Помидор сатуу. Архивдик сүрөт

Ошондогу помидордун ширини ай!.. Талгагынан улам дос тапкан келиндин ак жарыгы

932
(жаңыланган 14:08 11.05.2020)
Адамдын көңүлү — гүл. Жылт эткен жарык, жакшы көз караш, жагымдуу сөз маанай көтөрүп, ал тургай бир нече күн жүрөктү жылуулук аралап жүрөт.

Sputnik агенттиги окурманга жылуулук чачкан, жакшылык кылууга чакырган макалаларды жарыялап келет. Бул ирет редакцияга келген катка көңүлүңүздөрдү буруп, бейтааныш адамдын жакшылыгынын артынан дос, тууган тапкан үй-бүлөнүн баянын сунуштайбыз.

Сиздердин жарык чачкан, жакшы маанай тартуулаган "Ак жарыгыңыздарды" такай окуп турам. Жаз келип күн жылыганы, жашылча-жемиштердин бышар убагы жакындаган сайын мен дагы жаш кезимдеги бир окуяны эстеп, сиздер менен бөлүшүүнү туура көрдүм.

Университетти бүтүп турмушка чыккан убак. Шаарда туруп калдык. Күнүмдүк жашообуз кадимки жаш бүлөнүкүндөй эле өтүп жатты, бирде бар, бирде жокко ток болуп жашап жатканда боюма бүтүп, кубанганыбызды айтпа.

Кош бойлуу мезгилде аялзатынын абалын сүрөттөп бербесем да түшүнүктүү болуш керек. Баш айланып кускандан тарта көңүлүң каалаган тамакка табит ачылганга чейин бир далай учурду башыңан өткөрөсүң. Мен да бул убактан өтүп, алты-жети ай болуп калган кезим.

Жумуштан чыгып алып Ош базары тараптан келе жаткам. Жолдо кыпкызыл болгон жаңы чыккан помидорлорду сатып жаткандарын көрүп алып шилекейим куюлду, түрү турат, алайын десем жанымда акча жок. Кетким да келбейт, жыты буркурайт. Ары-бери өткөндөрдөн тааныш издеп коем, бирөө-жарым чыгып калса сатып берчи деп суранайын дейм. Кашайып эч ким чыкпайт, менин болсо чыдамым кетип, эмне кыларымды билбей алдастап басып жүрөм. Кош бойлуу кездеги бул абал наристе жытын искеген энелерге тааныш болушу керек.

Бир убакта эле жаныма бир бейтааныш адам келип, жанатан бери мени байкап турганын, жардам керек эмеспи деп токтогонун билдирди. Мен болсо жакын адамымды тапкансып, сүйүнүп кеттим. Дароо ага помидор жегим келип жатканын айтып, алайын десем акчам жетиштүү эмес экенин билдирдим. Так ушул чоң, кызыл, ширеси көп помидорду каалап жатканымды түшүндүрсөм, каткырып күлүп, "жүрүңүз" деп помидор саткан жакка барып тандап салып, пакетти колума карматты. Мен бир килограмм помидорду ошол эле жерден тазалап алып элдин көзүнчө суусун агызып, тамшана жедим. Ал убакта азыркыдай тааныш эмес адамдан коркуу сезими болгон эмес окшойт. Жолдо карай эски тааныштардай сүйлөшүп, таанышып калдык. Ал келинчеги экөө экинчи перзентин күтүп жатканын айтып, мага ата-эне болуу ырахатын саймедиреп, тажрыйбасы менен бөлүшүп баратты. Ошентип менин эңсөөм аткарылып, жаңы дос тапканыма кубанып, бактылуу болуп үйгө келгем.

Кийин уулум төрөлгөндө ал таанышым келинчеги экөө көрүп келип, ошол убакта ал акыркы акчасына помидор алып бергенин, шаардын аркы четиндеги үйүнө жөө жеткенин айтып берип аябай күлгөн элек. Эркек башы менен мени түшүнүп, көксөгөн, жегим келген азыгымды алып берип, талгагымды кандырган таанышыма ыраазымын. Андан бери канча жыл өтсө да бул жакшылыгын такыр унута албайм, жылмаюу менен эстеп жүрөм. Ошол күнкү бейтааныш адам кийин жолдошумдун кыйышпас досуна айланды, мен болсо бир тууган таптым.

932
Белгилер:
бир тууган, базар, жардам, Помидор, акча, талгак, ак жарык
Тема:
Ак жарык (26)
Тема боюнча
Эски чемодандан бут кийим тиктирген заман. Ошондогу мугалимиме алкыш
Медициналык кызматкер ВИЧке кан анализин жүргүзүп жатат

Жалал-Абадда ВИЧ илдетин жуктургандарды аныктоо боюнча акция башталды

30
(жаңыланган 18:19 27.11.2020)
Өнөктүк маалында жашоочулар анонимдүү түрдө акысыз текшерүүдөн өтө алат. Иш-чара 27-ноябрдан баштап 1-декабрга чейин уланмакчы.

БИШКЕК, 27-ноя. — Sputnik. Жалал-Абад облусунда "ВИЧ-СПИД илдети боюнча өз макамыңды бил" аттуу акция башталды. Бул тууралуу аталган аймактагы СПИДге каршы күрөшүү жана алдын алуу борборунан билдиришти.

Борбордун башкы дарыгери Элмира Сатарованын айтымында, облус аймагында илдетти жыныстык жол менен жуктуруп алган эркектердин саны өскөн. Мындан улам өзүнүн ВИЧ-инфекциясын жуктуруп алганын билбей жүргөндөрдү эртерээк аныктап, дарылоо максатында атайын иш-чара уюштурулган.

"Акция учурунда жашоочулар анонимдүү түрдө акысыз текшерүүдөн өтө алат. Иш-чара 27-ноябрдан баштап 1-декабрга чейин уланат", — деди Сатарова.

Маалым болгондой, облуста илдетти жугузгандардын 62 пайызы ооруну жыныстык жол менен илештирсе, 27 пайызы кан аркылуу, беш пайызы энеден балага жуккан.

Учурда Жалал-Абад облусунда 1 087 адамдын ВИЧ-инфекциясына чалдыккандыгы аныкталган. Жыл башынан бери 36 адам аталган дартты жуктуруп, алардын 56 пайызы эркектер экени кошумчаланды.

30
Белгилер:
акция, аныктоо, оору, ВИЧ, СПИД, Жалал-Абад
Тема боюнча
Кыргызстанда ооруканада ВИЧ/СПИД жуктургандарга компенсация төлөнөт
Мурдагы вице-премьер-министр Тайырбек Сарпашев. Архив

Мыйзамсыз байыган. Экс-вице-премьер Тайырбек Сарпашевге иш козголду

1247
(жаңыланган 18:03 27.11.2020)
Финансы полициясынын кызматкерлери 2020-жылдын ноябрь айында мурдагы аткаминердин үйүн тинтүүгө алган.

БИШКЕК, 27-ноя. — Sputnik. Мурдагы вице-премьер-министр Тайырбек Сарпашевге кылмыш иши козголду. Бул тууралуу Экономикалык кылмыштарга каршы күрөшүү кызматы билдирди.

Маалыматта Финансы полициясы Сарпашевге карата мыйзамсыз баюу фактысы боюнча сотко чейинки өндүрүш баштаганы айтылат.

"Мурдагы вице-премьер С.Т. мамлекеттик мекемеде жетекчилик кызмат ордун ээлеп турганда көп сандаган кыймылдуу жана кыймылсыз мүлктү сатып алган. Кийин аны декларацияларда көрсөтпөстөн жакын туугандарына каттаган", — деп айтылат маалыматта.

Финпол бул сотко чейинки өндүрүштүн алкагында Сарпашев суракка чакырыларын белгиледи.

Белгилей кетсек, Тайырбек Сарпашев 2012-2014-жылдары Кыргызстандын экономика жана инвестиция боюнча вице-премьер-министри болуп эмгектенген. 2020-жылдын ноябрь айында Финпол анын үйүн тинтүүгө алган.

Тергөөгө ылайык, 2016-жылы президенттин аппаратынын кызматкерлери, Мамлекеттик каттоо кызматынын жетекчилиги, судьялар жана сот тутумунун өкүлдөрү соттун чечимдерин жасалмалап, Максим Бакиевге жакын кишилердин мүлкүн камакка алуу чечимин жокко чыгартышкан. Алар муну менен "Г.Э" ишканасынын кызыкчылыгын көздөшкөн. Сарпашев 2015-2017-жылдары Мамлекеттик каттоо кызматынын төрагасы болуп турган.

1247
Белгилер:
мүлк, кылмыш иши, финансы полициясы, Тайырбек Сарпашев
Тема боюнча
Бакиевдин жакындарына жардам берген. Бишкекте мурдагы судья кармалды
Октябрь районунун мурдагы акими Куценко үй камагына чыгарылды
Беларусь президенти Александр Лукашенко

Лукашенко жаңы Конституция кабыл алынганда президент болбой турганын жар салды

0
(жаңыланган 19:50 27.11.2020)
Лукашенко азыркы Баш мыйзамда президенттин ыйгарым укуктарына басым жасалганын айтып, өлкөнүн пайдасы үчүн жаңысын кабыл алуу керектигин белгилеген.

БИШКЕК, 27-ноя. — Sputnik. Беларусь президенти Александр Лукашенко жаңы Конституция кабыл алынгандан кийин өлкө башчысы болбой турганын жар салды. Бул тууралуу БелТА агенттиги жазды.

"Конституцияны өзүмө ылайыктаган жокмун. Жаңы Баш мыйзам кабыл алынса, мен силердин президентиңер болуп иштебейм. Ошондуктан муну жеңил кабыл алып, тынч болгула", — деген президент.

Ал шайлоонун жыйынтыгын кимдир бирөөнүн жасалмалоосуна жол бербей турганын айтып, ошол себептен жаңы Баш мыйзамды өзгөртүүнү колдоп жатканын айткан.

"Мен жаңы Баш мыйзамдын тарапташымын. Себеби азыркы иштеп жаткан Конституцияны "белгисиз президенттин" колуна карматканга болбойт", — деген ал.

Лукашенко азыркы Баш мыйзамда президенттин ыйгарым укуктарына басым жасалганын айтып, өлкөнүн пайдасы үчүн жаңысын кабыл алуу керектигин белгилеген.

0
Белгилер:
өзгөртүүлөр, конституция, Александр Лукашенко, Беларусь
Тема:
Беларустагы нааразылык акциялары
Тема боюнча
Жапаров референдумга Конституция эмес, башка маселени алып чыгууну сунуштады
Лавров: Беларустагы конституциялык реформаны колдойбуз