.

"Биз расалык теңчиликке үгүттөө  боюнча жаңы кадамдарды таштай баштадык. Албетте, АКШдагы жана дүйнөдөгү улутчулдукту жана теңсиздикти жеңүү кыйын, бирок биз бул нерсеге кичинекей болсо дагы салым кошушубуз керек", — деди Цукерберг.

Анын айтымында, теңсиздик, бийлик тараптан коркутуп-үркүтүү боюнча билдирүүлөргө карата жаңы талаптар жана жоопкерчилик иштелип чыгат.

"Компаниянын азыркы саясаты деле зордук-зомбулукка жол бербейт. Кайсы бир тарапка карата зомбулук тууралуу пост болсо, аны жок кылып салуу туура деп ойлойбуз. Дагы талкуулар болуп жатат", — деди компания негиздөөчүсү.

Жакында эле дүйнөлүк ЖМКлар Facebook афроамерикалыктарды кемсинткен постторду жазган 190 миң аккаунтту өчүрүп салганын кабарлады.

Эске салсак, Жорж Флойд майдын аягында Миннеаполисте полиция кармап, күч колдонгондон кийин көз жумган. Анын өлүмү элдин жаалын кайнатып, АКШ эле эмес башка жерлерде да нааразылык толкундарын жаратты. Ал эми Американын бир топ шаарларында башаламандык жаралып, талап-тоноо күч алган.

13
Белгилер:
Марк Цукерберг, Facebook, АКШ
Тема боюнча
Кокусунан кетирген катадай эмес. Facebook неге актанды?
АКШ соту Facebook компаниясын 5 млрд. доллар айыпка жыкты. Себеби