БИШКЕК, 19-апр. — Sputnik. Эми Ысык-Көл облусуна "Ак-Кеме" экологиялык посту аркылуу гана кирүү мүмкүн. Мындай чечимди облустук ыкчам штаб кабыл алганын Республикалык штабдан кабарлашты.
Маалыматка ылайык, Кызыл-Омпол (Нарын тарапка кете турган жол) аймагындагы пост аркылуу кирүүгө тыюу салынды. Ал жактан облус аймагынан чыгууга гана уруксат.
"Мындан сырткары, облустук штаб өкмөткө кыргыз-казак чек арасындагы "Каркыра" сезондук өткөрүү пунктунун ачылыш убактысын белгисиз мөөнөткө жылдырууну сунуштады. Негизи "Каркыра" өткөрмө посту 1-майдан 1-ноябрга чейин иштечү", — деп айтылат маалыматта.
Мунун баары элдин саламаттыгын сактоо, коронавирустун жайылып кетүүсүн алдын алуу максатында жасалып жатканы кошумчаланды.
Эске салсак, бул облуста коронавирус сегиз адамдан аныкталган.
Коронавирус кесепети
Кыргызстанда коронавирус жуктуруп алган бейтаптардын саны 554кө жетти. Анын ичинен 134ү медицина кызматкерлери. Илдеттен 144 адам айыгып чыкса, бешөө көз жумду.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
Мындан тышкары, Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
